الماتى قالاسىندا وتكەن قازاقستاننىڭ حالىق ءارتىسى رايىمبەك سەيتمەتوۆتىڭ تۋعانىنا 80 جىل تولۋىنا جانە استانانىڭ 20 جىلدىعىنا ارنالعان قازاقستان دراما تەاترلارىنىڭ ءححVى رەسپۋبليكالىق فەستيۆالىندە استانالىق «جاستار» تەاترى «ۇزدىك قويىلىم» اتالىمىندا باس جۇلدەنى يەلەندى.
وتكەن كوكتەمدە اتالمىش ونەر ۇجىمى عاشىقتار كۇنىنە وراي «قىز جىبەك» ميۋزيكلىنىڭ پرەمەراسىن وتكىزدى. وسى اتتاس ميۋزيكل «استانا ميۋزيكل» تەاترىنىڭ رەپەرتۋارىندا دا بار. سوندىقتان جاستارلىقتار اتاۋىن «جىبەك» بولىپ وزگەرتتى. تەاتر فەستيۆالىنە ولار ءدال وسى قويىلىممەن قاتىستى.
ميۋزيكلدىڭ نەگىزىنە كلاسسيك جازۋشى عابيت مۇسىرەپوۆتىڭ ليبرەتتوسى مەن ەۆگەني برۋسيلوۆسكيدىڭ مۋزىكاسى الىنعانىن ەستەرىڭىزگە سالا كەتەيىك. مۋزىكانى جاڭا زامانعا ساي ەربولات قۇدايبەرگەن مەن جانداۋلەت باتاي وڭدەپ, تۋىندى فولكلورلىق روك ستيلىندە كورەرمەندەرگە جول تارتقان. ال شىعارمانى اتالمىش تەاتردىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى نۇرقانات جاقىپباي ساحنالادى.
جالپى, فەستيۆالگە توعىز تەاتر قاتىستى. سونىڭ ىشىندە استانالىق تاعى ءبىر ونەر ۇجىمى – م.گوركي اتىنداعى مەملەكەتتىك اكادەميالىق ورىس دراما تەاترىنىڭ اكتريساسى اناستاسيا ۆورونتسوۆا «ۇزدىك ايەل ادام بەينەسى» اتالىمىندا توپ جاردى.
