«استانا اقشامى» گازەتىندە مامىر ايىنىڭ 31-ءشى جۇلدىزىندا سەناتور ساۋلە ايتپاەۆانىڭ بالالاردى قورعاۋ ماسەلەسىنە قاتىستى شىققان سۇحباتىن وقىدىم. اڭگىمەگە ارقاۋ رەتىندە سەناتور پرەزيدەنت تاپسىرماسىمەن ءبىلىم بەرۋ جانە دەنساۋلىق ساقتاۋ مينيسترلىكتەرى «ساندج» قوعامدىق قورىمەن بىرلەسىپ جۇرگىزگەن ساۋالناما ناتيجەسىن ايتىپتى.
«بالالار بوس ۋاقىتىن قالاي وتكىزەدى؟» دەگەن ساۋالعا 12-15 جاس ارالىعىنداعى بالالاردىڭ 30-70 پايىزى «عالامتور, الەۋمەتتىك جەلىدە وتىرامىن» دەپ جاۋاپ بەرگەن. ولاردىڭ عالامتوردان نە كورىپ جۇرگەنىن بىلمەيتىنىمىز انىق. وسى كەزدە بارلىق جاۋاپكەرشىلىك اتا-اناعا تۇسەدى. اتا-انا ءوز بالاسىن عالامتور زاردابىنان قورعاي الىپ جاتىر ما؟ تىم قۇرىعاندا الەۋمەتتىك جەلىدە كىممەن سويلەسىپ, قانداي جەلىگە قوسىلىپ, نە كورىپ جۇرگەنىن بىلە مە؟ ساۋالنامانىڭ تاڭقالارلىق ءبىر تۇسى – بالالاردىڭ 1,9 پايىزى «بوس ۋاقىتىم جوق» دەپ جاۋاپ بەرگەن ەكەن. سوندا بالالار كۇن سايىن 24 ساعات ۋاقىتىن قالاي وتكىزەدى؟ بوس ۋاقىتى بولمايتىنداي, ءبىلىم الىپ, باس الماي كىتاپ وقىپ ءجۇر مە, الدە ەڭبەككە جەگىلە مە؟ مۇمكىن سپورتپەن اينالىساتىن شىعار؟ بىراق بۇل كۇماندى…
عالامتور ارقىلى ۆيرتۋالدى الەمگە ۇيرەنىپ كەتكەن بالا, شىن ومىردە عالامتوردان كورگەنىن جاسايدى. الەۋمەتتىك جەلى ارقىلى الدانىپ, اقشا تاباسىڭ دەپ قۇرىققا ءتۇسىرىپ, ارتىنان ول وقيعالار سۋيتسيدپەن اياقتالىپ جاتقاندارى دا از ەمەس. وسى ماسەلەلەردىڭ الدىن الۋ ءۇشىن, مەنىڭشە, بالانى قورعاۋدى تۋعانىنان باستاۋ كەرەك. «ول قالاي؟» دەپ وتىرعان شىعارسىز, ول – بالانى دۇنيەگە كەلگەن ساتتەن مەيىرىمگە بولەۋ, بالانىڭ ومىرگە دەگەن قىزىعۋشىلىعىن ارتتىرۋ. وسە كەلە بالانى ءارتۇرلى ۇيىرمەلەرگە بەرۋ. سولاي وسكەن بالا وزىنە نە كەرەكتىگىن بىلەتىن, ماقساتى ايقىن بولادى. بالانىڭ دۇرىس ادام بولىپ قالىپتاسۋى تىكەلەي اتا-اناعا بايلانىستى.
سوندىقتان, مەنىڭ ويىمشا, بالالاردى عالامتور جەتەگىنە جىبەرىپ قويا سالماعان ابزال. بۇگىن بالالاردىڭ 70 پايىزى عالامتوردا وتىرسا, بۇل بالالاردىڭ بولاشاعىنا ەل بولىپ ءبارىمىز الاڭداۋىمىز كەرەك.
جادىرا شىناربەك,
ل.ن.گۋميلەۆ اتىنداعى
ەۋرازيا ۇلتتىق
ۋنيۆەرسيتەتىنىڭ
ستۋدەنتى
