سەيسەنبى كۇنى باس قالامىزدا كۇتپەگەن جاعداي ورناپ, قايعىلى جول-كولىك اپاتى بولدى. قالا ماڭىنا قاتىنايتىن №301 اۆتوبۋس جوعارى جىلدامدىقپەن كەلىپ, باعدارشامدا تۇرعان اۆتوبۋسقا سوقتىققان. سالدارىنان 53 جاستاعى جۇرگىزۋشى مەن الدىڭعى قاتاردا وتىرعان 26 جاستاعى جولاۋشى وقيعا ورنىندا كوز جۇمسا, 36 ادام ءتۇرلى دەڭگەيدە جاراقات العان. كەشە قالا اكىمى باقىت سۇلتانوۆ پەن دەنساۋلىق ساقتاۋ ءمينيسترى ەلجان ءبىرتانوۆ ناۋقاستاردىڭ جاعدايىن سۇراپ, №2 اۋرۋحاناعا باردى. سونىمەن قاتار «Astana LRT» باسشىسى بەكمىرزا يگەنبەرديەۆ زارداپ شەككەندەرگە تولەنەتىن وتەماقى جايلى ءتۇسىندىرىپ بەردى.
قالا اكىمى مەن مينيستر ءار ناۋقاسقا بارىپ: «تەزىرەك جازىلىپ كەتىڭىز! سىزگە بىلىكتى دارىگەرلەر كومەك كورسەتىپ جاتىر» دەپ تىلەۋلەستىگىن ءبىلدىردى.
– جول اپاتىنان زارداپ شەككەن 36 ادامعا مەديتسينالىق كومەك كورسەتىلدى. سونداي-اق جەڭىل جاراقات العان 8 ادام وزدىگىنەن كەلىپ تەكسەرىلدى. زارداپ شەگۋشىلەردىڭ اراسىندا بالالار جوق. قازىرگى ۋاقىتتا بىرەۋىنىڭ جاعدايى وتە اۋىر, سول سياقتى 6 ادامنىڭ جاعدايى اۋىر جانە 8 ادامنىڭ دەنساۋلىق جاعدايىن ورتاشا دەپ ايتۋعا بولادى, – دەدى قالالىق قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ.
ال №2 اۋرۋحانانىڭ باس دارىگەرى جەدەل جاردەم ارقىلى جەتكىزىلگەن ءبىر ايەل ارقاسىنان قاتتى جاراقات العاندىقتان نەيروحيرۋرگيا ورتالىعىنا اۋىستىرىلعانىن, قالعان ادامدارعا دەر كەزىندە كومەك كورسەتىلگەنىن ءمالىم ەتتى.
– كەشەگى جول اپاتىنان كەيىن 29 ادامعا كومەك كورسەتتىك. ال 14 جولاۋشى ءتيىستى كومەكتەن كەيىن ۇيىنە جىبەرىلدى. وزگەلەرى ستاتسيوناردا قالدى. سونداي-اق باس-اياعى بەس وتا جاسادىق. ناۋقاستاردىڭ ۇشەۋىنىڭ جاعدايى اۋىر. دەگەنمەن كوبىنىڭ جاعدايى تۇراقتى. سوندىقتان ولاردىڭ ومىرىنە قاۋىپ جوق دەپ ايتا الامىز, – دەدى باس دارىگەر يۆان لي ارنايى وتكەن ءباسپاسوز جيىنىندا.
تاعى ءبىر ايتارلىعى, اپات كەزىندە ءبىر ايەل وتىرعان ورنىندا جانشىلىپ قالىپتى. باس دارىگەردىڭ ايتۋىنشا, جاعدايى اۋىر, سەبەبى ەكى اياعى قاتتى مىجىلىپ قالعان ەكەن.
– وعان بىردەن وتا جاسادىق. وكىنىشتىسى سول, وڭ اياعىن ساقتاي المادىق. ونى ۇستىندەگى ءۇشىنشى جىلىنشىگىنەن امپۋتاتسيالاۋعا تۋرا كەلدى. بىراق سول اياعى قاتتى سىنسا دا قالپىنا كەلتىردىك, ونى ساقتاي الامىز دەپ ويلايمىن. ناۋقاستىڭ قازىرگى جاعدايى اۋىر بولعانمەن, تۇراقتىلىق بايقالادى. قازىر ينتەنسيۆتى ەم-دومدى جالعاستىرىپ جاتىرمىز, – دەدى دارىگەر.
ءبىر قۋانارلىعى, اياعىنان قاتتى سوققى الىپ, جارالانعاندار بولعانمەن, امپۋتاتسيا وتاسى ءبىر ادامعا عانا جاسالىپتى. اق جەلەڭدىلەر ارنايى فيكساتسيا جاسايتىن تەحنولوگيانىڭ كومەگىمەن ناۋقاستاردىڭ اياق-قولىن امان الىپ قالۋدىڭ جولىن قاراستىرىپ وتىر.
نۇر-سۇلتان اكىمدىگىندە وتكەن جيىندا «Astana LRT» باسشىسى بەكمىرزا يگەنبەرديەۆ ءاربىر اۆتوبۋس پاركى جولاۋشىلار مەن جۇكتى تۇتاس ساقتاندىراتىنىن قوزعاپ ءوتىپ,
وتەماقى كولەمى مەديتسينالىق ساراپتاما ناتيجەسى بويىنشا بەرىلەتىنىن ايتتى. «ساقتاندىرۋ كومپانياسىنا حابارلاسىپ, شىعىن كولەمىن ءمالىم ەتەمىز. ال ءوز تاراپىمىزدان اپاتتان كوز جۇمعانداردىڭ وتباسىلارىنا بارلىق قاجەتتى كومەك كورسەتەمىز» دەدى ول.
