ەلوردا – ستۋدەنتتەر مەن جاستار قالاسى. ياعني بولاشاق زياتكەرلىك ورتا وسى قالادا قالىپتاسىپ جاتقانى انىق. قالاداعى ورتا مەكتەپ سانى 1997 جىلى 46 بولسا, بۇگىندە 149 مەكتەپ بار. ونىڭ ىشىندە 99 مەملەكەتتىك جانە 43 جەكە, 7 رەسپۋبليكالىق مەكتەپ. ەلوردانىڭ قارقىندى دامۋى, حالىقتىڭ تۋ دەڭگەيى مەن ىشكى كوشى-قونى وقۋشىلار سانىنىڭ ارتۋىنا اكەلدى. ماسەلەن, 1997 جىلى مەكتەپتەردە 45,4 مىڭ وقۋشى ءبىلىم السا, بۇگىندە كونتينگەنت 215 مىڭنان اسادى.
ارنايى قوسىمشا ۇيىرمەلەرگە بارۋعا جاعداي جاسالعان. سونىڭ ىشىندە زاماناۋي ستيلدە, قاجەتتى تەحنيكالارمەن جابدىقتالعان وقۋشىلار سارايىن ايتا الامىز. بۇدان بولەك, بيىل بالالار جىلىنا وراي «Sana», «Tanym» كرەاتيۆتى جانە «ءبىلىم-پارك» شىعارماشىلىق ورتالىعى اشىلدى. بۇل ورتالىقتارعا بوس ۋاقىتىندا مەكتەپ وقۋشىلارى تەگىن قاتىسا الادى.
ەلورداداعى بالاباقشالار سانى دا جىل سايىن ارتىپ كەلەدى. ماسەلەن, 1997 جىلى استانادا 36 بالاباقشا بولعان. بۇگىندە ەلوردادا 56 مىڭ بالاعا ارنالعان ءتۇرلى تيپتەگى 430 مەكتەپكە دەيىنگى ۇيىم جۇمىس ىستەيدى. ونىڭ ىشىندە 100 مەملەكەتتىك جانە 272 (ونىڭ ىشىندە 262-دە مەملەكەتتىك ءبىلىم بەرۋ تاپسىرىسى بويىنشا) جەكەمەنشىك بالاباقشا بار. دەگەنمەن بالاباقشالار سانىنىڭ قارقىندى وسۋىنە قاراماستان, ورىن جەتىسپەۋشىلىگى ماسەلەسى ەلوردالىقتار ءۇشىن ءالى دە وزەكتى. مۇنىڭ ءوزى استاناداعى بالا تۋ كورسەتكىشى مەن كوشىپ كەلىپ جاتقان جاس وتباسىلار قاتارىنىڭ قانشالىقتى قارقىندى ەكەندىگىن كورسەتەدى.
استاناداعى ەڭ بەلسەندى جاستار توبىنىڭ ءبىرى – ستۋدەنتتەر. ارمان قۋىپ كەلگەن ءاربىر مەكتەپ تۇلەگى استانادا مىقتى مامان اتانۋدى ماقسات تۇتادى. بۇگىندە نۇر-سۇلتان قالاسىندا 16 جوو بار جانە رەسپۋبليكا بويىنشا ەل ستۋدەنتتەرىنىڭ 10 پايىزدان استامى باس قالادا ءبىلىم الىپ جاتىر.
قالامىزدا تەحنيكالىق جانە كاسىپتىك ءبىلىم بەرەتىن 35 كوللەدج بار. كوللەدجدەردەگى ستۋدەنتتەر سانى 1997 جىلى 6,5 مىڭ بولسا, بۇگىندە كونتينگەنت 34 مىڭعا جۋىق ستۋدەنتتى قۇرايدى.
