استانا قالالىق اكىمدىگىندە «سىبايلاس جەمقورلىقتى جالپىعا بىردەي قابىلداماۋ – بىرلىك جانە تۇراقتىلىقتىڭ كەپىلى» اتتى دوڭگەلەك ۇستەل ءوتتى. جيىندى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن قازاقستان حالقى اسسامبلەياسى بىرلەسىپ ۇيىمداستىردى.
دوڭگەلەك ۇستەلدى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ جۇرگىزدى. ول سىبايلاس جەمقورلىقپەن كۇرەستە جازالاۋدان بۇرىن, وعان توزبەيتىن مادەنيەت قالىپتاستىرۋ كەرەك ەكەنىن ەسكەرتتى. بۇل ءۇشىن بارماق باستى, كوز قىستى ارەكەتپەن قوعام بولىپ جۇمىلىپ كۇرەسۋ قاجەت.
– ەلباسى نۇرسۇلتان نازارباەۆ سىبايلاس جەمقورلىقتىڭ سەبەپتەرى مەن العىشارتتارىن انىقتاپ, ولاردى جويۋ جۇمىسىن كۇشەيتۋ تۋرالى تاپسىرما بەرگەن بولاتىن. ەلباسىنىڭ سوڭعى جولداۋىندا سىبايلاس جەمقورلىققا بايلانىستى قوعاممەن جۇمىس جۇرگىزۋ كەرەكتىگى ناقتى ايتىلدى. بۇدان بولەك, قوعامدا سىبايلاس جەمقورلىققا قارسى مادەنيەتتى قالىپتاستىرۋ ءۇشىن مەملەكەت پەن ازاماتتىق قوعام اراسىندا تىعىز قارىم-قاتىناس ورناتۋ كەرەك. مىنە, سول ازاماتتىق قوعامنىڭ ىشىندە قازاقستان حالقى اسسامبلەياسىنىڭ ورنى ەرەكشە, – دەدى ول.
قازاقستان حالقى اسسامبلەياسى توراعاسىنىڭ ورىنباسارى – قر پرەزيدەنتى اكىمشىلىگىنىڭ قحا حاتشىلىعىنىڭ مەڭگەرۋشىسى دارحان مىڭبايدىڭ ايتۋىنشا, جەمقورلىق ەلىمىزدىڭ دامۋىنا كەدەرگى كەلتىرەدى. سوندىقتان دا ول سىبايلاس جەمقورلىقپەن كۇرەسۋدە ءاربىر ازامات بەلسەندىلىك تانىتۋى كەرەك ەكەنىن اتاپ ءوتتى.
– سىبايلاس جەمقورلىق ەلىمىزگە كەلەتىن ينۆەستيتسيالىق تارتىمدىلىقتى باسەڭدەتەتىن كەلەڭسىز قۇبىلىس بولىپ سانالادى. سونداي-اق, جەمقورلىق الەۋمەتتىك-ەكونوميكالىق دامۋدى بارىنشا تەجەپ, ۇلتتىق قاۋىپسىزدىككە تىكەلەي قاۋىپ توندىرەدى. سوندىقتان دا تاۋەلسىزدىكتىڭ العاشقى كۇندەرىنەن باستاپ سىبايلاس جەمقورلىققا قارسى ءىس-قيمىلدىڭ ءتيىمدى, الەمدىك ستاندارتتارعا ساي ينستيتۋتتارى مەن تەتىكتەرىن قۇرۋ كەزەڭ-كەزەڭىمەن جۇزەگە اسىرىلىپ كەلەدى. ماسەلەن, قازاقستان تمد ەلدەرىنىڭ ىشىندە العاشقىلاردىڭ ءبىرى بولىپ سىبايلاس جەمقورلىققا قارسى كۇرەس تۋرالى زاڭ قابىلدادى, – دەدى دارحان قامزابەكۇلى.
سونداي-اق, جيىندا ءماجىلىس دەپۋتاتى ساۋىتبەك ابدراحمانوۆ, قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ ۆيتسە-رەكتورى ايگۇل كوشەرباەۆا بايانداما جاسادى. بۇدان بولەك, دوڭگەلەك ۇستەلگە تەلەكوپىر ارقىلى قاتىسقان وڭىرلەردەن الماتى قالاسى مەن پاۆلودار وبلىسىنىڭ وكىلدەرى تۇشىمدى ويلارىن ورتاعا سالدى.
سەرىك جولداسباي
