ءۇش جىلدان استام ۋاقىت بۇرىن ەلوردادا قر سىبايلاس جەمقورلىققا قارسى ءىس-قيمىل اگەنتتىگىمەن قالا اكىمدىگىنىڭ سىبايلاس جەمقورلىققا قارسى تەڭدەسسىز بىرىككەن «استانا – ادالدىق الاڭى» جوباسى باستاۋ العانى بەلگىلى. ول اسا ايقىن الەۋمەتتىك باعىتتىلىققا يە. ونىڭ نەگىزگى ماقساتتارى – تۇرمىستىق سىبايلاس جەمقورلىقتى تومەندەتۋ, مەملەكەتتىك قىزمەتتەر ساپاسىن ارتتىرۋ, مەملەكەتتىك ورگاندار قىزمەتىنىڭ اشىقتىعى مەن ايقىندىعى جولىمەن بيلىك ورگاندارىنا دەگەن حالىق سەنىمىن جوعارىلاتۋ.
جيىننىڭ اشىلۋىنا قاتىسقان نۇر-سۇلتان قالاسى ەسىل اۋدانىنىڭ اكىمى بەرىك جاكەنوۆ ءسوز سويلەپ, جازيرا جاقسىلىققىزىنا جاڭا ەڭبەگىنە قۇتتى بولسىن ايتتى. «جازيرا جاقسىلىققىزى, جاڭا كىتابىڭىز قۇتتى بولسىن. بۇل تەك باستاماسى عانا. ءالى تالاي وسىنداي جوبالارىڭىز كوپ بولادى دەگەن سەنىمدەمىز. كىتاپتى تەك مەملەكەتتىك ورگانداردا عانا ەمەس, مەملەكەتارالىق مەكەمەلەرگە دە جىبەرىلگەنى دۇرىس. وتكەن جولى رەسەي فەدەراتسياسىنىڭ وكىلدەرى كەلىپ, اشىق اكىمدىكتىڭ جۇمىسىمەن تانىستى. جالپى العاندا, اشىق اكىمدىكتىڭ جۇمىسى ول – ىسكە اسىرۋ قۇرالى, ارنايى باعىتى» دەدى بەرىك جاكەنوۆ.
2018 جىلى نۇر-سۇلتان قالاسىنداعى جوبالىق كەڭسەنىڭ جەتەكشىسى جانە كىتاپتىڭ اۆتورى جازيرا جاقسىلىققىزى «استانا – ادالدىق الاڭى» تۇجىرىمداماسىن ازىرلەۋگە, ونىڭ يدەولوگياسىن بەلگىلەۋگە ءوز ۇلەسىن قوستى. جوبا اياسىندا دەنساۋلىق ساقتاۋ, ءبىلىم بەرۋ, ساۋلەت جانە ت.ب. سالالارداعى تۇرمىستىق سىبايلاس جەمقورلىق بارىنشا ازايدى.
«استانا – ادالدىق الاڭى» جوباسى باستاماسىمەن ەلوردادا تۇتىنۋشىلارعا قىزمەت كورسەتەتىن «iQALA» ورتالىعى, سەرۆيستىك اكىمدىكتەر اشىلىپ, «اشىق بيۋدجەتتىڭ ينتەراكتيۆتىك كارتاسى» پلاتفورماسى ەنگىزىلدى. وسى جانە باسقا دا باستامالار تۋرالى كىتاپتا جازىلعان. نۇر-سۇلتان قالاسىندا باستامالاردى تابىستى تۇردە اپروباتسيالاۋ ەلوردا تاجىريبەسىن وڭىرلەردە ەنگىزۋگە مۇمكىندىك بەردى جانە جوبانىڭ رەسپۋبليكالىق اۋقىمعا دەيىن دامۋىنا سەپتىگىن تيگىزدى.
اۆتور ءوز كىتابىندا جوبالىق كەڭسە جەتەكشىسى رەتىندە ءوزىنىڭ قىزمەت كەزەڭىندە ماڭىزدى الەۋمەتتىك سالالارعا جان-جاقتى تالداۋ جۇرگىزىپ, ونى وقىرماندارمەن بولىسەدى. كىتاپ مەملەكەتتىك ورگانداردىڭ قىزمەتكەرلەرىنە, سونىمەن قاتار كوپشىلىك قاۋىمعا ارنالعان.
