قازاقستان رەسپۋبليكاسىنىڭ جاۋىنگەرلىك ونەر اسسوتسياتسياسىنىڭ ۇيىمداستىرۋىمەن جاڭادان اشىلعان Jekpe-Jek سپورت سارايىندا ەلوردا كۇنىنە جانە جاستار جىلىنا وراي جاۋىنگەرلىك ونەر فەستيۆالى ءوتتى.
شارانىڭ اشىلۋىنا پرەزيدەنت قاسىم-جومارت توقاەۆ قاتىستى. قر مادەنيەت جانە سپورت ءمينيسترى اقتوتى رايىمقۇلوۆا فەستيۆالگە قاتىسقان قوناقتاردى قالا كۇنىمەن جانە جاڭا سارايدىڭ اشىلۋىمەن قۇتتىقتاپ, جاۋىنگەرلىك ونەر فەستيۆالىنىڭ ويداعىداي وتۋىنە تىلەكتەستىك ءبىلدىردى.
شاراعا GAISF (Global Association of International Sports Federations) پرەزيدەنتى دوكتور رافاەلە كيۋللي دە كەلىپ, سپورت شەبەرلەرىنىڭ ونەرىن تاماشالادى. «قازاقستان 2021 جىلى دۇنيەجۇزىلىك جاۋىنگەرلىك ويىندارىن قابىلدايدى. بۇل – سپورتتىق الەۋەتتى كورسەتۋگە بەرىلگەن ۇلكەن مۇمكىندىك» دەدى ول ءسوز كەزەگىندە.
جاس جەتكىنشەكتەرگە سالاۋاتتى ءومىر سالتىن ناسيحاتتاۋ ماقساتىندا وتكەن شارا اياسىندا كاسىبي جانە اۋەسقوي جەكپە-جەكتەر ۇيىمداستىرىلدى. ولاردىڭ ىشىندە كاراتە, تحەكۆوندو, مما, گرەپپلينگ جانە باسقا جەكپە-جەك تۇرلەرى بار. تايلاند ەلىنەن ارنايى كەلگەن سپورتشىلار دا كورەرمەندەردى ءوز ەلىنىڭ ۇلتتىق سپورتىنان كوزايىم ەتتى.
قازاقستاننىڭ جاۋىنگەرلىك ونەر اسسوتسياتسياسى 2018 جىلى ەلباسىنىڭ قولداۋىمەن قۇرىلعان بولاتىن. قازىر ونىڭ قۇرامىندا 20-دان اسا فەدەراتسيا, 200 مىڭنان اسا سپورتشى بار. بيىل 7 مامىردان باستاپ رەسپۋبليكانىڭ 16 وڭىرىندە جاۋىنگەرلىك ونەر فەستيۆالى وتكىزىلىپ, سول شارانىڭ قورىتىندىسى قالا كۇنىنە وراي ەلوردادا ءوتىپ وتىر.
