استانادا قر قارۋلى كۇشتەرىنىڭ 25 جىلدىعى مەن ۇلى جەڭىس كۇنىنە ارنالىپ وتكىزىلگەن مەرەكەلىك شارالار بىرنەشە كۇنگە سوزىلدى. قالانىڭ ءار اۋماعىندا اشىق اسپان استىندا جانە مادەني وشاقتاردا ءتۇرلى كونتسەرتتەر ۇيىمداستىرىلدى.
«استانا» كونتسەرت زالىندا قايرات باەكەنوۆ, رۇستەم نۇرجىگىت, رينات مالتساگوۆ جانە وزگە دە بەلگىلى ەسترادا انشىلەرى مايدان اندەرىن شىرقادى. اسىرەسە, مارجان اراپباەۆا ايتقان اقىن امانجول شامكەنوۆتىڭ ولەڭىنە جازىلعان كومپوزيتور جاقسىگەلدى سەيىلوۆتىڭ «انا تۋرالى باللادا» جانە دينارا تۇڭعىشباەۆا شىرقاعان سەيدوللا بايتەرەكوۆتىڭ «ءاليا» اندەرى كورەرمەندەردى بەيجاي قالدىرمادى.
كونتسەرتتە قورشاۋدا قالعان لەنينگراد تۇرعىندارىنا رۋح بەرگەن جىر الىبى – جامبىلدىڭ «لەنينگرادتىق ورەنىم» ولەڭىن قاللەكي تەاترىنىڭ ءارتىسى جانىبەك مۇساەۆ اسەرلى وقىدى. مۋزىكانت ورالحان التىنبەكوۆ كەڭەس وداعىنىڭ باتىرى, قازاقستان رەسپۋبليكاسىنىڭ تۇڭعىش قورعانىس ءمينيسترى, حالىق قاھارمانى ساعادات نۇرماعامبەتوۆكە ارنالعان «ساعادات» اتتى پاتريوتتىق كومپوزيتسيانى ورىندادى.
وسىعان ۇقساس كونتسەرت «استانا وپەرا» تەاترىندا «جەڭىس اندەرى, كوكتەم اۋەندەرى» اتاۋىمەن ءوتتى. وعان تەاتردىڭ جەتەكشى سوليستەرى قاتىستى. كەشتە قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ ديريجەرلىك ەتكەن وركەستردىڭ سۇيەمەلدەۋىمەن مايرا مۇحامەدقىزى, دينا حامزينا, جانات شىبىقباەۆ, تالعات مۇساباەۆ, ايگۇل نيازوۆا سىندى وپەرا ورىنداۋشىلارى سوعىس جىلدارىندا شىققان بارشامىزعا تانىس اندەردى عانا ايتپاي, قازاق, ورىس جانە باتىس ەۋروپا كلاسسيكاسىمەن كورەرمەندەردى سۋسىنداتتى. سونداي-اق, ەرجان ءداۋىتوۆ جەتەكشىلىك ەتەتىن تەاتر حورى دا ونەر كورسەتتى.
قالا تۇرعىندارى مەن قوناقتارى قالانىڭ ورتالىق الاڭىندا وتكەن «ءان – جەڭىستىڭ سەرىگى» اتتى اسكەري-پاتريوتتىق اندەردىڭ قالالىق بايقاۋىنىڭ گالا-كونتسەرتىن دە تاماشالادى. وسى جەردە جانە «ستۋدەنتتىك» ساياباعىندا ءان مەن جىر كەشكە دەيىن توگىلدى. ال 7 جانە 9 مامىر كۇندەرى وتكەن شارالار ەسىل وزەنى جاعالاۋىنداعى وتشاشۋمەن اياقتالدى.
امانعالي قالجانوۆ
