جەلتوقسانشىلارعا كومەك كورسەتىلەدى
قالالىق ءماسليحات دەپۋتاتتارى جەلتوقسان وقيعاسىنا قاتىسقان ەلوردالىقتارعا الەۋمەتتىك كومەك كورسەتۋ جوباسىن ماقۇلدادى.
قالالىق ءماسليحاتتىڭ كەزەكتەن تىس سەسسياسىندا «نۇر-سۇلتان قالاسىنىڭ الەۋمەتتىك كومەك كورسەتۋ ونىڭ مولشەرىن بەلگىلەۋ جانە مۇقتاج ازاماتتاردىڭ جەكەلەگەن ساناتتارىنىڭ تىزبەسىن ايقىنداۋ قاعيداسى تۋرالى استانا قالاسى ءماليحاتىنىڭ 2017 جىلعى 12 جەلتوقسانداعى شەشىمىنە وزگەرىستەر ەنگىزۋ تۋرالى» شەشىم جوباسى ساراپقا سالىندى. قۇجاتتى نۇر-سۇلتان قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا تانىستىردى.
اكىمدىك وكىلى جوبا بويىنشا الەۋمەتتىك قولداۋ شارالارىن ۇسىندى. اتاپ ايتقاندا, كونستيتۋتسيا كۇنىنە وراي زەينەتكەرلەر مەن بىرجولعى تولەم الۋشىلار اراسىنان سەمەي يادرولىق سىناق پوليگونىنان زارداپ شەككەن تۇلعالارعا 2 اەك مولشەرىندە بىرجولعى الەۋمەتتىك كومەك كورسەتۋ; اۋعانستانداعى اسكەري قيمىلدارعا قاتىسقان ارداگەرلەرگە, چەرنوبىل اەس-ىندەگى اپات سالدارىن جويۋعا قاتىسقانى ءۇشىن الاتىن جەڭىلدىكتەر اسكەري قيمىلعا قاتىسۋشىلارمەن تەڭەستىرىلگەن تۇلعالارعا اتاۋلى كۇندەردە بەرىلەتىن الەۋمەتتىك كومەكتىڭ مولشەرىن 30 اەك-كە دەيىن ءوسىرۋ; 1986 جىلدىڭ 17-18 جەلتوقسانىنداعى وقيعالارعا قاتىسقان, «جاپپاي ساياسي قۋعىن-سۇرگىن قۇرباندارىن اقتاۋ تۋرالى» قر زاڭىنىڭ ءتارتىبى بويىنشا اقتالعان ساياسي قۋعىن-سۇرگىن قۇرباندارىنا ساناتورلىق-كۋرورتتىق ەمدەۋ, كوممۋنالدىق قىزمەتتەردى وتەۋ قىزمەتىن كورسەتۋ; الەۋمەتتىك ماڭىزى بار سىرقاتقا شالدىققان ادامدارعا قاتتى وتىن ساتىپ الۋ ءۇشىن الەۋمەتتىك كومەك بەرۋ ماسەلەسى كوتەرىلدى. ءماسليحات دەپۋتاتتارى شەشىمدى ءبىراۋىزدان ماقۇلدادى.