ۇلتتىق اكادەميالىق كىتاپحانادا اتالمىش رۋحانيات ورداسى جانە جازۋشىلار وداعىنىڭ نۇر-سۇلتان قالالىق فيليالىنىڭ قولداۋىمەن جازۋشى-پۋبليتسيست, اۋدارماشى, مارقۇم مارال حاسەننىڭ جەتى تومدىق تاڭدامالى ەڭبەكتەرىنىڭ تانىستىرىلىمى مەن «قالامگەر مۇراسى» اتتى كىتاپ كورمەسى ءوتتى. جەتى تومدىقتى جازۋشىنىڭ جارى رىمبالا سمايىلوۆا قۇراستىردى.
مارال حاسەن وتكەن عاسىردىڭ الپىسىنشى جىلدارىنان بەرى ءتۇرلى باسىلىمداردا ەڭبەكتەندى. ءومىرىنىڭ قىرىق جىلىن جۋرناليستيكاعا ارنادى. ەڭبەك جولىن اۋداندىق «جاڭاارقا» جانە «نوۆايا ستەپ» گازەتتەرىنەن باستاپ, وبلىستىق «جەزقازعان تۋى», «ورتالىق قازاقستان» باسىلىمدارىندا ايقىن قولتاڭباسىن قالدىردى. اۋداندىق «اعادىر تاڭى» جانە «اگادىرسكايا نوۆ» گازەتتەرىنىڭ ۇيىمداستىرۋشىسى, العاشقى باس رەداكتورى بولدى.
قالامگەر قازاق جانە ورىس تىلدەرىنە جۇيرىك ەدى. ورىسشادان قازاقشاعا, قازاقشادان ورىسشاعا شەبەر اۋداراتىن ەدى. جەتى تومدىعى سوعان كوز جەتكىزەدى. ونىڭ جارىق كورۋىنە جارى رىمبالا سمايىلوۆانىڭ ەڭبەگى زور. سونىڭ ءبارىن جيناقتاپ, كوز مايىن تاۋىسا كومپيۋتەرگە تەرىپ, وقىرماندارعا ۇسىندى. جالپى قالامگەردىڭ ومىردەن وزعانىنا التى جىلعا جۋىقتاسا, سودان بەرى مۇراسىنىڭ جاڭعىرىپ, ناسيحاتتالۋىنا جارىنىڭ ۇلەسى مول. رىمبالا اپاي ۇلتتىق اكادەميالىق كىتاپحانا ىشىنەن مارال حاسەن شىعارماشىلىعىنا ارنالعان بۇرىشتىڭ اشىلۋىنا دا مۇرىندىق بولدى.
جازۋشىلار وداعىنىڭ حاتشىسى, وسى ۇيىمنىڭ نۇر-سۇلتان قالالىق فيليالىنىڭ ديرەكتورى, اقىن داۋلەتكەرەي كاپۇلى جۇرگىزگەن جەتى تومدىقتىڭ تانىستىرىلىمىندا بەلگىلى عالىم, جازۋشى, فيلولوگيا عىلىمدارىنىڭ دوكتورى تۇرسىن جۇرتباي قالامگەر جارىنىڭ ەڭبەگىن اتاپ ءوتىپ, كىتاپتى قادىرلەۋ توڭىرەگىندە ويىن ءوربىتتى. مارال حاسەننىڭ شاكىرتى, ارداگەر جۋرناليست, جۋرناليستەر وداعىنىڭ قاراعاندى وبلىستىق فيليالى توراعاسىنىڭ ورىنباسارى ءالي تويجىگىتوۆ ۇستازىنىڭ جارقىن بەينەسىن ەسكە الىپ, اتالمىش فيليال اتىنان جارىنا سىي-سىياپات جاسادى. زاڭگەر عالىم بولات سىزدىق, مەديامامان مەيرامحان جاپەك, قالامگەردىڭ دوستارى, «ورتالىق قازاقستان» گازەتىنىڭ ءبولىم مەڭگەرۋشىسى, اقىن جالەل شالقار قالامگەردىڭ ەڭبەگى تۋرالى اڭگىمەلەدى. قاراعاندى وبلىسىنىڭ تىلدەردى دامىتۋ جونىندەگى باسقارمانىڭ ءبولىم باسشىسى اسەت امانجولوۆ اتالمىش باسقارما اتىنان قۇرمەت كورسەتتى.
مارال حاسەننىڭ ءبىر قىرى انشىلىگى ەدى. قالامگەردىڭ باۋىرى, قازاق ۇلتتىق ونەر ۋنيۆەرسيتەتىنىڭ وقىتۋشىسى سىرىم مۇحامەدجانوۆ اعاسى ءسۇيىپ شىرقاعان «اقىلبايدىڭ ءانىن» سالدى. جازۋشىنىڭ نەمەرەسى ايا مارال اتاسى جاقسى كورگەن «ياپۋراي» ءانىن گيتارادا ورىنداپ, ءتانتى ەتتى. تانىستىرىلىمدى قالامگەردىڭ جارى رىمبالا سمايىلوۆا تۇيىندەپ, جينالعاندارعا العىس ايتتى.
