ەل ىرگەسى بەكىگەنىنىڭ بەلگىسىندەي بولعان تاۋەلسىزدىكتىڭ 25 جىلدىعى تويلانعان كۇنى استانادا العاش رەت دروندار جارىسى ۇيىمداستىرىلدى. ۇلتتىڭ ۇلىق مەرەكەسى قارساڭىندا وتكىزىلگەن «Drone Racing Kazakhstan» اتتى ءبىرىنشى رەسپۋبليكالىق چەمپيونات – دامۋدىڭ تاعى ءبىر ايعاعى. وسىنداي باستامالارمەن وتاندىق روبوتوتەحنيكا ءورىسى كەڭي تۇسپەك.
قازاقستاننىڭ ءار وڭىرىنەن كەلگەن 50-گە جۋىق قاتىسۋشى «بارىس ارەنا» مۇز سارايىندا باس قوستى. ايتۋلى شارانىڭ اشىلۋىنا استانا اكىمى اسەت يسەكەشەۆ ارنايى كەلىپ, باق سىناۋشىلارعا ساتتىلىك تىلەدى.
– بۇگىن ءبىزدىڭ بالالاردىڭ اراسىنداعى نوۆاتورلاردىڭ, روبوتوتەحنيكتەردىڭ, ونەرتاپقىشتاردىڭ قوزعالىسىنا جول سالاتىن ەكى ماڭىزدى چەمپيوناتتىڭ ءوتىپ جاتقانى قۋانتادى. بۇل جارىستارعا 200-دەن اسا ادام قاتىسۋدا. روبوتوتەحنيكادان تۋرنيرگە 160 دارىندى بالا كەلىپ, جاقسى جوبالارى مەن ونەرتابىستارىن تانىستىردى. دروندار جارىسى دا يننوۆاتسيالىق چەمپيونات سانالادى. وسى تۋرنيرلەردى جىل سايىن وتكىزەتىن بولامىز. بيىل ءبىز روبوت قۇراستىرۋشى ۇزدىكتەر ءۇشىن 1 ملن 300 مىڭ تەڭگە كولەمىندە ارنايى جۇلدە تاعايىندادىق. ءبىز بۇل ىلگەرىلەۋدى قولدايمىز جانە كەلەسى جىلى ەلوردانىڭ 42 مەكتەبىندە روبوتوتەحنيكا سىنىپتارىن دايىندايمىز, – دەدى ەلوردا باسشىسى اسەت يسەكەشەۆ.
بۇل وركەنيەت زامانىنداعى بۇگىنگىنىڭ «بايگەسى» ىسپەتتى. درونداردى دايىنداپ, سايگۇلىك سياقتى بايگەگە قوسسا, ولاردى باسقارۋشىلار – شاباندوزدار. وسى ونەرتاپقىشتاردىڭ جارىسى ءۇشىن ۇلتتىق ناقىشتاعى ايرىقشا تراسسا ورناتىلدى. قاتىسۋشىلار دروندارىن بەينەكوزىلدىرىكتىڭ كومەگىمەن باسقاردى.
جارىس جۇيرىكتەرىن روبوتوتەحنيكا سالاسىنىڭ بىلگىرلەرى انىقتادى. اتاپ ايتساق, تەحنيكا عىلىمدارىنىڭ دوكتورى سابىرجان اتانوۆ, «قازاقستان اۆياتسيالىق يندۋستريا» جشس-ءنىڭ پيلوتسىز ۇشۋ اپپاراتتارى ءبولىمىنىڭ باسشىسى جانتۋ-يبراگيم ماماشەۆ, «قازروبوتيكس» قازاقستاندىق ءبىلىم بەرۋ جانە سپورتتىق روبوتوتەحنيكا فەدەراتسياسى» رەسپۋبليكالىق قوعامدىق بىرلەستىگى پرەزيدەنتى ايجان جەكەەۆا, نازارباەۆ ۋنيۆەرسيتەتىنىڭ روبوتوتەحنيكا دەپارتامەنتى زەرتتەۋشىسى التاي جاقاتاەۆ جانە «UAV Center KZ» ۇشۋ اپپاراتتارىن قۇراستىرۋشى ينجەنەر ۆيتالي گروو تورەلىك ەتتى.
يننوۆاتسيالىق جارىستى ۇيىمداستىرۋعا مۇرىندىق «قازاقستان ينجينيرينگ» ۇك» اق-نىڭ باسقارما ءتوراعاسى ورىنباسارى اناتولي پيگورەۆ روبوتوتەحنيكانىڭ وقۋشىلاردىڭ ومىرىنە دەندەپ ەنىپ كەلە جاتقانىن, سول ءۇشىن بالالارعا قوسىمشا ءبىلىمنىڭ قاجەت ەكەنىن, بۇل سالانىڭ ەلىمىزدە دامۋىنا بارىنشا جاعداي جاسالۋ كەرەكتىگىن اتاپ ءوتتى.
سونىمەن, ءبىر كۇن بۇرىن ىرىكتەۋ تۋرى ءوتىپ, سەگىز جۇيرىك تاڭدالدى. ونىڭ اراسىنداعى ءتورت ۇزدىگى فينالدا ءوزارا باسەكەگە ءتۇستى. ناتيجەسىندە ءۇشىنشى ورىندى دانيل دروزدوۆ پەن ەربول تولەباەۆ الدى. ولاردىڭ ارقايسىسىنىڭ جۇلدەسى 300 مىڭ تەڭگەنى قۇرادى. ەكىنشى بولىپ كەلگەن داۋرەن تولەۋوۆكە 500 مىڭ تەڭگە تابىستالدى. ال بارىنەن جۇيرىك شىققان اندرەي مانكوعا تاعايىندالعان باس جۇلدە – ءبىر ميلليون تەڭگە.
مۇنداي ەل بىرىنشىلىكتەرىندە جەڭىمپاز بولعاندارعا قازاقستان ۇلتتىق قۇراماسىنا ەنىپ, حالىقارالىق دودالاردا ونەر كورسەتۋىنە مۇمكىندىك مول.
بۇعان قوسا, بۇل چەمپيونات اياسىندا «Drone Expo Kazakhstan-2016» اتتى پيلوتسىز باسقارىلاتىن ۇشۋ اپپاراتتارىنىڭ كورمەسى ۇيىمداستىرىلدى. قىزىعۋشىلىق تانىتقاندار درونداردىڭ نەشە تۇرىمەن تانىسىپ, شەبەرلىك ساباقتارىنا قاتىستى.
ورىنبەك وتەمۇرات
