بيىل ەلوردا جاسىل جەلەككە اينالعالى تۇر. استانا اكىمدىگى ەلوردانىڭ 20 جىلدىعىنا وراي قالا اۋماعىن جاپپاي كوگالداندىرىپ, تۇرعىندارعا ىڭعايلى كەڭىستىك پەن وتباسىلىق دەمالىس ورنىن جاساۋعا ەكپىن بەرىپ وتىر.
«قالانىڭ وڭ جاعالاۋىن ساياباق پەن گۇلزارلارعا اينالدىرۋ ءبىز ءۇشىن وتە ماڭىزدى. ەسكى سۇرىلگەن ۇيلەردىڭ ايماعىن ءبىز كوممەرتسيالىق نىساندارعا بەرمەستەن بۇرىن, تۇرعىنداردىڭ ءوتىنىشى بويىنشا ول جەرلەرگە بالالار مەن ۇلكەندەرگە ارنالعان سپورت الاڭى بار گۇلزارلار مەن جەلەكجولدار سالامىز. وسى جىلى وڭ جاعالاۋدا 13 گۇلزار, كەلەسى جىلى 5 گۇلزار جايقالىپ تۇرماق. بوتانيكالىق باق پەن لينەينىي ساياباعى, «اراي» ساياباعىن قايتا جوندەۋ جۇمىستارى اياقتالۋعا تاياپ قالدى. جالپى العاندا, 18 نىسانعا 85 بالالار ويىن اتتراكتسيونى مەن 115 سپورت جابدىعى, 18 فۋتبول, باسكەتبول, تەننيس الاڭى, 17 كم ۆەلوجول, 30 سۋبۇرقاق كەشەنى, 12 كم جۇگىرۋ جولى, 2 سكەيت-الاڭ سالىنادى. وسىنىڭ ءبارى قالالىق ورتانىڭ ساپاسىن جاقسارتاتىنىنا سەنىمدىمىن» دەپ اتاپ ءوتتى اسەت يسەكەشەۆ جۇمىس بابىمەن قالا اۋماعىن ارالاۋ بارىسىندا. استانا اكىمى جاۋاپتى تۇلعالارعا 2018 جىلدىڭ 1 شىلدەسىنە دەيىن 7 ساياباق پەن گۇلزاردىڭ قۇرىلىسىن اياقتاۋدى, ال جىل سوڭىنا دەيىن 6-ۋىن, 2019 جىلى 5 گۇلزار مەن بۋلۆاردىڭ قۇرىلىسىنا كىرىسۋ كەرەكتىگىن تاپسىردى. وسى ايتىلعان ساياباقتار مەن گۇلزاردىڭ بارىنە 120 گەكتار جەر ءبولىندى.
«چەمودان ساياباعى»
بيىل جانە كەلەسى جىلى ەلوردادا سالىناتىن ءاربىر ساياباق پەن بۋلۆارلار بەلگىلى ءبىر ستيلمەن ورنەكتەلىپ, ارنايى تاقىرىپقا ساي بەزەندىرىلەدى. ەلوردانىڭ مەرەيتويى قارساڭىندا ءبىرجان سال كوشەسىندەگى №5 ءۇيدىڭ ماڭايىنا سالىنىپ جاتقان گۇلزاردىڭ قۇرىلىسى اياقتالادى. قۇرىلىس بارىسىندا گۇلزارعا «چەمودان ساياباعى» دەگەن اتاۋ بەرىلدى, سەبەبى ونىڭ اۋماعى تەمىرجول ۆوكزالىنان الىس ەمەس جانە شاعىن ساۋلەتتىك فورماسى چەمودان ۇلگىسىندە سالىنۋدا. اۆتوردىڭ ويىنشا, مۇندا بالالار تەمىرجولى پايدا بولماق. سول سەبەپتى قۇرىلىسشىلار شويىن جول توسەي باستادى. تاعى ءبىر گۇلزار پۋشكين كوشەسىندە №15 ب ءۇيىنىڭ ماڭايىندا سالىنىپ جاتىر, ونى «قىتاي قورعانى» دەپ اتايدى. مۇندا بالالار الاڭى مەن سپورت جابدىقتارى ورناتىلادى. جەرگىلىكتى تۇرعىندار اتالمىش گۇلزاردا ۇلتتىق اسىق اتۋ ويىنىن دا ۇيىمداستىرا الادى.
«عارىشكەرلەر گۇلزارى»
تاعى ءبىر دەمالىس ورنى رەسپۋبليكا مەن دۇكەنۇلى داڭعىلىنىڭ قيىلىسىندا سالىنىپ, «استرونومدار مەن عارىشكەرلەر گۇلزارى» دەگەن اتاۋعا يە بولادى. مۇندا سكەيتدروم, قوعامدىق تاماقتانۋ ورنى, ەيمس – ۇشجاقتى وپتيكالىق يلليۋزيادان جاسالعان قيسىق اينالار بولمەسى ورنالاسادى. گۇلزاردا توبەشىك سىرعاناقتار مەن بالالار الاڭقايى دا ۇمىت قالمايدى. 2018 جىلدىڭ سوڭىنا دەيىن مايلين كوشەسىندەگى №9 ءۇيدىڭ جانىندا تاعى ءبىر گۇل باعى بوي كوتەرەدى. ونىڭ اۋماعىنا فۋتبول, باسكەتبول, بالالار ويىن الاڭى, سپورتتىق جابدىقتار جانە اسىق وينايتىن ورىندار سالىنادى. سارىارقا داڭعىلىنداعى №27 ءۇي اۋدانىندا تاستاردان جاسالعان گۇل باعى پايدا بولادى. ساياباقتىڭ ىشىندە تاستار وتە كوپ, سىرتتاي قاراعاندا جاپوندىق تاس ساياباعىن ەسكە سالادى. بۇدان باسقا, گۇلزاردا ساۋدا پاۆيلوندارى, بالالار ويىن الاڭى, سپورت جابدىقتارى دا قاراستىرىلادى. وسى اۋدانداعى №23 ءۇيدىڭ ماڭايىنا ماتەماتيكالىق گۇلباق پايدا بولادى. جوبا بويىنشا مۇندا شاحمات بۇرىشى, شەشىمىن تاپپاعان اللەيا, «سينۋسويد تاقتاسى», بالالار ويىن الاڭى, سپورت جابدىعى, ۆەلوسيپەدشىلەر تۇراعى قاراستىرىلدى.
ادەبيەت بۋلۆارى
اباي داڭعىلىندا, سەمبينوۆ كوشەسىنەن «ەگەمەن قازاقستان» گازەتى» كوشەسىنە دەيىن سالىناتىن بۋلۆارعا «تەاتر» دەگەن اتاۋ بەرىلىپ, ول جەرگە امفيتەاتر سالىنادى. اباي داڭعىلى بويىنشا كۇلتوبە كوشەسى ۋچاسكەسىنەن سەمبينوۆ كوشەسىنە دەيىن, «ەگەمەن قازاقستان» گازەتى» جانە بەيسەكباەۆ كوشەلەرى ارالىعىندا ادەبيەت بۋلۆارى پايدا بولادى. بۇل بۋلۆاردىڭ سىرتتاي كورىنىسى كىتاپ سياقتى بولادى, ونىڭ اۋماعىنا كىتاپ سورەلەرى مەن وقىرماندار ءۇشىن ورىندىقتار قويىلادى. بۋلۆاردا ويىن الاڭقايلارى مەن سپورت جابدىقتارى دا ورنالاستىرىلادى.
2019 جىلى استانادا تاعى 4 گۇلزار مەن ءبىر بۋلۆار اشىلادى. ونىڭ ءبارى دە مولداعۇلوۆا كوشەسىندە پايدا بولادى. جوبانىڭ اۆتورى شاعىن ارحيتەكتۋرالىق فورمانى جانۋارلار مەن وسىمدىكتەر تۇرىندە ورنالاستىرىپ شىعادى. قالعان گۇلزارلار جەڭىس داڭعىلى, ەسەنبەرلين, جەلتوقسان كوشەلەرىندە جاسالادى. جەڭىس داڭعىلى مەن جانگەلدين كوشەسىنىڭ قيىلىسىنان دا جاڭا گۇلزار سالىنادى.
