ومىردە ءوزىم ۇستاناتىن جانە سانالى عۇمىرىمدا اينىماۋعا سەرت بەرگەن ءبىر ءپرينتسيپىم بار: جەلىلىك ماركەتينگ (سەتەۆوي ماركەتينگ) پەن پيراميدالاردان اۋلاق ءجۇرۋ. ومىردە ءبىر نارسەدەن قاتەلەسپەدىم دەسەم – وسى ۇستانىمىمدى ايتار ەدىم.
تالاي جەلىلىك كومپانيا, «حولدينگتەردىڭ» ترەنينگتەرىنە بارىپ كوردىم. سونداعى قاتىسۋشىلاردىڭ تۇرىنە قاراپ وتىرىپ, سول ادامداردى سول ساتتە «ال ەندى, تۇر دا, قاسىڭدا وتىرعان ادامنىڭ قۇلاعىن قىرشىپ ال» دەسەڭ, ويلانباي سونى ىستەيتىن, بىرەۋلەرى ءسويتىپ جاتقاندا وزگەلەرى قول شاپالاقتاپ وتىراتىن زومبيلەرگە ۇقساتامىن.
اقىرى باستادىم عوي, ايتايىن.
NL جانە باسقا سياقتى كومپانيالاردىڭ بىلاي زيانى جوق, ءوز-وزىمەن قۋىپ, وزدەرى باد-تارىنا سەنىپ جۇرگەن بىرەۋلەر ايتەۋىر. بىراق…
ولار ءوز ءونىمىن كەز كەلگەن سىرقاتتىڭ ەمى, مىڭ دا ءبىر دەرتتىڭ داۋاسى دەپ ۇسىنادى. ادام سوعان سەنىپ, الىپ, سوعان الدانىپ ءجۇرىپ, اۋرۋىن اسقىندىرىپ الۋى مۇمكىن. ايتالىق, ولار باس اۋىرعاندا كومەكتەسەدى دەپ ءبىر ءدارىسىن بەرەدى. ادام الىپ ىشەدى, باسى اۋىرعانى شىنىمەن باسىلادى. دارىگەرگە بارمايدى. بىراق ونىڭ باسى اۋىرعانىنىڭ سەبەبى باسقا بولۋى مۇمكىن عوي: وندا قان تامىرلارىنىڭ پروبلەمالارى دا, جۇرەك تە, ومىرتقا دا, مويىن دا ارالاسۋى مۇمكىن. ولاردىڭ كەيبىرى تەك مەحانيكالىق ارالاسۋ ارقىلى جازىلادى. ايتالىق, باس اۋرۋدىڭ كوپ ءتۇرىن مويىنعا ماسساج جاساپ ەمدەۋگە بولادى. ال ءبىز NL-ءدىڭ پوروشوكتارىن ءىشىپ جۇرە بەرەمىز, قىسىلعان تامىر سول قىسىلعان كۇيىندە تۇرا بەرەدى.
ءبىر جىلدارى «ۇلى اسۋ» دەگەن كومپانيا بولعان. ءالى دە بار. سولار امەريكادان «ۆاليۋپتا» دەگەن پرەپارات اكەپ ساتىپ ءجۇردى. ءاۋ باستا ول نارسە ايەلدىڭ توسەك قاتىناسىندا پايدالانۋى ءۇشىن ويلاپ تابىلعان. بىراق, ۋاقىت وتە كەلە, ونىڭ قۇرامىنداعى L-arginin دەگەن اقۋىز (امينقىشقىلى ما, ەسىمدە جوق) مىڭ دا ءبىر دەتتىڭ داۋاسى ەكەنىن عالىمدار انىقتاپتى-مىس. سودان قازاقستاندا جاپپاي ۆاليۋپتاتەراپيا باستالسىن. سول كومپانيانىڭ ادامدارى سول گەلدى كىمگە ۇسىنبادى, كىمگە تىقپالامادى دەيسىڭ: اسقازانى اۋىرعانعا دا, كوزى اۋىرعانعا دا, ءتىپتى ومىرتقاسى زاقىمدانىپ, گرىجا-پروترۋزيا بولىپ جۇرگەندەرگە دە. ول گەلدى اۋىرعان جەرگە جاقسا دا بولادى ەكەن, ءتىلدىڭ استىنا سالىپ ءسىڭىرىپ السا دا بولادى ەكەن, ءتىپتى سۋعا ەزىپ ىشسە دە بولادى ەكەن.
بىرنەشە جىلدان كەيىن سول كومپانيا ءونىمىن «Sensual» دەگەن اتپەن قايتا ساتا باستادى, تەك بۇل جولى «پو پريامومۋ نازناچەنيۋ», ياعني تويات الا الماي جۇرگەن ايەلدەرگە دەپ ساتتى. قازىر دە بار-اۋ دەيمىن. تەك 2008 جىلى ءبىر قۇداعيىمىز كوزىندەگى گلاۋكومانى سونىمەن ەمدەيمىن دەپ, كوزىنەن ايىرىلىپ قالا جازداعانى ەسىمدە.
ءونىم ساتاتىن جەلىلىك ماركەتينگ – جالپى نارىقتا باسەكەگە شىدامايتىن ونىمدەرىن وتكىزۋ امالى. سول سترۋكتۋرانىڭ ءبارىن ۇستاپ تۇرۋعا, جانتالاسىپ نورما ورىنداعاندار ءمىنىپ جاتقان مەرسەدەستەرگە, «وڭىرلىك مەنەدجەرلەردىڭ جيىندارى مەن ترەنينگتەرىنە» قانشا اقشا كەتەتىنىن ەسەپتەپ كورسە – سول ءونىمنىڭ وزىندىك قۇنى شىعادى. تيىن تۇراتىن ءونىم ەكەنىن تۇسىنەسىڭ.
ال ءسىز, سونشا ارميانى اسىراعىڭىز كەلە مە؟
نازگۇل قوجابەك
