تاۋەلسىزدىك سارايىندا تۇڭعىش رەت «جاڭا بەلەس – 2017» جاستار بالى ءوتتى. وعان استاناداعى جوعارى وقۋ ورىندارى مەن كوللەدجدەردىڭ ەكى مىڭعا جۋىق ستۋدەنتى قاتىستى. شارانى «رۋحاني جاڭعىرۋ» باعدارلاماسى اياسىندا قالالىق جاستار ساياساتى ماسەلەلەرى باسقارماسى ۇيىمداستىردى.
الدىمەن ءسوز العان قر پارلامەنتى ءماجىلىسىنىڭ دەپۋتاتى گەننادي شيپوۆسكيح, «نۇر وتان» پارتياسى قالالىق فيليالى توراعاسىنىڭ ورىنباسارى ۆلاديسلاۆ سەرگەەۆ جاستاردى تۇڭعىش پرەزيدەنت كۇنىمەن قۇتتىقتاپ, جاستارعا ساتتىلىك تىلەدى. ولار استانا تەك عيماراتتارىمەن عانا ەمەس, جاستارىمەن دە كورىكتى ەكەنىن اتاپ ءوتتى.
«استانا اكىمى اسەت يسەكەشەۆ قالا جاستارىنىڭ يدەيالارىن, ۇسىنعان جوبالارىن ارقاشاندا قولداۋعا دايىن. «جاڭا بەلەس-2017» بالى ءبىزدىڭ «ا14» جوباسى بويىنشا جۇزەگە اسىپ جاتىر. «ا14» جوباسىنا استانانىڭ جوعارى وقۋ ورىندارىنىڭ جاستار ءىسى بويىنشا كوميتەتىنىڭ باسشىلارى كىرىپ وتىر. ولار – جاس كوشباسشىلار, وسى كەشتىڭ سەبەپكەرلەرى. بۇل بال داستۇرگە اينالىپ, كەلەسى جىلى دا جالعاسادى» دەدى قالالىق جاستار ساياساتى ماسەلەلەرى باسقارماسىنىڭ باسشىسى اسحات ورالوۆ.
كەش بارىسىندا ستۋدەنتتىك بيلەتتەر تاپسىرىلدى. نازارباەۆ ۋنيۆەرسيتەتىنىڭ ءبىرىنشى كۋرس ستۋدەنتى يبراگيم سەۆەتبەكوۆ پەن «استانا» مەديتسينا ۋنيۆەرسيتەتىنىڭ ستۋدەنتى نيگينا مەكەنباەۆاعا سالتاناتتى تۇردە تابىس ەتىلدى.
كلاسسيكالىق مۋزىكا ىرعاعىمەن بيلەگەن جاستار الدىندا سونداي-اق, مارجان اراپباەۆا, اعايىندى جۇگىنىسوۆتەر جانە وزگە دە انشىلەر ءان سالدى.
امانعالي قالجانوۆ
