كەڭەس وداعىنىڭ باتىرى, قازاقستاننىڭ تۇڭعىش قورعانىس ءمينيسترى ارميا گەنەرالى ساعادات نۇرماعامبەتوۆ پەن رەيحستاگقا تۋ تىككەن حالىق قاھارمانى راقىمجان قوشقارباەۆتىڭ عاسىرلىق مەرەيتويىنا وراي ەلوردانىڭ ترياتلون ساياباعىندا 5 جانە 10 شاقىرىمعا جۇگىرۋ جارىسى ءوتتى, دەپ حابارلايدى astana-akshamy.kz.
ءىس-شارانى ءىى دۇنيەجۇزىلىك سوعىس جىلدارىندا قازا تاپقان جانە حابار-وشارسىز كەتكەن قازاقستاندىق جاۋىنگەرلەردى ىزدەۋمەن جانە قايتا جەرلەۋمەن اينالىساتىن «Atamnyn Amanaty» رقب ۇيىمداستىردى.
وعان قارۋلى كۇشتەردىڭ, ۇقك شەكارا قىزمەتىنىڭ, ۇلتتىق ۇلاننىڭ مىڭعا جۋىق اسكەري قىزمەتشىسى جانە 400-دەن استام كاسىبي جۇگىرۋشى مەن سپورت اۋەسقويى قاتىستى.
جارىسقا قاتىسۋشىلارعا ارناپ «قارۋلى كۇشتەر ارداگەرلەرى» رقب توراعاسىنىڭ ورىنباسارى وتستاۆكاداعى گەنەرال-مايور مارات ناعۇمانوۆ ءسوز سويلەدى.
– داڭقتى جاۋىنگەرلەردى ەسكە الۋ ءۇشىن سپورتتىق ءىس-شارالار وتكىزۋ جاقسى داستۇرگە اينالدى. وتكەن جىلى مۇندا ەكى مارتە كەڭەس وداعىنىڭ باتىرى اۆياتسيا گەنەرال-مايورى تالعات بيگەلدينوۆتىڭ 101 جىلدىعىنا ارنالعان جارىس ءوتتى. بۇگىنگى جۇگىرۋ اتى اڭىزعا اينالعان باتىرلار ساعادات نۇرماعامبەتوۆ پەن راقىمجان قوشقارباەۆتىڭ ءجۇز جىلدىعىنا ورايلاستىرىلىپ وتىر. بۇل جارىسقا قاتىسۋ – باتىرلاردى جادىمىزدا عاسىرلار بويى ساقتاۋ, ولاردىڭ ونەگەسىن ۇرپاقتان ۇرپاققا جەتكىزۋ, ەرلىگىنە قۇرمەت كورسەتۋ, – دەپ اتاپ ءوتتى ول.
قارۋلى كۇشتەردىڭ اسكەري قىزمەتشىلەرىمەن بىرگە جۇگىرگەن اكتەر سانۇرجان سۇلەيمەنوۆ اتى اڭىزعا اينالعان قازاقستاندىق جاۋىنگەرلەردى ەسكە الۋ جارىسىندا العان اسەرىمەن ءبولىستى.
– «التىنشى بەكەت» جانە «پاتريوتتار ۋاقىتى» فيلمدەرىندە رولدەردى سومداي وتىرىپ, مەن ارميانىڭ ومىرىمەن, ونىڭ ەرەكشەلىگىمەن, ۇدايى دەنە دايىندىقتارىمەن تانىسپىن. وسى جولى تاعى دا ءوزىمدى سىناپ كورگىم كەلدى جانە اتا-بابالارىمىزدىڭ تاريحىمەن بايلانىستى سەزىنگىم كەلدى, – دەدى جارىسقا قاتىسۋشى.
ءىس-شارا اياسىندا كونتسەرت ۇيىمداستىرىلدى, وندا ءان اۆتورى جانە ورىنداۋشى نۇرلان ءالىمجانوۆ ءسوز سويلەدى. دالالىق اسحانا ورناتىلىپ, وندا جارىسقا قاتىسۋشىلار سارباز بوتقاسى مەن ىستىق شايدان ءدام تاتتى.
