بوزبالالاردى اسكەري-پاتريوتتىق باعىتتا ءتاربيەلەۋ ماقساتىندا ەلوردادا ورنالاسقان №68655 اسكەري بولىمىندە «جاۋجۇرەك مىڭ بالا» اسكەري-پاتريوتتىق ويىندار ۇيىمداستىرىلدى.
قالالىق جاستار ساياساتى ءماسەلەلەرى باسقارماسىنىڭ ۇيىتقىسىمەن وتكەن ويىنعا 18 كوماندا قاتىستى. استانالىق جوعارى وقۋ ورىندارى, كوللەدج بەن مەكتەپ قۇراما كوماندالارى 8 سايىستان سۇرىنبەي ءوتتى. جىگىتتەر اسكەري ەستافەتا مەن كروسقا قاتىسىپ, جارتىلاي اۆتوماتتى ۆينتوۆكادان وق اتتى. «اك» اۆتوماتىن بولشەكتەپ, كەيىن ونى قايتا جينادى. قاناتتى وتكەل ارقىلى بوگەتتەن, ال بوگەت استىنان ەڭبەكتەپ قاقپانعا ءوتتى. ەڭ مىقتىلارى گراناتانى نىساناعا لاقتىرىپ, بوگەت جولىنا دەيىن جەتتى.
اسكەري-پاتريوتتىق ويىنداردىڭ جەڭىمپازدارىن باسقارما باسشىسى اسحات ورالوۆ ماراپاتتادى. ويىن قورىتىندىسى بويىنشا I ورىن يەگەرى قازاقستان تەحنولوگيا جانە بيزنەس ۋنيۆەرسيتەتى, II ورىن – كاسىبي-تەحنيكالىق كوللەدج, ال III ورىن پوليتەحنيكالىق كوللەدجگە بۇيىردى. ودان بولەك, 8 بايقاۋدىڭ ارقايسىسىنان ۇزدىك اتانعان سارباز باعالى سىيلىقتارمەن ماراپاتتالدى.
جاستار ساياساتى ماسەلەلەرى باسقارماسىنىڭ باسشىسى اسحات ورالوۆتىڭ پىكىرىنشە, اسكەري جارىستاردىڭ جاستاردىڭ پاتريوتتىق رۋحىن وياتۋداعى ءرولى زور.
گۇلدانا تالعاتقىزى
