ءال-فارابي اتىنداعى وقۋشىلار سارايىندا «WorldSkills Astana-2024» ەلوردالىق جاستار كاسىبي شەبەرلىك چەمپيوناتى ءوتىپ جاتىر.
سالتاناتتى ءبولىمدى ەلوردانىڭ ءبىلىم باسقارماسىنىڭ باسشىسى قاسىمحان سەنعازىەۆ اشتى. ول قاتىسۋشىلاردى قۇتتىقتاپ, جەڭىس تىلەدى.
قۇتتىقتاۋ سوزىنەن كەيىن ەرىكتىلەر چەمپيوناتتى باستاۋ باتىرماسىن الىپ شىقتى. ونى باسۋدىڭ قۇرمەتتى قۇقىعى 2023 جىلعى وڭىرلىك چەمپيوناتتىڭ جەڭىمپازدارى – ەلوردالىق قوعامدىق تاماقتانۋ جانە سەرۆيس كوللەدجىنىڭ «اسپاز ءىسى» بويىنشا ۇلتتىق چەمپيوناتتىڭ جۇلدەگەرى الەكساندرا كولپاكوۆاعا جانە Astana Polytechnic جوعارى كوللەدجىنىڭ «جەلىلىك جانە جۇيەلىك اكىمشىلەندىرۋ» بويىنشا كۇمىس جۇلدەگەرى دانيل لاپەنكوعا بەرىلدى.
سونداي-اق, استانا قالاسى ءبىلىم باسقارماسىنىڭ تەحنيكالىق جانە كاسىپتىك ءبىلىم بەرۋ ءبولىمىنىڭ باسشىسى اقمارال حون قۇتتىقتاۋ سوزىندە بيىلعى چەمپيوناتقا كوللەدجدەردىڭ 280 ستۋدەنتىنەن بولەك مەكتەپ وقۋشىلارى دا باق سىنايتىنىن, ولار Jasskills قوزعالىسىنا قاتىساتىنىن اتاپ ءوتتى.
«جارىستى 200-دەن استام ساراپشى باعالايدى. سونىمەن قاتار, WorldSkills Astana 2024 قالالىق چەمپيوناتى اياسىندا Deafskills ەستۋ قابىلەتى بۇزىلعان بالالار اراسىندا Abilympics مۇمكىندىگى شەكتەۋلى وقۋشىلار ءۇشىن كاسىبي شەبەرلىك كونكۋرستارى وتەدى. 16-28 مامىر ارالىعىندا ەلوردالىق كوللەدجدەردىڭ 15 الاڭىندا كوشباسشىلار انىقتالادى. 29 مامىردا چەمپيوناتتىڭ جابىلۋىن وتكىزەمىز, وندا جەڭىمپازدارعا جۇلدەلەر, گراموتالار, ديپلومدار تابىستالادى. سودان كەيىن كۇزدە وتەتىن رەسپۋبليكالىق چەمپيوناتقا دايىندىق باستالادى» دەدى اقمارال حون.
VIII WorldSkills Kazakhstan 2023 رەسپۋبليكالىق چەمپيوناتىنىڭ التىن جۇلدەگەرى الەكساندرا كولپاكوۆا بۇل چەمپيوناتتىڭ ءوز ومىرىنە قانشالىقتى وزگەرىس ەنگىزگەنىن ايتىپ بەردى.
«چەمپيونات ماعان باعا جەتپەس تاجىريبە, جاڭا تانىستار, ءبىلىم جانە كەرەمەت ەموتسيالار سىيلادى. باسەكەلەستەرىم مىقتى بولدى. ءوزىم ءۇشىن كوپتەگەن ءدارىس وتكىزدىم, كەمشىلىكتەرىم مەن ارتىقشىلىقتارىمدى ءتۇسىندىم, ءالسىز جانە كۇشتى جاقتارىمدى ەسەپتەدىم. ماعان سەنگەن جانە كەرەمەت ناتيجەگە قول جەتكىزۋگە كومەكتەسكەندەردىڭ بارلىعىنا العىس ايتقىم كەلەدى» دەپ ءبولىستى الەكساندرا كولپاكوۆا.
ال Astana Polytechnic جوعارى كوللەدجىنىڭ ءۇشىنشى كۋرس ستۋدەنتى ءامىرحان جۇسىپبەكوۆ «مەحاترونيكا» بويىنشا قاتىسىپ جاتىر. وتكەن جىلى ول كوماندامەن بىرگە ەكىنشى ورىنعا يە بولعان. ءامىرحان بيىل جەڭىسكە جەتۋدى جوسپارلاپ, باعدارلاماشى بولۋدى ارماندايدى.
«مەحاترونيكا – بۇل اقىلدى جانە اۆتوماتتاندىرىلعان جۇيەلەردى قۇرۋ ءۇشىن ينجەنەريانىڭ تۇرلەرىن بىرىكتىرەتىن سالا. ادەتتە, ول ادامنىڭ كومەگىنسىز قوزعالاتىن, قورشاعان ورتاعا جاۋاپ بەرەتىن جانە ءارتۇرلى تاپسىرمالاردى ورىنداي الاتىن زاتتاردى جاساۋ ءۇشىن قولدانىلادى. بۇل, مىسالى, وندىرىستەگى روبوتتار, اۆتوموبيلدەردەگى اۆتوماتتى باسقارۋ جۇيەلەرى نەمەسە ءتىپتى ۇيدەگى اقىلدى تەرموستات نەمەسە روبوت شاڭسورعىش سياقتى اقىلدى قۇرىلعىلار بولۋى مۇمكىن» دەدى ءامىرحان.
WorldSkills – قاۋىمداستىقتىڭ قۇرامىنا كىرەتىن الەمنىڭ 80-نەن استام ەلىندە تارالعان حالىقارالىق قوزعالىس. ونىڭ نەگىزگى ماقساتى – جۇمىسشى ماماندىقتارىنىڭ مارتەبەسىن ارتتىرۋ جانە ناسيحاتتاۋ.
2014 جىلى قازاقستان WorldSkills قوزعالىسىنا قاتىسقان 70-ەل بولدى. 2015 جىلى جۇمىسشى ماماندىقتارى بويىنشا ءبىرىنشى قالالىق چەمپيوناتقا 5 قۇزىرەت بويىنشا 6 ستۋدەنت قاتىستى, بيىل 48 قۇزىرەت بويىنشا 292 قاتىسۋشى ءوتىنىم بەردى.
وتكەن جىلى وتكىزىلگەن رەسپۋبليكالىق چەمپيوناتتىڭ قورىتىندىسى بويىنشا استانالىقتار ەكى التىن, ءتورت كۇمىس, ەكى قولا جەڭىپ الىپ, 18 جۇلدەلى ورىنعا يە بولدى.
