پرەزيدەنت قاسىم-جومارت توقاەۆ قورعانىس ءمينيسترى رۋسلان جاقسىلىقوۆتى قابىلدادى. مەملەكەت باسشىسىنا قورعانىس ۆەدومستۆوسىنىڭ بيىلعى ءبىرىنشى جارتىجىلدىقتا اتقارعان جۇمىستارىنىڭ قورىتىندىسى جونىندە باياندالدى. پرەزيدەنت – قارۋلى كۇشتەردىڭ جوعارعى باس قولباسشىسى كەزەڭدىك وزگەرىستەرگە نەگىزدەلگەن جاۋىنگەرلىك دايارلىقتىڭ جاڭا فورماتىن جانە كومانديرلەردىڭ باسقارۋ قابىلەتىن جەتىلدىرۋ مودەلىن ەنگىزۋ جايىندا ەسەپتى تىڭدادى.
سونىمەن قاتار رۋسلان جاقسىلىقوۆ قاسىم-جومارت توقاەۆقا تەرريتوريالىق قورعانىستى نىعايتۋعا قاتىستى قابىلدانىپ جاتقان شارالار تۋرالى باياندادى. بۇل باعىتتاعى جۇمىستار زاڭنامالىق جانە پراكتيكالىق دەڭگەيدە جۇرگىزىلىپ جاتىر. پرەزيدەنتكە ءاردايىم جاۋىنگەرلىك دايىندىقتا بولاتىن بولىمدەردى قارۋ-جاراقپەن جانە اسكەري تەحنيكامەن جابدىقتاۋ بارىسى, سونداي-اق وتاندىق ءوندىرىستىڭ ءموبيلدى جانە مودۋلدىك كومپونەنتتەرگە كوشىرىلۋى تۋرالى مالىمەت بەرىلدى. مەملەكەت باسشىسىنا قارۋلى كۇشتەردىڭ بىتىمگەرلىك قىزمەتى تۋرالى ارنايى باياندالدى.
كەزدەسۋدە اسكەرگە شاقىرىلاتىن جانە مەرزىمدى قىزمەتىن وتەگەن ازاماتتار تۋرالى مالىمەتتەردى تسيفرلىق جۇيەگە كوشىرۋ ءىس-شارالارى جونىندە دە ايتىلدى. اقپاراتتىق جۇيەلەردىڭ جاڭعىرتىلىپ, ولاردىڭ باسقا مەملەكەتتىك ورگانداردىڭ دەرەكقورلارىمەن بىرىكتىرىلۋى تىركەۋ, اسكەري ەسەپكە قويۋ جانە اسكەري بيلەتتەردى بەرۋ قىزمەتتەرىن ەلەكتروندى فورماتقا اۋىستىرۋعا مۇمكىندىك بەردى.
بۇدان بولەك, رۋسلان جاقسىلىقوۆ اسكەرگە شاقىرىلاتىن ازاماتتارعا كرەديتتىك دەمالىس بەرۋ, سونداي-اق ءبىلىم الۋعا جەڭىلدىكتەر جاساۋ ءۇشىن قابىلدانىپ جاتقان شارالار تۋرالى ايتتى. بۇگىندە 2,5 مىڭ ساربازدىڭ نەسيەسى كەيىنگە شەگەرىلدى جانە اسكەري قىزمەتىن وتەگەن 1,5 مىڭ جاۋىنگەرگە جوعارى وقۋ ورىندارىندا وقۋعا ورىن ءبولىندى.
جىل باسىنان بەرى مەرزىمدى اسكەري قىزمەتىن وتەپ, زاپاسقا شىعارىلعان 700-گە جۋىق سارباز جۇرگىزۋشى, مەحانيك, ماشينيست, سلەسار, اسپاز جانە باسقا دا ەڭبەك نارىعىندا سۇرانىسقا يە ماماندىقتار بويىنشا ءبىلىم الدى.
پرەزيدەنت اتالعان باستامالاردى, اتاپ ايتقاندا, جوعارى ءبىلىم جانە عىلىم مينيسترلىگىمەن بىرلەسىپ, ءبىلىم الۋعا جەڭىلدىك بەرەتىن كۆوتالار ءبولۋ, مەرزىمدى اسكەري قىزمەتىن وتەگەندەرگە مەملەكەتتىك ءبىلىم گرانتتارىن ۇسىنۋ, سونداي-اق ولاردىڭ زاڭنامالىق تۇرعىدا بەكىتىلۋىن جالعاستىرۋ ماسەلەسىن نازارعا الدى.
كەزدەسۋ سوڭىندا قاسىم-جومارت توقاەۆ قارۋلى كۇشتەردىڭ جاۋىنگەرلىك دايىندىعىن كۇشەيتۋ ماسەلەسىنە باسا ءمان بەرە وتىرىپ, بىرقاتار تاپسىرما بەردى.
