نۇر-سۇلتان قالاسى مەملەكەتتىك اكادەميالىق فيلارمونياسى قوعاممەن بايلانىس جانە حالىقارالىق قاتىناستار ءبولىمىنىڭ جەتەكشىسى مەيرامعازى ساپارعاليەۆ تاۋەلسىزدىكتىڭ وتىز جىلىندا ەلىمىز قول جەتكىزگەن جەتىستىكتەر تۋرالى ايتتى.
«تاۋەلسىزدىك العاننان بەرى كوپتەگەن جەتىستىككە قول جەتكىزدىك. العاشقى جىلدارى بىرقاتار قيىندىق بولدى. «كوش جۇرە تۇزەلەدى» دەمەكشى, كەيىننەن كوپتەگەن مەملەكەتتىك باعدارلامالار جۇزەگە استى. تۇرعىنداردىڭ نەگىزگى ماسەلەسى باسپانا بولعاندىقتان, بۇل تۇرعىدا دا ءتۇرلى مەملەكەتتىك باعدارلامالار ىسكە اسىرىلىپ, ءارتۇرلى جەڭىلدىكتەر كورسەتىلىپ, جۇيەلى جۇمىستار جۇرگىزىلىپ جاتىر. مادەنيەت سالاسىندا دا كوپتەگەن اۋىز تولتىرىپ ايتارلىقتاي جەتىستىكتەر بار. تارلاندارىمىز ەلىمىزدى شەتەلدەردە تانىتىپ ءجۇر. سولاردىڭ ءبىرى – ديماش قۇدايبەرگەن. سونىمەن قاتار ەندى عانا جارق ەتىپ شىعىپ جۇرگەن ەرجان ماكسيم, دانەليا تولەشوۆا سياقتى بالالارىمىز دا ەلىمىزدىڭ اتىن الەمگە پاش ەتۋدە. ولاردىڭ بارلىعى مەملەكەتتىڭ مادەنيەتكە كوڭىل ءبولۋىنىڭ ارقاسى دەۋگە بولادى» دەدى ول.
ونىڭ ايتۋىنشا, قازاقستان تاۋەلسىزدىگىن العان وتىز جىل ىشىندە جەتكەن جەتىستىكتەرىنىڭ قاتارىنا ەلىمىزدە وتكەن ۇلكەن-ۇلكەن حالىقارالىق ءىرى ساياسي جيىندار, سپورتتىق شارالاردى جاتقىزۋعا بولادى.
قىسقى ۋنيۆەرسيادا, ازيادا سياقتى سپورتتىق شارالار ارقىلى دا شەتەلدىك سپورتشىلار, جانكۇيەرلەر ەلىمىزگە كەلىپ, قازاقستاندى تانىدى. سول سياقتى ەلىمىزدى الەمگە تانىتقان شارانىڭ ءبىرى – «ەكسپو» حالىقارالىق كورمەسى.
