كەشە بەيبىتشىلىك پەن كەلىسىم سارايىندا «جاس قانات-2017» جاس ورىنداۋشىلاردىڭ رەسپۋبليكالىق بايقاۋىنىڭ شىمىلدىعى ءتۇرىلدى. بيىل 26-مارتە ۇيىمداستىرىلعان ايتۋلى مۋزىكالىق شاراعا ەلىمىزدىڭ ءار ايماعىنان باس قالاعا جينالعان 14 ۇمىتكەر قاتىسۋدا. باس جۇلدە – «التىن قانات» يەگەرى ەرتەڭ انىقتالادى. استانا اكىمدىگىنىڭ قولداۋىمەن ءوتىپ كەلە جاتقان بيىلعى بايقاۋدى قالا اكىمىنىڭ ورىنباسارى ەرمەك امانشاەۆ اشىپ بەردى.
– «جاس قاناتتان» ونەر جولىنا العاشقى قادامدارىن باسقان ءبىرتالاي ونەرپازدار وسى كۇندەرى بۇكىل ەل تانيتىن, حالىق ماقتان تۇتاتىن بەلدى انشىلەرگە, ونەر قايراتكەرلەرىنە اينالدى. بۇگىنگى قاتىسۋشىلاردىڭ بارلىعى دا جەڭىسكە لايىق دەپ ويلايمىن. سىزدەر استانانىڭ ەڭ ۇلكەن ساحنالارىنىڭ بىرىنەن ونەر كوگىنە قانات قاققالى وتىرسىزدار. بۇل – ەلباسىنىڭ ەلىمىزدەگى جاس دارىنداردى قولداۋى وتە زور ەكەندىگىنىڭ ايعاعى. تەك قانا بويلارىڭىزداعى دارىندارىڭىزدى جارقىراتىپ كورە الساڭىزدار بولدى. سىزدەرگە اق جول تىلەيمىن! – دەدى ەرمەك امانشاەۆ.
جىلداعى داستۇرگە ساي استاناعا ەرتەرەك كەلگەن جاس تالاپكەرلەر ەلوردانى ارالاپ, «دۋمان» ويىن-ساۋىق ورتالىعىن قىزىقتادى. «جاس قانات» اللەياسىنا اعاش وتىرعىزدى.
بايقاۋدىڭ ەڭ جاس قاتىسۋشىسى الماتىلىق 15 جاسار توميريس جانعازينوۆاعا جەرەبە تارتۋ ءراسىمى كەزىندە قازاق كيەلى سانايتىن «7» سانى ءتۇستى. ياعني, ول ساحناعا جەتىنشى بولىپ كوتەرىلدى. «مەنىڭ ويىمشا, سانداردا تۇرعان ەشتەڭە جوق. ەڭ باستىسى, تالانتىمىزدى جارقىراتىپ كورسەتە الساق بولدى. بۇل جەردە ءاندى ورىنداۋ شەبەرلىگىمىز بەن حالىققا جەتكىزە الۋىمىز ۇلكەن ماڭىز اتقارادى. الايدا «7» – مەنىڭ ەڭ سۇيىكتى سانىم. سول ساندى سۋىرىپ العاندا شىن قۋاندىم» دەيدى ول.
قاتىسۋشىلاردىڭ ەڭ ۇلكەنى – اقتاۋ قالاسىنىڭ اتىنان قاتىسىپ وتىرعان 30 جاستاعى مانۋەل. العاشقى كۇنى ساحنادا ءبىرىنشى بولىپ شىمكەنتتىك دينا قانايبەكوۆا ونەر كورسەتتى. ال سول كۇنگى كەزەڭدى قاراعاندىلىق جانسايا نۇرماعانبەتوۆا تۇيىندەدى. سونداي-اق, قاتىسۋشىلاردىڭ اراسىندا تالدىقورعان, وسكەمەن, پەتروپاۆل, تاراز, پاۆلودار قالالارىنىڭ وكىلدەرى بار. استانالىقتار جاس ءانشى دجۋليا تولەۋحانعا جانكۇيەر بولا الادى.
بايقاۋ تاريحىنا شولۋ جاساساق, ول باستاۋ العالى قازىرگى ءبىرتالاي تانىمال ەسترادا انشىلەرىنىڭ تالانتتارىن اشىپ, ۇلكەن ساحناعا جولداما بەردى. وسى جولى دا مەدەۋ ارىنباەۆ, ەرلان كوكەەۆ, نۇرلان ابدۋللين, باقىت شاداەۆا, مارجان اراپباەۆا سىندى ونىڭ ءار جىلدارى لاۋرەاتى اتانعان انشىلەرگە بايقاۋعا قازىلىق ەتۋ كەزەگى بۇيىردى.
سونداي-اق, قازىلار القاسىنىڭ قۇرامىنا «جاس قانات» بايقاۋىنىڭ نەگىزىن قالاۋشى ءارى پروديۋسەرى مۇرات ەرعاليەۆ, «استانا وپەرا» تەاترىنىڭ ديريجەرى ابزال مۇحيتدينوۆ, پروفەسسور رايسا مۇساقوجاەۆا, «استانا وپەرا» تەاترىنىڭ باس حورمەيستەرى ەرجان ءداۋىتوۆ, «Kazakh TV» تەلەارناسىنىڭ باس پروديۋسەرى ايكۇمىس سەكسەنباەۆا كىردى.
وسىدان بەس جىل بۇرىن بايقاۋدىڭ باس جۇلدەسىن ديماش قۇدايبەرگەن يەلەندى. قىتايدا وتكەن «I am a Singer» بايقاۋىنا قاتىسىپ, تورتكۇل دۇنيەنى اۋزىنا قاراتقان ديماش «ازيانىڭ ۇزدىك ءانشىسى» دە اتاندى. ءانشىنىڭ الەمگە تانىلۋىنا «جاس قاناتتىڭ» دا وزىندىك اسەر-ىقپالى بولدى دەپ ويلايمىز. كىم بىلەدى, بايقاۋدىڭ بيىلعى قاتىسۋشىلارىن دا الدا سونداي بيىك كۇتىپ تۇرعان شىعار؟!
امانعالي قالجانوۆ
