«جەرۇيىق» ساياباعى جاڭعىرتىلادى

كەلەسى جىلى ەلورداداعى «جەرۇيىق» ساياباعى تولىعىمەن جاڭعىرتىلادى. نىساندا سپورتپەن اينالىساتىن جانە بالالار وينايتىن الاڭدار سالىنادى. اتاپ ايتقاندا, باسكەتبول, ۆولەيبول, فۋتبول, تەننيس, ت.ب. سپورت تۇرلەرىمەن شۇعىلدانۋعا جاعداي جاسالادى. سكەيت جانە ۆوركاۋت ايماقتارى اشىلادى. ءتيىستى ينجەنەرلىك جەلىلەر تارتىلىپ, كارىز جۇيەسىنىڭ قۇرىلىسى جۇرگىزىلەدى. مۇنى الماتى اۋدانىنىڭ اكىمى بەكتەنباي ەسپولوۆ مالىمدەدى. اۋدان تۇرعىندارى اراسىندا جۇرگىزىلگەن ساۋالنامانىڭ ناتيجەسىندە ساياباقتىڭ جاڭا كەلبەتىنىڭ جوباسى ازىرلەندى.

گۇلزارلار ۇلعايىپ, ۆەلوجولدار ۇزاردى

بيىلعى جىلى اۋداندى اباتتاندىرۋ باعىتىندا ءبىرشاما ىستەر ەڭسەرىلدى. سونىڭ ىشىندە ترياتلون, پرەزيدەنتتىك جانە ەسىل وزەنى جاعالاۋىنداعى ساياباقتار ۆەلوجولدار مەن جاياۋ جۇرگىنشىلەر جولدارىن قوسۋ ارقىلى بىرىكتىرىلدى. بۇل جۇمىس قالا اكىمىنىڭ تاپسىرماسىمەن جەدەلدەتىلىپ, ەكى ايدىڭ ىشىندە اتقارىلدى. قورىتىندىسىندا قوسىلعان دەمالىس ايماقتارىنىڭ جالپى كولەمى 250 گەكتاردى قۇرادى.
– ساياباقتاردى بىرىكتىرۋدىڭ ناتيجەسىندە گۇلزارلاردىڭ كولەمى 1,9 ميلليون شارشى مەتردەن استى. ۆەلوجولدار ۇزىندىعى 20 شاقىرىمعا جەتتى. ەكى باسكەتبول الاڭى, وسىنشاما فۋتبول الاڭى سالىنىپ, ۇستەل تەننيسىنە ارنالعان بەس ۇستەل ورناتىلدى. بالالاردىڭ ويىن الاڭى, ۆوركاۋت ايماقتار, كوگالدا دەمالۋعا ارنالعان 13 ايماق اشىلدى. ەسىل وزەنى جاعالاۋى بويىندا اتكەنشەكتەر قويىلدى, – دەيدى ب.ەسپولوۆ.

قوعامدىق كەڭىستىكتەر كوبەيدى

سونىمەن قاتار قوعامدىق كەڭىستىكتەردى اباتتاندىرۋ جۇمىسى قارقىندى جۇرگىزىلدى. جالپى, بيىل الماتى اۋدانىندا ادامداردى تارتاتىن 18 ايماق كوركەيتىلدى. بۇل جۇمىستان شەت ايماقتار دا شەت قالعان جوق. قوعامدىق كەڭىستىكتەر «ميچۋرينو», «كۇيگەنجار», «پرومىشلەننىي» تۇرعىن الاپتارىندا اشىلدى.
قىركۇيەك ايىنىڭ ورتاسىندا م1 («ارقار») كوپىرى استىندا جاڭا دەمالىس ايماعى پايدالانۋعا بەرىلدى. وندا گراففيتيلەر بەينەلەنىپ, سپورت الاڭدارى ورناتىلدى. جارىقتاندىرىلعان دەمالىس ورنى بىرنەشە ايماققا ءبولىندى. ۆوركاۋتقا, كروسسفيتكە ارنالعان ايماقتار, بالالار الاڭى سالىندى.
– بۇل ەلورداداعى عانا ەمەس, ءبىرتۇتاس قازاقستانداعى تازا اۋادا سپورتپەن, سونىڭ ىشىندە اۋىر اتلەتيكامەن اينالىسۋعا مۇمكىندىك بەرەتىن بىرەگەي ورىن. بولاشاقتا وسىنداي دەمالىس ايماقتارى كوبەيەدى دەپ ويلايمىن. ارينە, وسى جوبانى جۇزەگە اسىرعاندا سپورتپەن جانە شىعارماشىلىقپەن اينالىساتىن جاستارعا ونىڭ قاۋىپسىز جانە پايدالى بولۋىن ويلاستىردىق. بۇل سپورت ايماعىنا عانا ەمەس, دالا ونەرىنىڭ ارت-گالەرەياسىنا اينالدى. ايماقتى بەزەندىرۋگە ءارتۇرلى قالالاردا تۇراتىن سۋرەتشىلەر قاتىستى, – دەيدى اۋدان اكىمى.

اۋلالار اباتتاندى

بۇگىندە اۋداندا 420 اۋلا بولسا, سونىڭ 396-سى, ياعني 95 پايىزى اباتتاندىرىلعان. وسى جىلى 33 اۋلانى كەشەندى اباتتاندىرۋ جۇرگىزىلسە, 75-ءىن جوندەۋ-قالپىنا كەلتىرۋ جاسالدى. «وڭتۇستىك-شىعىس» تۇرعىن الابىندا ب.مومىشۇلى 16, ىلە 30 جانە ­ر.قوشقارباەۆ 80/1, مەكەنجايلارىنىڭ اۋلالارى كوركەيتىلدى. «ينتەرناتسيونالنىي» جانە «جەلەزنودوروجنىي» تۇرعىن الاپتارىندا ەكى شاعىن باق سالىنىپ, فۋتبول جانە بالالار الاڭدارى ورناتىلدى.
– كەيىنگى ءۇش ايدا اۋدانداعى اۋلالاردىڭ جارتىسىن ارالاپ شىقتىم. سونىڭ بارىسىندا ءبىر كەمشىلىكتى بايقادىم. اباتتاندىرىلعان اۋلالاردا شاعىن ارحيتەكتۋرالىق فورمالاردىڭ ءبارى قارا جەرگە ورناتىلعان. سول سەبەپتەن ءبىر قاراعان ادامعا سۇرقاي كورىنىس بولىپ ەلەستەيدى. تۇرعىنداردىڭ وتىنىشىمەن ءبىز بارلىق الاڭعا جاساندى گازون توسەيمىز دەپ شەشتىك. قورىتىندىسىندا بيىل بىرنەشە اۋلادا مۇنى جۇزەگە اسىردىق. باسقا اۋلالاردا دا بۇل جۇمىس جالعاسادى, – دەيدى ب.ەسپولوۆ.

تۇرعىندار وتىنىشتەرىنە قۇلاق اسقاندا

ءبىر ايتا كەتەرلىگى, الماتى اۋدانىنىڭ باسشىلىعى تۇرعىنداردىڭ وتىنىشتەرىنە قۇلاق اسۋعا تىرىسادى. جالپى العاندا اتالمىش اۋداندا 300 مىڭنان اسا ادام تۇرسا, وعان قاراستى التى تۇرعىن الاپتى 95 مىڭ ادام مەكەندەيدى. ولار اكىمدىككە تىكەلەي جانە الەۋمەتتىك جەلىلەر, iKomek109 قىزمەتى ارقىلى وتىنىشتەرىن جولداپ جاتادى.
– اۋدانىمىزدىڭ تۇرعىندارى وتە بەلسەندى. ماسەلەن, وتكەن جىلى 14 مىڭ ءوتىنىشتى قاراساق, وسى جىلدىڭ توعىز ايىندا 18200 ءوتىنىش كەلىپ ءتۇستى. «ادالدىق الاڭى» جوباسىنىڭ اياسىندا فرونت-كەڭسەگە بىلتىر 10 مىڭنان اسا ادام جۇگىنسە, وسى جىلى 7 مىڭ ادام وتىنىشتەرىن جىبەردى. بۇل كەڭسەدە وتىنىشتەردى قالدىرۋمەن قاتار ءارتۇرلى مەملەكەتتىك قىزمەتتەردى الۋعا بولادى. تۇرعىندارمەن قارىم-قاتىناسقا ارنالعان بۇل وتە ىڭعايلى فورمات. بولاشاقتا تاعى وسىنداي بىرنەشە كەڭسە اشۋدى جوسپارلاپ وتىرمىز, – دەيدى ب.ەسپولوۆ.
ونىڭ ايتۋىنشا, اۋدان بيۋدجەتىنىڭ اشىقتىعىن قامتاماسىز ەتۋ ماقساتىندا ينتەراكتيۆتى كارتامەن جۇمىس جۇرگىزىلەدى. بۇل رەسۋرس بيۋدجەتكە قاتىستى بارلىق مالىمەتپەن تانىسۋعا مۇمكىندىك بەرەدى.

جولدار جوندەلىپ, كوشەلەر جارىقتاندىرىلدى

اۋداندا جولداردى سالۋ جۇمىسى دا وزەكتى. مۇندا جالپى ۇزىندىعى 314 شاقىرىمدى قۇرايتىن 365 كوشە بولسا, سونىڭ 84-ىندە اسفالت جوق. بۇل – 59 شاقىرىم. وسى جىلى 39 كوشەگە اسفالت سالۋ جوسپارلانعان. سونىڭ 33-ىندە ءتيىستى جۇمىستار اياقتالدى. اۋدان اكىمى قالعان 6 كوشەنى جىل سوڭىنا دەيىن سالىپ بىتىرەمىز دەپ وتىر.
جارىقتاندىرۋعا كەلسەك, بۇل تاراپتا ءىس ءبىراز ىلگەرىلەدى. بىراق اتقارىلاتىن جۇمىستار ءالى دە بارشىلىق. اتاپ ايتقاندا, 365 كوشەنىڭ 29-ى جارىقتاندىرىلماعان. 420 اۋلانىڭ 18-ءى قاراڭعىعا باتىپ وتىر. وسى اۋلالاردى ىشكىورامدىق باعدارلاما ارقىلى جارىقتاندىرۋ جوسپارلاندى. وسى جىلى 17 ورتالىق كوشە مەن كۇرە جولداردىڭ بويىندا 3 مىڭ شام اۋىستىرىلدى.
بيىلعا جوسپارلانعان كوگالداندىرۋ جۇمىسى اياقتالۋعا جاقىن. وسى جىلى اۋدان اۋماعىندا 3 مىڭ اعاش وتىرعىزىلدى.

قىستىڭ قامىن ويلاعاندا

قىس – قىر استىندا. وتكەن جىلى قالاعا قاردىڭ مول تۇسكەنى ەلدىڭ ەسىندە. سونى ەسكەرىپ, اۋدان اكىمدىگى بيىل اۋلالاردان قار شىعارۋ ءۇشىن بولەك التى بريگادانى قۇرماق. قازىرگى تاڭدا مەردىگەرلەرمەن سانيتارلىق تازالاۋ مەن قىسقا دايىندىق بارىسى جان-جاقتى تالقىلانىپ جاتىر.
گازداندىرۋ جوسپارىنا سايكەس «جەلەزنودوروجنىي» تۇرعىن الابىنا ءتيىستى جەلىلەردى تارتۋ جۇمىسى تولىعىمەن اياقتالدى. «پرومىشلەننىي» تۇرعىن الابىندا بۇل ءىس اياقتالۋعا جاقىن. تۇرعىندارعا گازعا قوسىلۋ ماسەلەسىن ءتۇسىندىرۋ ماقساتىندا ولار الاياقتارعا الدانباس ءۇشىن ج.جاباەۆ 12/2 جانە شالكودە 3, مەكەنجايلارىندا ەكى فرونت-كەڭسە اشىلدى. وسى كەڭسەلەردە سەنىمدى 30 مەردىگەردىڭ قىزمەتى ۇسىنىلادى.