ەربول اعامەن شىعارماشىلىق بايلانىسىمىزعا نەگىزگى سەبەپكەر «ارمان قالا – استانا» ءانى بولدى. بىردە الماتىدا مادەنيەت مينيسترلىگىندە ىستەيتىن بەلگىلى سازگەر اعامىز جولامان تۇرسىنباەۆ مەنى شاقىرىپ الىپ: «ماراتجان, ەرەكەڭ ماعان امانات ەتىپ مىنا ولەڭدى جازىپ بەرگەن ەدى. سول اعاڭا جولىقساڭ قالاي بولادى؟ وسىعان ءاندى ءبىر شىعارساڭ, سەن شىعارا الاسىڭ-اۋ» دەپ ماعان جۇكتەدى.
ەربول اعا قىزمەت جاسايتىن عيماراتقا بارىپ, كابينەتىنىڭ ەسىگىن قاقتىم. باكەنە بويلى, قاعىلەز كىسى ەكەن. جىلى شىرايمەن قارسى الدى. «ءتۇسى يگىدەن تۇڭىلمە» دەيدى عوي اتام قازاق. ولەڭدى وقي باستاعاندا اسەر ەتكەنى سونداي, سول جەردە بويىمىزدى شابىت قىستى.
اۋەنى كوكىرەگىمدە سايراپ تۇر, ونى تەك شىرقاي جونەلۋ كەرەك سەكىلدى. «اعا, مىناۋ دايىن ءان عوي» دەگەن ءسوز اۋزىمنان شىعىپ كەتتى… شىداي الماي:
سارىارقا ساۋىرىندا,
ەركە ەسىل باۋىرىندا,
كەلەدى بوي كوتەرىپ
ارمان قالا استانا, – دەگەن جولدارىن كۇبىرلەپ قايتالاي بەردىم.
وسى كۇبىرلەگەن كۇيى ۇيگە قالاي جەتكەنىمدى دە بىلمەيمىن. ءان دايىن. قۋانىشىم قوينىما سىيماي بارادى. سودان ءبىر كۇن وتەر-وتپەستەن ەربول اعاما حابارلاسىپ: «اعا, ءان شىقتى قۇداي قالاسا» دەدىم. ول كىسى دە بالاشا قۋاندى سول ساتتە. سونىمەن نە كەرەك, اعانىڭ بۇل ءانى وتە ءساتتى تۋىندىلارىمنىڭ بىرىنە اينالىپ, «ازيا داۋىسىندا» لاۋرەات اتاندى.
1997 جىلى مامىر ايىندا ءبىرىنشى رەت «ارمان قالا – اقمولا» دەپ ەلوردانىڭ جاستار سارايىندا قىزىم زارينا, ساكەن مايعازيەۆ سىندى وزگە دە ءبىر توپ جاستارمەن كونتسەرت بەرىپ, سوڭىندا وسى ءاندى تازا داۋىستا ورىنداعان بولاتىنبىز. سودان كوپ وتپەي, قالا استانا بولدى. ءبىر جاقسىسى, ءبىز «ارمان قالا – اقمولانى» تازا داۋىستا ايتىپ جۇرگەندىكتەن, كەيىن ءاندى ستۋدياعا جازدىرعاندا اقمولانىڭ ورنىنا «ارمان قالا – استانا» دەپ قايىرماسىن جىمىن بىلدىرمەي وڭاي اۋىستىردىق.
كەيىن بىرەر جىل وتكەننەن سوڭ ارۋ استانامىزعا كەلىپ, كونگرەسس-حولدا كونتسەرت بەردىك. سول كەزدە كوپشىلىك الدىندا «ارمان قالا – استانانىڭ» ولەڭىن جازعان ەربول اعانى تانىستىردىم. زال تولى حالىق اقىنعا ەرەكشە ريزا بولىستى.
ارقا-جارقا وتكەن وسى ءبىر كونتسەرتتىڭ سوڭىندا ورتا جاسقا كەلىپ قالعان ءبىر ورىس زايىبىمەن كەلىپ, استاناعا شىعارىلعان وسىناۋ ءان ءۇشىن راحمەتىن ايتىپ جاتتى. وسى تۇس قاسىنداعى ادامداردىڭ ءبىرى «مۇمكىن ءماتىنىن ورىسشاعا اۋدارتارسىز» دەپ ەدى, الگى ايەل ونى بىردەن تىيىپ تاستادى. «نە نادو پەرەۆەستي, يتاك پونياتنو. مۇنى ورىسشاعا اۋدارۋدىڭ تۇك تە قاجەتى جوق. وسى قازاق تىلىندە, تۇپنۇسقادا تاماشا ەستىلىپ تۇر» دەمەسى بار ما؟! مەنىڭ دە توبەم كوككە ەكى ەلى عانا جەتپەي قالدى.
1998 جىلى استاناعا كوش اۋا باستادى. بۇل ءانىم پويىز جولدا كوپتەگەن ادامدارعا اسەر ەتىپ, ولاردىڭ استاناعا دەگەن سۇيىسپەنشىلىكتەرىن ودان دا ارتتىرا تۇسكەنىن تالاي جاننان ەستىدىم. ءسىرا, اقىن جۇرەك ولەڭ جولدارى ارقىلى تەرەڭىنەن ۇعىندىرىپ, استانامىز ەلگە, جەرگە, جاستارعا دا ارمان بولاتىنىن سەزدىرگەندەي بولىپتى-اۋ. اعامەن بۇدان كەيىن دە شىعارماشىلىق بايلانىسىمىزدى ۇزبەي «اسىل جار» دەگەن ءان شىعاردىم. بۇل ءان ەربول اعامىز بەن جەڭگەمىزدىڭ ۆالس بيلەپ جۇرگەن كەزىندە شابىتتانعاننان تۋعان-تىن…
وسىناۋ عازيز جاننىڭ قاپيادا مەزگىلسىز دۇنيە سالماعاندا بۇگىندە الپىس جاسقا تولار ەدى. ءالى دە بولسا بىرلەسىپ جازار شىعارماشىلىق دۇنيەلەر مول ەدى. امال نەشىك! «ارمان قالا – استانا» ولەڭىمەن جۇرەكتەرگە جول تارتقان ابزال اعانىڭ پەندەشىلىكتەن ادا, اق كوڭىل بەينەسى مەنىڭ جۇرەگىمدە ءاردايىم ساقتالىپ قالماق…
مارات وماروۆ,
قازاقستاننىڭ ەڭبەك سىڭىرگەن ءارتىسى, كومپوزيتور.
