كەشە استانا قالاسىنىڭ كوممۋنيكاتسيالار قىزمەتى الاڭىندا قالا اكىمدىگىنىڭ «جاستار» تەاترى ديرەكتورىنىڭ ورىنباسارى ەربولات ەلۋباي ونەر وشاعىنىڭ قىزمەتى تۋرالى ءباسپاسوز ءماسليحاتىن وتكىزدى.
– «جاستار» تەاترى – سان قىرلىلىعى جانە جاڭاشىلدىعىمەن قازاق تەاترى ونەرىندە ءوزىنىڭ ورنىن ايشىقتى تۇردە بەلگىلەگەن, جاس تا بولسا, جاسامپاز ونەر وردالارىنىڭ ءبىرى. تەاتر ساحناسىندا كورەرمەنگە ۇسىنىلار قويىلىمدار جوعارى كوركەمدىك دەڭگەيىمەن, الەمدىك تەاتر ونەرى جەتىستىكتەرىن يگەرۋمەن ەرەكشەلەنەدى. سوڭعى ۋاقىتتا «جاستار» تەاترى ميۋزيكل جانرىنا اۋىسقان بولاتىن. ونىڭ ەرەكشەلىگى – وقيعا جەلىسىن ارەكەتكە, قيمىلعا سالىپ ىقشامداپ جەتكىزۋ. جاتتاندى ءسوزدى شۇباتىپ تۇرعاننان گورى ارەكەت ارقىلى ءتۇسىندىرۋ كوپشىلىكتىڭ نازارىن اۋدارتىپ, قابىلداۋىنا جەڭىل بولادى, – دەدى سپيكەر.
ونىڭ ايتۋىنشا, اتالمىش تەاتر 2007 جىلدىڭ 5 شىلدەسىندە شىڭعىس ايتماتوۆ پەن ءابىش كەكىلبايۇلىنىڭ «شىڭعىسحان» سپەكتاكلىمەن (ينستسەنيروۆكا اۆتورى – جانىش قۇلمامبەتوۆ, قويۋشى رەجيسسەرى – نۇرقانات جاقىپباي) اشىلدى. 16 جىلدىق تاريحىندا حالىقارالىق جانە رەسپۋبليكالىق بايقاۋلاردان 14 باس جۇلدەنى يەلەندى. بۇگىندە رەپەرتۋارىندا 55-گە تارتا سپەكتاكل بار. تەاتر اكتەرلەرىنىڭ 99 پايىزى – ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەكتەرى, تەاتردىڭ نەگىزىن قالاۋشى قازاقستاننىڭ ەڭبەك سىڭىرگەن قايراتكەرى, اباي اتىنداعى مەملەكەتتىك سىيلىقتىڭ لاۋرەاتى نۇرقانات جاقىپبايدىڭ شاكىرتتەرى.
ونەر ۇجىمى وڭتۇستىك كورەيا مەملەكەتىندە ازيا ەلدەرى بويىنشا ەڭ ءىرى ءحىى حالىقارالىق ميۋزيكل فەستيۆالىنە ع.مۇسىرەپوۆتىڭ «جىبەك» ميۋزيكلىمەن قاتىستى. ميۋزيكل جانرى دامىعان فرانتسيا, رەسەي, ۇلىبريتانيا, چەحيا, قىتاي, كورەيا, تايۆان سىندى ءىرى مەملەكەتتەرمەن قاتار, ونەر كورسەتۋ جاس ۇجىم ءۇشىن ۇلكەن مارتەبە ءارى باعا جەتپەس تاجىريبە بولدى.
استانانىڭ مادەنيەتىن دامىتىپ, شەتەلدەردە باس قالانى اسقاقتاتقانى ءۇشىن ونەر ورداسى «ەلوردا جۇلدىزى» سىيلىعىن يەلەنگەن.
بيىلعى جارتى جىل ىشىندە تەاتر 77 سپەكتاكل قويىپ, 144-تەن استام ءىس-شارا وتكىزدى. سونىڭ ىشىندە 105-تەن استامى قويىلىم بولسا, بىرلەسكەن شارالار سانى 39-دان اسادى. ونەر ورداسىنىڭ قويىلىمدارىن 32 مىڭنان استام كورەرمەن, ال قايىرىمدىلىق شارالارى اياسىندا 2500 كورەرمەن تاماشالادى.
«جاستار» تەاترى جانىندا «قاناتتىلار» ينكليۋزيۆتى تەاترى اشىلعان. بۇل ونەر ورداسى ەكى جىلداي بۇرىن كورنەكتى اقىن, مەملەكەتتىك سىيلىقتىڭ لاۋرەاتى گۇلنار سالىقبايدىڭ «قاناتتىلار» مۋزىكالىق-پوەتيكالىق قويىلىمىمەن شىمىلدىعىن ءتۇردى. سودان بەرى دە ارادا بىرنەشە سپەكتاكل ۇسىندى. سونىڭ ىشىندە كورنەكتى جازۋشى-دراماتۋرگ, اباي اتىنداعى مەملەكەتتىك سىيلىقتىڭ يەگەرى روزا مۇقانوۆانىڭ شىعارماسى جەلىسىمەن ساحنالانعان «قىزجىلاعان» سپەكتاكلى كورەرمەننىڭ ىستىق ىقىلاسىنا بولەندى. جالپى ينكليۋزيۆتى تەاتر فيزيولوگيالىق ەرەكشەلىكتەرى بار ادامداردىڭ تالانتىن اشۋعا زور مۇمكىندىك تۋدىرىپ وتىر.
الداعى جاڭا ماۋسىمدا قازاق ادەبيەتىنىڭ كوزى ءتىرى كلاسسيگى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك ەرى اكىم ءتارازيدىڭ 90 جاس مەرەيتويىنا وراي اتالمىش تەاتردا قالامگەردىڭ «جولى بولعىش جىگىت» دراماسىن رەجيسسەر نۇرفات ۆاحيتوۆ ساحنالاماق. نۇرقانات جاقىپباي «دون كيحوت» قويىلىمىن قويادى.
