كەشە استانادا قالا اكىمى اسەت يسەكەشەۆ ورتالىق جەدەل مەديتسينالىق ستانساسىنىڭ جاڭا عيماراتىن سالتاناتتى جاعدايدا اشتى. شاراعا ەلوردا اكىمىنىڭ ورىنباسارى ەرمەك امانشاەۆ, ەسىل اۋدانىنىڭ اكىمى ەرماعانبەت بولەكپاەۆ, قالالىق دەنساۋلىق ساقتاۋ باسقارماسىنىڭ باسشىسى ەرىك ءبايجۇنىسوۆ جانە جاڭا جەدەل مەديتسينالىق جاردەم ستانساسىنىڭ باس دارىگەرى ساپاربەك دۇيسەنوۆ قاتىستى.
بىلتىر شىلدە ايىندا باستالعان نىساننىڭ قۇرىلىسى بيىل قاراشادا اياقتالدى. استانا اكىمى اسەت يسەكەشەۆ
وتە از ۋاقىت ارالىعىندا ءزاۋلىم عيماراتتى پايدالانۋعا تاپسىرعان قۇرىلىسشىلاردىڭ ەڭبەگىن ەسكەردى.
– ەلباسى حالىقتىڭ دەنساۋلىعىنا جاقسى كوڭىل ءبولىپ وتىر. وسىنداي جاڭا نىسانداردىڭ اشىلۋى – سونىڭ ايعاعى. قازىر جەدەل جاردەم كولىكتەرىنىڭ ءبارى تولىقتاي اقپاراتتاندىرىلعان, دىتتەگەن جەرىنە 10-15 مينۋت ارالىعىندا جەتەدى. بۇل – 1, 2 جانە 3-ساناتتاعى شاقىرتۋلار بويىنشا بارۋ ۋاقىتى. وسى كورسەتكىشتى كەلەسى جىلى 7 مينۋتقا دەيىن جەتكىزۋدى كوزدەپ وتىرمىز. سوعان سايكەس جاڭا تەحنيكالار الدىرتامىز. 2017 جىلى جەدەل جاردەم ستانسالارىنا كەمىندە 30 كولىك تاپسىرۋ جوسپارلانۋدا. ەكىنشىدەن, بىرىڭعاي Call-ورتالىق ىسكە قوسىلادى. قازىر جۇيە تەستىلىك رەجيمدە جۇمىس ىستەۋدە. تۇرعىندار «103» ءنومىرى ارقىلى دارىگەرگە جازىلۋعا بولادى نەمەسە دەنساۋلىعىنا قاتىستى ساۋالدارىن جولداي الادى, – دەدى ەلوردا اكىمى.
شاھار باسشىسى جاڭا نىساننىڭ اۋماعىن ارالاپ, بىرىڭعاي ديسپەتچەرلىك قىزمەتتىڭ جۇمىسىمەن تانىستى.
ءتورت قاباتتى جاڭا ورتالىقتىڭ جالپى اۋدانى 5 مىڭنان اسا شارشى مەتردى الىپ جاتىر. نىسان باس جانە وندىرىستىك عيماراتتاردان تۇرادى. ورتالىق اۆتوپارك جانە رەانيماتسيالىق, جەلىلىك سانيتارلىق ماشينالار كەشەنىمەن جابدىقتالعان.
مەديتسينالىق مەكەمەنىڭ قۋاتتىلىعى تاۋلىگىنە 274 شاقىرۋدى قابىلداي الادى. مۇندا جالپى سانى 1561 ادام قىزمەت ەتەدى. ونىڭ 118-ءى – دارىگەر, 858-ءى – فەلدشەر, 179 مامان – كىشى مەديتسينالىق قىزمەتكەرلەر. سونداي-اق, 331 جۇرگىزۋشى مەن 75 قىزمەت كورسەتۋشى تۇلعا بار.
استانا اكىمى اسەت يسەكەشەۆ ەكسپو-2017 حالىقارالىق مامانداندىرىلعان كورمەسى قارساڭىندا جاڭا مەديتسينالىق ورتالىقتىڭ باسىمدىق بەرەتىن ءمىندەتتەرىن اتاپ كورسەتتى. الدىمەن, مەكەمە جەدەل مەديتسينالىق قىزمەت كورسەتۋ ساپاسىن حالىقارالىق ستاندارتتارعا سايكەس كوتەرۋ كەرەك. وسى ماقساتتا كانادادان ارنايى ماماندار شاقىرتىلىپتى.
ورىنبەك وتەمۇرات
