ەلورداداعى تسيفرلاندىرۋ جوبالارى جالعاسىن تابادى. قالا تىرشىلىگىن قامتاماسىز ەتۋدە زاماناۋي تەحنولوگيالاردى كادەگە جاراتۋ ىسىنە الداعى 3 جىلدا شامامەن 15 ميلليارد 526 ميلليون تەڭگە كولەمىندە قاراجات قاراستىرىلدى. بۇل تۋرالى نۇر-سۇلتان قالالىق ءماسليحاتىنىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيانىڭ وتىرىسىندا ايتىلدى.
كوميسسيا وتىرىسىندا تسيفرلاندىرۋ جانە مەملەكەتتىك قىزمەت باسقارماسىنىڭ دا 2022-2024 جىلدارعا ارنالعان بيۋدجەتى قارالدى. كەلەر جىلى باسقارما جۇمىسىن ۇيىمداستىرۋ ونداعى تسيفرلاندىرۋ جوبالارىن قامتاماسىز ەتۋگە 5 ميلليارد 206 ميلليون تەڭگەدەي قاراجات بولىنبەك. بۇل قارجىعا «Smart city» جوباسى ىسكە اسىرىلىپ, اقپاراتتىق تەحنولوگيالار ورتالىعى مەن قالالىق قىزمەتتەر ورتالىعىنىڭ قىزمەتىن ۇيىمداستىرىلماق. مۇنان بولەك اقپاراتتى قورعاۋ ءۇشىن مالىمەتتەردى وڭدەۋ ورتالىعىن ىسكە قوسۋ, نۇر-سۇلتان قالاسىنداعى دەنساۋلىق ساقتاۋ نىساندارىن ورتالىقتاندىرىلعان بەينەباقىلاۋ كامەرالارىن ورناتۋ جۇمىستارى دا كوپجىلدىق بيۋدجەت اياسىندا قارجىلاندىرىلادى.
سونىمەن قاتار «سەرگەك» جوباسى اياسىندا فوتوبەينەتىركەۋ مەن بەينەتالداۋ فۋنكتسياسى ىسكە قوسىلادى. بۇل جۇيە قالاداعى قوعامدىق قاۋىپسىزدىكتى ساقتاۋ سالاسىن تسيفرلاندىرۋ مۇمكىندىك بەرمەك.
