«ەكسپو-2017» حالىقارالىق مامانداندىرىلعان كورمەسىنە تاعى ءبىر تارتۋ: «جاسىل ورام» كەشەنىنىڭ ەسىگى ايقارا اشىلدى.
كەشەندە قالا تۇرعىندارى مەن قوناقتارى ەنەرگيا ۇنەمدەيتىن يننوۆاتسيالىق تەحنولوگيالاردى ءوز كوزىمەن كورىپ, مۇمكىندىكتەرىمەن جاقىنىراق تانىسا الادى. كەشەن – LEED حالىقارالىق سەرتيفيكاتىنان وتكەن تمد ەلدەرىنىڭ اراسىنداعى العاشقىسى. ەكولوگيالىق قۇرىلىس تالاپتارىنا ساي تۇرعىزىلعان «جاسىل ورام» ەنەرگيانى ءتيىمدى پايدالانۋ ماقساتىندا سالىنعان. سونىڭ ارقاسىندا كەشەن كوممۋنالدىق قىزمەت تولەمدەرىن 22 پايىزعا ازايتۋعا مۇمكىندىك بەرەدى.
«سامۇرىق-قازىنا» جىلجىمايتىن مۇلىك قورى» اق باسقارما باسشىسى ارمان جەتپىسباي كەشەن تۋرالى كەڭىنەن اڭگىمەلەپ بەردى:
– كەشەننەن باسپانالى بولۋدى ارماندايتىندارعا ايتارىم, تۇرعىن ءۇيدىڭ ءبىر شارشى مەترى – 400-420 مىڭ تەڭگە شاماسىندا. ءبىر بولمەلى پاتەر 43 شارشى مەتردەن باستالادى. بۇگىندە بۇل كەشەندە 200-گە جۋىق وتباسى قونىس تويىن تويلادى. ءبىز «نۇرلى جەر» باعدارلاماسى بويىنشا باعاسى ءتيىمدى تۇرعىن ءۇي كەشەندەرىنىڭ قۇرىلىسىن باستاپ كەتتىك. ازىرگە باسقا تۇرعىن ۇيلەردە تىڭ تەحنولوگيالاردى پايدالانۋدى جوسپارعا ەنگىزىپ وتىرمىز.
«سامۇرىق-قازىنا» جىلجىمايتىن مۇلىك قورى», «استانا ەكسپو-2017» ۇلتتىق كومپانياسى جانە «BI Group» قۇرىلىس كومپانياسى اراسىندا جاسالعان ىنتىماقتاستىق تۋرالى مەموراندۋمعا سايكەس, كەشەن ەكسپو نىساندارىنىڭ ءبىرى رەتىندە تانىلدى. سوندىقتان ەكسپو قوناقتارى كەشەنگە ەلەكتر اۆتوبۋستارمەن تەگىن تاسىمالداناتىن بولادى. وتاندىق كولىك باتارەيامەن قۋاتتالادى. ەكسپو قالاشىعى مەن كەشەندى ءۇش اينالىپ وتكەننەن كەيىن اۆتوبۋستى 8 مينۋتقا قۋاتتاۋ قاجەت. جالپى العاندا, باتارەيا 8 جىلعا جارامدى.
«جاسىل ورام» جوباسىنىڭ جەتەكشىسى ەربولات مۇقاشەۆتىڭ ايتۋىنشا, اۆتوبۋس استانانىڭ 40 گرادۋس ايازىنا دا شىداس بەرەدى. «اقىلدى» اۆتوبۋس باعدارشامنىڭ قىزىل ءتۇسى جانعاندا توقتاپ, جىلدامدىقتى اسىرمايدى. ەلەكتر اۆتوبۋستىڭ قۇنى 200-250 مىڭ دوللارعا دەيىن بارادى. ءبىر ارتىقشىلىعى, ماي اۋىستىرىپ, وتىنعا اقشا كەتىرمەيسىز. كورمەنى وتكىزۋ كەزىندە استانالىقتار مەن قالا قوناقتارىن وسىنداي ەكى اۆتوبۋس تاسىمالداۋعا دايىن.
ەلەكتر اۆتوبۋستار 1 جىل تەگىن قولدانۋعا بەرىلىپ وتىر. ەكولوگيالىق تازا اۆتوبۋستاردى شىعاراتىن زاۋىتتىڭ باقىلاۋشى كەڭەسىنىڭ توراعاسى ەرلان ستامبەكوۆ «ەگەر اكىمدىك كەلىسىم بەرسە, بۇل ەرەكشە كولىك ءتۇرىن كوبەيتۋدى قولعا الامىز» دەپ وتىر.
ايتا كەتەيىك, بۇل تۇرعىن ءۇي ەلباسىنىڭ تاپسىرماسى بويىنشا مەملەكەتتىك-جەكەمەنشىك ارىپتەستىك نەگىزىندە سالىنعان بولاتىن.
گۇلدانا تالعاتقىزى
