قوعامدىق دەنساۋلىق ساقتاۋ باسقارماسىنىڭ ءبىرىنشى جارتى جىلدىقتى قورىتىندىلاۋعا ارنالعان القا وتىرىسىندا باسقارما باسشىسى قامالجان نادىروۆ اتقارىلعان جۇمىستار جايىنا ەسەپ بەردى.
دەنساۋلىق ساقتاۋ سالاسىن تسيفرلاندىرۋ كەڭەستىڭ وزەكتى ماسەلەلەردىڭ ءبىرى رەتىندە قارالدى. باسقارما باسشىسىنىڭ مالىمەتى بويىنشا بۇگىندە بارلىق مەديتسينالىق ۇيىم 100 پايىز ينتەرنەت جەلىسىنە قول جەتكىزگەن.
بارلىق ۆەدومستۆولىق مەديتسينالىق ۇيىمداردا مەديتسينالىق اقپاراتتىق جۇيەلەر ورناتىلعان. بارلىق پەرسونال – بۇل 8 مىڭنان استام ادام كومپيۋتەرلىك ساۋاتتىلىققا جانە مەديتسينالىق اقپاراتتىق جۇيەلەر جۇمىسىنا وقىتىلدى, – دەدى قامالجان نادىروۆ.
قۇجاتتاردى تسيفرلاندىرۋ ءناتيجەسىندە 780 مىڭنان استام مەديتسينالىق قۇجات ەلەكتروندىق فورماتقا اۋىستىرىلىپ, وسىلايشا استانالىقتاردىڭ 93 پايىزى ەلەكتروندىق دەنساۋلىق پاسپورتىن الدى.
قالامىزدا بالا تۋ كورسەتكىشى دە جوعارىلاپ كەلەدى. وسى جارتى جىلدىقتا 13 974 ءسابي دۇنيەگە كەلگەن, وتكەن جىلدىڭ وسى مەرزىمىمەن سالىستىرعاندا تۋ كورسەتكىشى 360 سابيگە ارتقان. وسى ارالىقتا 60 مىڭ سىرقات جان تەگىن ءدارى-دارمەكپەن قامتىلىپ, وتكەن جىلدىڭ وسى مەزگىلىمەن سالىستىرعاندا 10 مىڭ جانعا ارتقان.
ەلوردا مەديتسينا سالاسىنىڭ كەمشىن تۇستارى دا جەتەرلىك. مەملەكەتتىك باعدارلامانىڭ 36 كورسەتكىشىنەن انا ءولىمى, قاتەرلى ىسىكپەن سىرقات جاننىڭ بەس جىلدىق ءومىر ۇزاقتىعى, قاتەرلى ىسىكتەن ءولىم-ءجىتىم, تۋبەركۋلەزدەن ءولىم-ءجىتىم بويىنشا كورسەتكىشتەرى تومەن.
وتىرىس سوڭىندا استانا قالاسى اكىمىنىڭ ورىنباسارى ەرمەك امانشاەۆ ەلوردالىق ەمحانالار مەن اۋرۋحانالار بويىنشا ايتىلعان ەسكەرتۋلەردى جويۋ بويىنشا بىرقاتار ناقتى شارالار قابىلداۋدى ۇسىندى.
