استانادا «رۋحاني جاڭعىرۋ» باعدارلاماسى اياسىندا ءماشھۇر ءجۇسىپ كوپەيۇلى مەن شاكارىم قۇدايبەردىۇلىنىڭ 160 جىلدىق, حالەل دوسمۇحامەدۇلىنىڭ 135 جىلدىق, امىرە قاشاۋباەۆتىڭ 130 جىلدىق جانە استانا قالاسىنىڭ 20 جىلدىق مەرەيتويىنا وراي «جاستىق شاق كوك سەمسەردىڭ ءجۇزى ەمەس پە؟!» اتتى جاس اقىنداردىڭ رەسپۋبليكالىق ايتىسى ءوتتى.
ل. گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن «قازاقستاندىق سالالىق ءبىلىم جانە عىلىم قىزمەتكەرلەرىنىڭ كاسىپتىك وداعى» قوعامدىق بىرلەستىگى ۇيىمداستىرعان جىر دوداسىن اقىن, عالىم سەرىكزات دۇيسەنعازى جۇرگىزىپ وتىردى.
بەلگىلى ايتىسكەر, قازاقستاننىڭ ەڭبەك سىڭىرگەن قايراتكەرى, پروفەسسور امانجول ءالتاي توراعالىق ەتكەن قازىلار القاسىنىڭ قۇرامىنا يرانعايىپ كۇزەمباەۆ, مۇحتار نيازوۆ, تالانت ارعىنعالي سىندى ايتىستىڭ ءوز ادامدارى, الاشتانۋشى عالىم ساعىمباي جۇماعۇلوۆ, «قازاقستاندىق سالالىق ءبىلىم جانە عىلىم قىزمەتكەرلەرى كاسىپوداعى» قب ءتورايىمى مايرا تۇرعانقىزى كىردى.
ايتىسقا باس-اياعى 12 اقىن قاتىستى. سەرىكزات دۇيسەنعازىنىڭ ايتۋىنشا, «ءسوز بارىمتاسىنا» ەلىمىزدەگى ەڭ تالانتتى جاستار ىرىكتەلىپ, شاقىرىلدى. قورىتىندىسىندا باس جۇلدەنى (500 مىڭ تەڭگە) قىزىلوردالىق سىرىم ادىلبەك جەڭىپ الدى. ءبىرىنشى ورىندى (300 مىڭ تەڭگە) قاراعاندىلىق نۇرمۇحاممەد بايسۇگىروۆ يەلەندى. ەكىنشى ورىن جۇلدەسىن (200 مىڭ تەڭگەدەن) ەكىباستۇزدىق بەكسۇلتان قايدار مەن اقتوبەلىك ءاليحان جاقسىلىق ءبولىستى. ال ءۇشىنشى ورىن قىزىلوردالىق بەكجان ەرجىگىت, استانالىق ابدراۋف ورال جانە تۇركىستاندىق رىسگۇل ماناربەكقىزىنا بۇيىردى. ولاردىڭ ارقايسىسىنا 100 مىڭ تەڭگەدەن بەرىلدى. سونداي-اق, پاۆلودارلىق مارەس بايرون, شىمكەنتتىك ايان نيازبەك, الماتىلىق جىبەك شاحماردانقىزى, سەمەيلىك ايبەك جەڭىسقازين, استانالىق بەك شىمات ارنايى جۇلدەگە يە بولدى.
