نۇر-سۇلتان قالاسى اكىمدىگىنىڭ قولداۋىمەن ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ كونتسەرت زالىندا كۇيشى-كومپوزيتور, قازاقستاننىڭ ەڭبەك سىڭىرگەن قايراتكەرى, «پاراسات», «قۇرمەت» وردەندەرىنىڭ يەگەرى, قازاق ۇلتتىق ونەر ۋنيۆەرسيتەتىنىڭ قۇرمەتتى پروفەسسورى ءابدىمومىن جەلدىباەۆتىڭ 85 جاس مەرەيتويىنا ارنالعان «كۇمبىرلە, كۇيىم, ەلىمدە» كونتسەرتى ءوتتى.
كونتسەرتكە نۇر-سۇلتان قالاسىنىڭ اكىمى التاي كولگىنوۆ, ەلوردا ءماسليحاتىنىڭ حاتشىسى ەرلان كاناليموۆ, جامبىل وبلىستىق ءماسليحاتىنىڭ حاتشىسى ماحمەتعالي سارىبەكوۆ, جامبىل وبلىسى شۋ اۋدانىنىڭ اكىمى ساكەن ارۋباەۆ قاتىسىپ, كۇيشى-كومپوزيتورعا سىي-سىياپات كورسەتتى.
– بۇگىن ەلوردامىزدىڭ تورىندە, وسى زالدا كەرەمەت ونەر كەشى ءوتىپ جاتىر. بۇل كەشكە باستى سەبەپكەر – اتاقتى كۇيشى, بەلگىلى كومپوزيتور, ءوزىمىز ارداق تۇتاتىن ءابدىمومىن اعا. اعامىز سانالى عۇمىرىن قازاقتىڭ ساف ونەرى كۇيگە ارناپ, قانشاما كەرەمەت تۋىندىلاردى قۇندى قازىنامىزعا اينالدىردى. «ناعىز قازاق قازاق ەمەس, ناعىز قازاق دومبىرا» دەگەن كەرەمەت ءسوزىمىز بار. دومبىرا پايدا بولعالى بەرى قانشاما شىعارما دۇنيەگە كەلدى. قورقىت اتامىزدان باستاپ تاتتىمبەتىمىز, دينامىز, اقان سەرىمىز, ۇكىلى ىبىرايىمىز, جاياۋ مۇسامىز, داۋلەتكەرەيىمىز بار. سولاردىڭ ونەرىن ءسىز جالعاستىرىپ كەلەسىز, اعا. سىزگە ءاردايىم شىعارماشىلىق تابىستار تىلەيمىن! ارامىزدا وسىلاي امان ءجۇرىڭىز! تۋىندىلارىڭىز حالىقپەن بىرگە جاساي بەرسىن! – دەدى ەرلان كاناليموۆ.
ءابدىمومىن جەلدىباەۆ جارتى عاسىردان استام عۇمىرىن مادەنيەت سالاسىنا, سونىڭ ىشىندە مۋزىكا ونەرىنە ارناپ كەلە جاتىر. وسى ۋاقىت ىشىندە ءوز سالاسىندا باسشىلىق قىزمەتتەردى اتقارا ءجۇرىپ, «شۋ ەركەسى» حالىقتىق ءان-بي ءانسامبلىنىڭ نەگىزىن قالاپ, ءانسامبلدىڭ رەسپۋبليكالىق, وبلىستىق فەستيۆالدەرگە قاتىسۋىنا مۇرىندىق بولدى.
قازاق ەلىنىڭ كۇيشىلىك مادەنيەتىن ءوزىنىڭ ءتول تۋىندىلارىمەن بايىتقان كۇيشىنىڭ بۇگىنگى كۇنى 70-تەن اسا شىعارمالارى ورىندالىپ ءجۇر. سونىڭ ىشىندە «ەركە سىلقىم» كۇيىنىڭ ورنى بولەك. بۇل – شىعارما ونەر يەسىنىڭ تولقۇجاتى. وسى كۇي مۋزىكا مەكتەپتەرىنىڭ باعدارلاماسىنا مىقتاپ ەنگەن. كۇيگە تالاپكەر بالادان «كۇي تارتىپ بەرشى» دەپ سۇراعاندا, «ەركە سىلقىمدى» بەبەۋلەتە جونەلەتىنىن تالاي كورگەنبىز. ياعني, بۇل كۇي ەلىمىزگە كەڭ تاراپ, بالاعا دا, ەرەسەك ادامعا دا سۇيكىمدى.
ەلوردالىق فيلارمونيادا وتكەن كونتسەرتتە «ەركە سىلقىمدى» تاعى تىڭداپ, تامساندىق. فيلارمونيانىڭ قازاق وركەسترى (كوركەمدىك جەتەكشىسى جانە باس ديريجەرى – قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆ, ديريجەرى – مادەنيەت قايراتكەرى نۇرلان بەكەنوۆ) جانە فيلارمونيانىڭ بەلگىلى ونەر شەبەرلەرى كۇيشى-كومپوزيتوردىڭ شىعارمالارىن ورىندادى. سونىڭ ىشىندە «شابىت», «اۋليەاتا», «بوزجىگىت», «كوكشولاق», «تولعاۋ», «ءومىر-داستان», «ءادىلحان», «ىدىرىس», «سامعاۋ», «جارىلقاپ باتىر», ت.ب. كۇيلەرى مەن اندەرى كورەرمەنگە ۇسىنىلدى.
