استانا اكىمدىگىندە بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيانىڭ وتىرىسى ءوتتى. كۇن تارتىبىندەگى ماسەلە – قالانىڭ الەۋمەتتىك-ەكونوميكالىق دامۋىنا وڭ اسەر ەتەتىن بيۋدجەت تۇسىمدەرىن ناتيجەلى جوسپارلاۋ مەن بولجاۋ شارالارى تۋرالى ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى گۇلنار ءجۇسىپوۆا بايانداما جاسادى.
الدىمەن بيىلعى بيۋدجەتكە توقتالعان ول جىل باسىنان بەرى قالا بيۋدجەتىنە التى مارتە تۇزەتۋ ەنگىزىلىپ, ەكى رەت ونى ناقتىلاۋ جۇرگىزىلگەنىن جەتكىزدى. سونىڭ قورىتىندىسىندا تۇزەتىلگەن بيۋدجەت 357 ميلليارد 23 ميلليون تەڭگەنى قۇرادى. ونىڭ ىشىندە جەكە تابىستار 176 ميلليارد تەڭگەگە جەتىپ, بەكىتىلگەن بيۋدجەتكە سايكەس 15 ميلليارد 205 ميلليون تەڭگەگە نەمەسە 9,4 پايىزعا ۇلعايعان. رەسپۋبليكالىق بيۋدجەتتەن تۇسكەن ترانسفەرتتەر مەن كرەديتتەر 173 ميلليارد 519 ميلليون تەڭگە بولدى. وسى قارجىدان قالانىڭ دامۋىنا 147 ميلليارد تەڭگە باعىتتالادى. ال, جالپى العاندا ەلوردانى دامىتۋعا 182,6 ميلليارد تەڭگە نەمەسە بيۋدجەتتىڭ 51 پايىزىن ءبولۋ كوزدەلمەك. الەۋمەتتىك سالاعا 117,4 ميلليارد تەڭگە, ياعني, 32,9 پايىزى جۇمسالماق.
گۇلنار ءجۇسىپوۆانىڭ ايتۋىنشا, اعىمداعى جىلدىڭ 1 شىلدەسى كۇنىنە قالا بيۋدجەتىنىڭ تۇسىمدەرى اسىرا ورىندالىپ, 100,5 پايىزعا جەتكەن. ماسەلەن, جوسپار بويىنشا ناقتى تۇسىمدەر 150 ميلليارد تەڭگە بولۋ كەرەك بولسا, بيۋدجەتكە 150,7 ميلليارد تەڭگە تۇسكەن. سونىڭ ىشىندەگى سالىقتاردان 75 ميلليارد تەڭگە تۇسەدى دەپ جوسپارلانسا, بۇل كورسەتكىش 79,4 ميلليارد تەڭگەنى كورسەتكەن. سالىقتىق ەمەس تۇسىمدەر دە ەكى ەسەدەن ارتىق وسكەن. شىعىستارعا كەلسەك, 1 شىلدە كۇنىنە ول 97,9 پايىزعا ورىندالعان.
سونداي-اق, گۇلنار ءجۇسىپوۆا باسقارما 2016-2018 جىلدارعا ارنالعان بيۋدجەت جوباسىن جوسپارلاۋعا كىرىسكەنىن ايتىپ ءوتتى. ونىڭ ايتۋىنشا, بۇل جۇمىس بيىلعى ءساۋىر ايىندا باستالعان. بۇدان ءارى اتالعان كەزەڭدەردى قامتيتىن بيۋدجەتتى قارجى مينيسترلىگىنىڭ جانىنداعى رەسپۋبليكالىق كوميسسيا قاراۋى ءتيىس.
امانعالي شميتۇلى
