Nomad City Hall كونتسەرت زالىندا ەلوردالىق جوعارى وقۋ ورىندارىنىڭ ستۋدەنتتەرى اراسىندا وتەتىن «Jastar jalyny-2021» فەستيۆالىنىڭ سالتاناتتى اشىلۋ ءراسىمى ءوتتى.
فەستيۆال بارىسىندا 11-18 قازان ارالىعىندا ستۋدەنتتەر 10 نوميناتسيا بويىنشا سايىسقا تۇسەدى. اتالمىش شارانى نۇر-سۇلتان قالاسى جاستار ساياساتى ماسەلەلەرى باسقارماسىنىڭ قولداۋىمەن قازاقستان جاستار فراكتسياسى وتكىزۋدە.
«ءبىز «Jastar jalyny» فەستيۆالىن جىلدىڭ باسىنان بەرى جوسپارلادىق. دەگەنمەن ىندەتكە بايلانىستى كەيىنگە شەگەرە تۇرۋعا تۋرا كەلدى. بۇگىن دە كارانتين رەجيمىن قاتاڭ ساقتاۋ ءۇشىن زالعا كوپ ادام جينامادىق. وسى ورايدا قالامىزدىڭ 15 جوو-دان 10 ادامنان كوپ ەمەس جاستاردى جينادىق. باستى ماقساتىمىز – جاستاردىڭ اراسىندا شىعارماشىل جانداردى كورسەتۋ. جانە سولاردىڭ اراسىنان دارىندى جانە تالانتتى جاستاردى انىقتاپ, ولاردى قولداۋ جانە جاردەم كورسەتۋ. ەڭ باستى ايتا كەتەتىنىم, فەستيۆالگە قاتىسۋشى بارلىق ستۋدەنتتەر ۆاكتسينا العان» دەدى نۇر-سۇلتان قالاسى جاستار ساياساتى باسقارماسىنىڭ باسشىسى قايرات قامباروۆ.
باستى جۇلدە قورى – 500 مىڭ تەڭگە, قالعان جەڭىمپازدارعا 100-200 مىڭ تەڭگەدەن بەرىلەدى. «Jastar jalyny-2021» فەستيۆالىنىڭ قازىلار القاسى ەلىمىزدىڭ ەڭ تاجىريبەلى ماماندارىنان جاساقتالعان. باعدارلامانى مادەنيەت جانە ونەر قايراتكەرلەرى, ەلىمىزدىڭ ەڭبەك سىڭىرگەن ارتىستەرى, كاسىبي حورەوگرافتار مەن ۆيدەوگرافتار باعالايدى.
