مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا دەپارتامەنتى مەملەكەتتىك سەكتورعا تالانتتار پۋلىن ىزدەۋ جانە تارتۋ ماقساتىندا «جاس مەملەكەتتىك قىزمەتشىلەر مەكتەبىنە» ىرىكتەۋ جۇمىستارىن جۇرگىزدى.
– دارىندى, تالانتتى جانە بەلسەندى جاستاردى مەملەكەتتىك قىزمەتكە جۇمىسقا تارتۋ ماقساتىندا «جاس مەملەكەتتىك قىزمەتشىلەر مەكتەبى» جوباسى ىسكە اسىرىلىپ جاتىر. جاستار ءۇشىن بۇل جوبانىڭ بەرەرى مول. ماسەلەن, جوو-دا وقىپ جۇرگەن جاستار وسى جوبانىڭ كومەگىمەن مەملەكەتتىك قىزمەت سالاسىنا قاتىستى پايدالى اقپاراتتاردى ءبىلىپ, قىزمەتتىڭ جاۋاپكەرشىلىك جۇگىن سەزىنەتىن بولادى, – دەدى مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا دەپارتامەنتىنىڭ باس مامانى ابدىقاحار سلامقۇل.
استانا قالاسىنداعى تەحنيكالىق جانە كاسىپتىك ءبىلىم بەرەتىن وقۋ ورىندارى مەن جوعارى وقۋ ورىندارىنىڭ ءبىتىرۋشى تۇلەكتەرىنەن 90-نان استام ءوتىنىم ءتۇسىپ, ولار ماماندىقتارىنا سايكەس باعىتتارعا ءبولىندى.
جوبانىڭ ەكىنشى كەزەڭى «ەسسە جازۋ» ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قابىرعاسىندا ءوتتى. بۇل كەزەڭدە قاتىسۋشىلار تاقىرىپتار تىزبەسىنە سايكەس كولەمى 500 سوزدەن اسپايتىن ەسسە جازىپ, ءوز ءبىلىمىن سىنادى. بۇل كەزەڭنەن سۇرىنبەي وتكەن جوبا قاتىسۋشىلارى كەلەسى كەزەڭگە وتەدى. ءۇشىنشى كەزەڭ قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىندا جانە ونىڭ فيليالدارىندا دايىندىق باعدارلاماسىنان ءوتۋ مەن وندىرىستىك تاجىريبە كەزىندە تانىستىراتىن جوبا ازىرلەۋ بويىنشا جۇرگىزىلەدى.
