ەلوردادا كوللەدج ستۋدەنتتەرى اراسىندا ۇيىمداستىرىلعان «قازاق قىزى» جانە «اكە – بالاعا سىنشى» بايقاۋلارىنىڭ جەڭىمپازدارى انىقتالدى. قىزدار اراسىندا كولىك جانە كوممۋنيكاتسيا كوللەدجى ستۋدەنتى ينديرا كەڭەس ءتورت كەزەڭنەن سۇرىنبەي ءوتىپ, جەڭىمپاز اتاندى. ال جىگىتتەردىڭ ىشىنەن تۇران-پروفي كوللەدجىنىڭ ستۋدەنتى جاڭاۇلان بالتابەكوۆ سۋىرىلىپ شىقتى.
بايقاۋ قالالىق ىشكى ساياسات باسقارماسىنىڭ قولداۋىمەن «بولاشاققا باعدار: رۋحاني جاڭعىرۋ» باعدارلاماسى اياسىندا وتكىزىلدى. ماقسات – قازاق قىزدارىنا ءتان يناباتتىلىقتى بويجەتكەندەردىڭ بويىنا ءسىڭىرۋ, قوعامداعى اكە ءرولىن ايقىنداۋ, سونداي-اق, وتباسىلىق, مادەني, رۋحاني قۇندىلىقتاردى ناسيحاتتاۋ.
شارا الدىندا ءجاسوسپىرىم قىزدار اراسىندا قوعام قايراتكەرى ورازكۇل اسانعازى «بويجەتكەن نازارىنا» اتتى تاربيە ساعاتىن وتكىزدى. وندا قازاق قىزىنا ءتان تاربيە, يناباتتىلىق, يبالىلىق, ىزەتتىلىك جايى ءسوز بولعان.
«ەلباسى ماقالاسىندا ءار ۇلتتىڭ ۇلتتىق قاسيەتى بولادى دەلىنگەن. انا ءبىر قولىمەن بەسىكتى, ءبىر قولىمەن الەمدى تەربەتەدى. ۇلتتى ۇلت ەتەتىن – سول ۇلتتىڭ قىزدارى, سول سەبەپتى دە بۇگىنگى سايىستا قىزداردىڭ تاربيەسىنە باسا نازار اۋدارىلىپ وتىر. مۇنى ۇلت بولاشاعىن ويلاۋدىڭ قامى دەپ ءبىلىڭىز. ەگەر ايەل انا تىلىندە سويلەسە, ۇلت انا تىلىندە سويلەيدى» دەپ ءسوز سويلەدى ادىلقازىلار القاسىنىڭ ءتورايىمى ورازكۇل اسانعازىقىزى.
جىگىتتەر قاۋىمى دا ونەرلەرىن ورتاعا سالۋدان ايانىپ قالمادى. ءوزىن-ءوزى تانىستىرۋدان كەيىن بوزبالالار حالقىمىزدىڭ سالت-ءداستۇرى مەن تاريحىنا قاتىستى سۇراقتارعا جاۋاپ بەردى. ال «ونەرىم – ءومىرىم» كەزەڭىندە قاتىسۋشىلار ءان ايتىپ, بي بيلەپ, ۇلتتىق اسپاپتا وينادى. اقتىق سايىستا جىگىتتەر اۋىر گىر تاسىن كوتەرىپ, بىلەك كۇشىن سىنادى.
ايتا كەتەيىك, سايىس وسىمەن ەكىنشى جىل قاتارىنان وتكىزىلدى.
گۇلدانا تالعاتقىزى
