قازىرگى زاماننىڭ ءومىر ءسۇرۋ سالتى, ياعني ادامنىڭ قيمىل-قوزعالىسىنىڭ ازايۋى سالدارىنان جۇرەك-قان تامىرلارى اۋرۋلارى, قانت ديابەتى, پروستاتيت, بۇيرەك جانە باۋىر اۋرۋلارى ت.ب. كوبەيىپ, قانشاما ەسىل ازامات اجال قۇشۋدا. دۇنيەجۇزىلىك دەنساۋلىق ساقتاۋ ۇيىمىنىڭ بولجامىنا سۇيەنەتىن بولساق, بۇل قورقىنىشتى دەرەكتەر جىلدان جىلعا ۇلعايا بەرمەك.
الەمنىڭ عۇلاما عالىمدارىنىڭ پىكىرىنشە, ءتۇرلى اۋرۋ-سىرقاۋدان حالىقتى قۇتقارۋدىڭ ەڭ وڭاي جولى, ەڭ قولجەتىمدى دە ءارى ءتيىمدى ءادىسى – كۇن سايىن تازا اۋادا جاياۋ ءجۇرۋ. جاپون عالىمدارىنىڭ ويىنشا, ءار كۇن سايىن, تاۋلىگىنە 10 مىڭ قادام (ول شامامەن 6-7 كم) جاياۋ جۇرگەن ادامداردىڭ دەندەرى ساۋ, ءارى جوعارىدا اتالعان اۋرۋلاردان ادا بولادى. ال امەريكانىڭ ونكولوگتار قاۋىمداستىعى قاتەرلى ىسىكتىڭ الدىن الۋدىڭ ءتيىمدى جولى رەتىندە دە جاياۋ ءجۇرۋدى ۇسىنادى. مۇنداي ماتەريالدار مەديتسينالىق باق-تا, عالامتوردا وتە كوپ. وزدەرىمىز جۇرگىزگەن زەرتتەۋلەرىمىز بەن تاجىريبەلەرىمىزدى ساراپتايتىن بولساق, شىن مانىندە جاياۋ ءجۇرۋدى كۇندەلىكتى ءداستۇرىنە اينالدىرعان ازاماتتار ىشىندە وسى اتالعان اۋرۋلارعا شالدىققاندار جوق ەكەن.
بىراق ءبىزدىڭ ازاماتتار جاياۋ جۇرمەيدى, تاياق تاستام جەرگە دە كولىكپەن جۇرگەندى دۇرىس كورەدى, ويتكەنى كوپشىلىگى جاياۋ ءجۇرۋدىڭ زور دەنساۋلىق كەپىلى ەكەندىگىن, اتالعان اۋرۋلاردىڭ الدىن الاتىنىن بىلمەيدى, ال بىلەتىندەرى جاياۋ ءجۇرۋگە ەرىنەدى, وعان ىنتا-ىقىلاس تا جوق. سوندىقتان حالىق اراسىندا كوپ ۇگىت-ناسيحات, تۇسىنىك جۇمىستارىن جۇرگىزۋىمىز كەرەك.
قازاقستاننىڭ جاياۋ ءجۇرۋ جانە سكانديناۆياشا جاياۋ ءجۇرۋ فەدەراتسياسى جاياۋ ءجۇرۋدى حالىق اراسىندا جاپپاي ناسيحاتتاپ, ونى جالپىۇلتتىق ۇردىسكە اينالدىرۋدى جوسپارلاپ وتىر. فەدەراتسيانى دامىتۋ ءۇشىن قاتارىمىزعا قالىڭ بۇقارانى تارتىپ, ەرىكتى ازاماتتارمەن جۇمىس ىستەيتىن بولامىز.
بىزدەر, ءبىر توپ بەلسەندى ازاماتتار – وتانىمىزدىڭ پاتريوتتارى, حالقىمىزدىڭ دەنساۋلىعىن جاقسارتۋعا ءوز ۇلەسىمىزدى قوسۋ ءۇشىن وسى فەدەراتسيانى قۇردىق. ءبىز «ءار كۇن سايىن – 10 000 قادام جۇرەيىك» دەپ اتالاتىن جالپىۇلتتىق باعدارلامامىزدى بۇقارا جۇرتشىلىققا ۇسىنامىز. ءبىزدىڭ باعدارلامامىز ءبىر عانا سويلەمنەن تۇرسا دا, ونىڭ كوتەرەر جۇگى مەن ءمان-ماعىناسى ۇشان-تەڭىز. ياعني, فەدەراتسيانىڭ ءاربىر مۇشەسى كۇن سايىن 10000 قادام ءجۇرىپ وتۋگە مىندەتتەنەدى. ءاربىر ادامنىڭ وسى ماقساتتى ورىنداۋى ءۇشىن فەدەراتسيا كومەكتەسەتىن بولادى, ياعني ولاردى وقىتامىز, ۇيرەتەمىز, كومەكتەسەمىز, ءتيىستى شارالار ۇيىمداستىرامىز جانە قاجەت بولسا ارنايى دايىندايمىز. ءبىز الدىمىزعا وسىنداي وتە قاراپايىم دا قولجەتىمدى, بىراق حالىق ءۇشىن پايداسى اسا زور ماقسات قويىپ وتىرمىز. شىن مانىندە جاياۋ ءجۇرۋدىڭ ادامنىڭ دەنساۋلىعىن جاقسارتىپ, ءومىر جاسىن ۇزارتاتىندىعى دالەلدەنگەن شىندىق.
ءبىزدىڭ ەلىمىزدە جاياۋ ءجۇرۋ جانە سكانديناۆياشا جاياۋ ءجۇرۋ سپورت ءتۇرى رەتىندە تانىلماعان, ياعني رەسپۋبليكالىق سپورتتىق تىزبەدە تىركەلمەگەن. سوندىقتان ءبىزدىڭ الدىمىزدا وسى سپورت تۇرلەرىن زاڭدى تۇردە تىركەتىپ, رەسمي مويىندالۋى ءۇشىن جۇرگىزىلەتىن ۇلكەن جۇمىستار كۇتىپ تۇر. سكانديناۆياشا جاياۋ ءجۇرۋ سپورت ءتۇرى بويىنشا فينلياندياداعى حالىقارالىق سكانديناۆياشا جاياۋ ءجۇرۋ فەدەراتسياسىنىڭ ستاندارتتارى مەن نورماتيۆتەرىن قابىلدايمىز. ال جاياۋ ءجۇرۋ سپورتى بويىنشا ءوزىمىزدىڭ نورماتيۆتەرىمىز بەن ستاندارتتارىمىزدى ازىرلەيمىز جانە سوعان سايكەس ءوزىمىزدىڭ تارتىپتەرىمىز بەن ەرەجەلەرىمىزدى جاساپ شىعارامىز.
بارشاڭىزدى ءبىزدىڭ فەدەراتسياعا كىرۋگە شاقىرامىز. جانىڭا جاقىن جانداردىڭ دەنى ساۋ بولسىن دەسەڭىز, تۋىس-باۋىرلارىڭىزدى, دوستارىڭىز بەن جولداستارىڭىزدى جاياۋ ءجۇرۋ فەدەراتسياسىنا قوسىلۋعا شاقىر, «دەنى ساۋدىڭ جانى ساۋ» دەگەندەي باقىتتى دا سالاۋاتتى ءومىر جولىنا تۇسۋگە كەڭەس بەر, وتانداس.
جامبىل احمەتبەكوۆ,
پارلامەنت ءماجىلىسىنىڭ دەپۋتاتى,
قازاقستاننىڭ جاياۋ ءجۇرۋ جانە سكانديناۆياشا
جاياۋ ءجۇرۋ فەدەراتسياسىنىڭ باسشىسى
