بۇگىن – ءبارىمىز اسىعا كۇتكەن 22-ءشى رەسپۋبليكالىق «جاس قانات»-2013 جاس ورىنداۋشىلار بايقاۋىنىڭ ناعىز تارتىستى كەزەڭى وتەتىن كۇن. ەلوردانىڭ بەيبىتشىلىك جانە كەلىسىم سارايىندا جالعاسىن تاۋىپ جاتقان بۇل ءدۇبىرلى دودانى جىلداعى ءداستۇر بويىنشا مادەنيەت جانە اقپارات مينيسترلىگى, استانا قالاسىنىڭ اكىمدىگى جانە «ازيا داۋىسى» ديرەكتسياسى ۇيىمداستىرىپ وتىرعاندىعىن ەسكەرتە كەتەيىك.
جالپى, الماتى قالاسىندا 1992 جىلدان بەرى وتكىزىلىپ كەلگەن جاس تالانتتارعا قولداۋ كورسەتەتىن مەملەكەتتىك جوبا 2001 جىلدان باستاپ ەلوردا ءتورىندە جالعاسۋدا. ونىڭ التىن, كۇمiس, قولا قاناتىنىڭ يەگەرلەرi سوڭعى شەشۋشى كۇنى انىقتالىپ, استانا كوگىندە تاعى ءۇش ونەرلى جۇلدىز جارقىرايتىن بولادى. قازىر وسى «جاس قانات» جەڭىمپازدارىنا كەرەمەت سىي ءمۇسىنىن جاساپ شىققان زەرگەر دە بەلگىلى بولدى. ول – الماتى قالاسى ورال تاڭسىقباەۆ اتىنداعى رەسپۋبليكالىق ساندىك-قولدانبالى ونەر كوللەدجىنىڭ 3-كۋرس ستۋدەنتى ايتجان تۇرلىعازى دەگەن ازامات.
«وقۋ ۇدەرىسى ءجۇرىپ جاتقان كەزدە ماعان «جاس قانات» جەڭىمپازدارىنا «قانات» ءمۇسىنىن جاساۋ ۇسىنىسى ءتۇسكەن بولاتىن.
بۇل – رەسپۋبليكالىق جاس ورىنداۋشىلاردىڭ بايقاۋى بولعاندىقتان, مەن دە ءبىر ءىرى جوباعا ءوز ۇلەسىمدى قوسايىن دەپ, ءبىردەن جۇمىسقا كىرىسىپ كەتتىم. سوندىقتان, ول مەن ءۇشىن جاۋاپكەرشىلىكتى ءىس بولدى دەسەم, قاتەلەسپەسپىن» دەيدى شەبەردىڭ ءوزى.
سونىمەن, ماۋسىمنىڭ 3-ءى كۇنى باس قالامىزدا وتەتىن بايقاۋعا ەلدىڭ ءار ايماعىنان 15 ءۇمىتكەر كەلدى. كەلىسىمەن ءبىر-ءبىرىمەن تانىسىپ, باعدارلاما بويىنشا استانانىڭ ەڭ تاماشا جەرلەرىن ارالاپ شىقتى. جىلداعى داستۇرگە جۇگىنىپ, ستيليست, شاشتاراز جانە ۆيزاجيستتەرمەن كەزدەستى. ەلوردانىڭ ۇزدىك شەبەرلەرى ولاردىڭ العاشقى ساحنالىق يميدجدەرىن قالىپتاستىرۋ ءۇشىن بەلسەندى ءتۇردە جۇمىس جاسادى. سول ساتتە ۇيىمداستىرۋشىلار دا جينالىس ءوتكىزىپ, ءۇمىتكەرلەردىڭ ءارقايسىسىمەن شىعارماشىلىق جۇمىس جاساي باستادى. كوپ جىلدار بويى بايقاۋدىڭ باس پروديۋسسەرى بولىپ كەلە جاتقان مۇرات ەرعاليەۆ پەن قويۋشى رەجيسسەر الەكساندر پونومارەۆ جاس ورىنداۋشىلارعا ساحنادا قالاي ءجۇرىپ-تۇرۋ كەرەكتىگىن تۇسىندىرە وتىرىپ, ءبارىنىڭ رەپەرتۋارلارىن تەكسەرىپ كوردى. بۇل جولى ءوز كەڭەستەرىن بەرسە, دايىندىق كەزىندە ءار قاتىسۋشىمەن جەكە جۇمىس ءىستەيتىندىكتەرىن ەسكەرتتى.
ال, ماۋسىمنىڭ 5-ءى كۇنى «دۋمان» ويىن-ساۋىق ورتالىعىندا جەرەبە تارتۋ ءراسىمى ءوتىپ, ءار قاتىسۋشى ءوزىنىڭ كونتسەرتتەگى رەتتىك سانىن ءبىلدى. ودان كەيىن, استانادا بولعاندارىن ەستە قالدىرۋ ءۇشىن «جاس قانات» اللەياسىنا جەكە-جەكە كوشەت وتىرعىزدى. بۇل ءداستۇردى ۇستانۋداعى باستى ماقسات – كەيىن استانادا قوناقتا بولعاندا نەمەسە گاسترولدىك ساپارلارمەن كەلگەندە, ولار وسى اللەياداعى ءوز كوشەتىنىڭ قالاي وسكەنىن كورەدى. ءسويتىپ, بولاشاق ونەر جولدارىنىڭ قالاي باستالعانىن ەستەرىنە ءتۇسىرۋى ءتيىس…
جىل وتكەن سايىن «جاس قاناتقا» قاتىسۋعا نيەت ءبىلدىرۋشىلەردىڭ قاتارى كاسىبي دايىندىقتان وتكەن ءانشىلەرمەن تولىعا تۇسكەنىن ەرەكشە اتاپ ءوتكەن ءجون. بۇل – كەلەشەكتە بايقاۋعا قاتىسۋعا تىلەك ءبىلدىرۋشىلەرگە قويىلاتىن تالاپ تا كۇردەلەنە بەرەدى دەگەن ءسوز. سونداي-اق, ىرىكتەۋ دەڭگەيى دە ءبىرتە-بىرتە جوعارىلاي ءتۇسپەك. ەرەجە بويىنشا قاتىسۋشىلاردىڭ ىشىنەن ءار كەزەڭ سايىن ۇپايى تومەن 5 ءانشى شىعىپ قالىپ وتىرادى. بۇل تۇرعىدا, «ءبىزدىڭ زامانىمىزدا ورىنداۋ تەحنيكاسىن جاقسى مەڭگەرۋ جانە كەرەمەت داۋىسقا يە بولۋ, ارينە, جەتكىلىكسىز. كورەرمەندى وزىنە تارتىپ, نازارىن اۋدارۋ ءۇشىن ساحنادا ساپالى ءارى تارتىمدى ونەر كورسەتۋ كەرەك. قازىلار القاسى دا جاس ورىنداۋشىلاردىڭ ءوز تالانتىن تولىعىراق تانىتۋعا سەپتىگىن تيگىزەر. بىراق, الدىن-الا ەسكە سالامىن, كورەرمەندەردەن جاساقتالعان قازىلاردىڭ شەشىمى كاسىبي قازىلار قويعان باعالارعا ەش اسەر ەتپەيدى. ولاردىڭ كوزقاراستارى ءبىر جەردەن شىعا ما, جوق پا, بۇل جاعى دا بەلگىسىز» دەدى مۇرات ەرعاليەۆ.
P.S. «جاس قانات» بايقاۋى جاس انشىلەردىڭ تۇتاس ءبىر تولقىنىن تاربيەلەپ, قازىرگى قازاق ەستراداسىنىڭ تانىمال وكىلدەرىنىڭ ونەردەگى جولىن اشتى دەسەك, قاتەلەسپەيمىز. وعان ۇلتىنا, ءبىلىمى مەن تۇرعان جەرىنە قاراماستان, 30 جاسقا دەيىنگى كەز كەلگەن تىلەك ءبىلدىرۋشى قاتىسا الادى. ەندى مىنە, كەشەگى كۇننەن باستاپ 22-ءشى مارتە جاستاردىڭ باق سىناۋىنا مۇمكىندىك بەرگەن شارا بۇگىن استانا تۇرعىندارى مەن قوناقتارىن تاعى دا قۋانتپاقشى. ال, ەرتەڭ وتەتىن سوڭعى سىندا ولاردى كوپتەگەن سىيلىقتار كۇتىپ تۇر.
ەركەعالي بەيسەنوۆ
ۋىز لەبىز
نازىمگۇل بولاتحان, تالدىقورعان قالاسى:
– جالپى, مەن استاناعا ءۇشىنشى رەت كەلىپ وتىرمىن. كەلگەن سايىن تاڭقالارلىق سەزىمگە بولەنەمىن. ال, «جاس قانات» بايقاۋىنا العاش قاتىسىپ جاتقاندىقتان, رەسپۋبليكالىق جاس ءانشىلەر سايىسىنا باراتىنىمدى كەنەتتەن ءبىلدىم. سول قۋانىشتى ساتتە پەتەربۋرگتە وتكەن سايىستا جۇرگەن ەدىم. ارىپتەستەرىم ماعان ساتتىلىك تىلەدى. سول جالىندى لەبىزدەرى بايقاۋ بارىسىندا كۇش بەرىپ, ماعان جەڭىس اكەلەدى دەگەن ويدامىن.
الديار ەرعالي, كوكشەتاۋ قالاسى:
– مۇرات ەرعاليەۆ ايتىپ كەتكەندەي, ناعىز ءارتىس تەك ءاندى ورىنداپ قانا قويماي, سونىمەن قاتار, بەلگىلى ءبىر وبراز قالىپتاستىرا ءبىلۋى قاجەت. اۋەندى جان-ءدۇنيەڭدى سالا وتىرىپ ورىنداعان دۇرىس. مەن كوپشىلىك الدىندا ءان ايتقاندى جاقسى كورەمىن. ءار ءانشىگە كورەرمەن – ەڭ باستى فاكتور بولىپ سانالادى. سوندىقتان, ساحناعا شىققاندا مەن بار ونەرىمدى كورسەتۋگە تىرىسامىن.
رۋسلان يسمايىلوۆ, جەزقازعان قالاسى:
– بۇل – مەنىڭ ومىرىمدەگى العاشقى كۇردەلى سىناق. قاتتى قوبالجۋدامىن. وسى بايقاۋعا جول ءسىلتەپ, قولداۋ كورسەتكەن دوسىما ءارى پروديۋسەرىمە شەكسىز العىس ءبىلدىرەمىن. ول – 2009 جىلعى «جاس قانات» قاتىسۋشىسى ماحامبەت قاراتاي دەگەن ازامات. بايقاۋعا ءبىر-ەكى ايداي قىزۋ دايىندالدىق. «تەك قانا العا!» دەگەن ءومىردەگى ۇرانىما جۇگىنە وتىرىپ, استاناعا العاش رەت كەلىپ وتىرعانىما قۋانىشتىمىن. مەن ويلاعانداي عاجايىپ قالا ەكەن.
