قالا اكىمى التاي كولگىنوۆ قالالىق پروكۋرور, پوليتسيا دەپارتامەنتى, اۋدان اكىمدىكتەرى جانە مۇددەلى ورگاندار باسشىلىعىنىڭ قاتىسۋىمەن قۇقىق بۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىن وتكىزدى. ونلاين باسقوسۋدا جول قاۋىپسىزدىگى, ەلوردادا جول قوزعالىسىن ۇيىمداستىرۋدى جەتىلدىرۋ جانە جول قاۋىپسىزدىگى دەڭگەيىن ارتتىرۋ جونىندەگى 2020-2021 جىلدارعا ارنالعان كەشەندى جوسپاردى ىسكە اسىرۋ بارىسى قارالدى.
وتىرىستا پوليتسيا دەپارتامەنتىنىڭ قالادا, اسىرەسە قىسقى ۋاقىتتا جولاقتاردىڭ شەكاراسىن بەلگىلەيتىن قوسىمشا سول جاق بۇرىلىستىڭ جارىق مودۋلدەرىن قولدانۋ, شۋىلدايتىن قىزىل جول سىزىعى بار ۋچاسكەلەردىڭ سانىن ۇلعايتۋ تۋرالى ۇسىنىستارى قولداۋ تاپتى. قازىرگى كەزدە شۋىلدايتىن قىزىل سىزىقتى جولاقتار 7 جول ۋچاسكەسىنە (اليەۆ كوشەسىندەگى بالالار فۋتبول كلۋبى ماڭىنداعى جاياۋ جۇرگىنشىلەر وتكەلىنىڭ الدىندا, تۇركىستان كوشەسىندەگى «الپامىس» بالاباقشاسىنىڭ جانىندا) سالىنعان. جىل سوڭىنا دەيىن وسىنداي سىزىقتار تاعى 38 ۋچاسكەدە سالىنادى. مۇنداي جولاقتار جاياۋ جۇرگىنشىلەر وتكەلىنە جاقىنداعاندا شۋىلدايتىن داۋىس شىعارىپ, كولىكتىڭ جىلدامدىعىن ەرىكسىز ازايتۋعا, سونداي-اق جۇرگىزۋشىلەردىڭ نازارىن اشىق, قىزىل ءتۇستى جولاققا اۋدارۋعا مۇمكىندىك بەرەدى.
كولىك جۇرگىزۋشىلەرى قوزعالىس باعىتتارىن الدىن الا جوسپارلاۋعا ىڭعايلى بولۋى ءۇشىن قالاعا كىرەبەرىستەگى اقپاراتتىق تاقتالاردىڭ سانىن كوبەيتۋ تۋرالى شەشىم قابىلداندى. بۇدان بولەك, كوشەلەردەگى باعدارشامداردىڭ جۇمىس ىستەۋ ءتارتىبىن وزگەرتۋگە قاتىستى ۇسىنىستار دا ماقۇلداندى. ماسەلەن, بوگەنباي باتىر-رەسپۋبليكا داڭعىلدارىنىڭ قيىلىسىنداعى باعدارشامنىڭ ارالىق تاكتىسىن ۇلعايتۋ (سارى ءتۇستى بەلگىنىڭ ۋاقىتى 3-تەن 5 سەكۋندقا دەيىن ۇزارتىلدى) ناتيجەسىندە كولىك اپاتىنىڭ سانى قىسقاردى. مۇنداي وزگەرىستەر اۆتوكولىكتەر سولعا بۇرىلاتىن كەزدە بولاتىن جول-كولىك وقيعالارىنىڭ سانىن 57 پايىزعا دەيىن ازايتۋعا جول اشتى. جول بويىنا ورناتىلعان بەينەكامەرالاردىڭ دا جول-كولىك وقيعالارىنىڭ سانىن كەمىتۋگە جانە جۇرگىزۋشىلەردى تارتىپكە شاقىرۋعا كومەگى زور.
بۇدان بولەك, جول بەلگىلەرى انىق كورىنىپ تۇرۋى ءۇشىن ولاردى كولىكتەر جۇرەتىن جولدىڭ ۇستىڭگى جاعىنا ورناتۋ, سونداي-اق پلاستيك توسەمى بار تەز قۇراستىرىلاتىن مەتالل كونسترۋكتسيادان جاسالعان جاياۋ جۇرگىنشىلەر قورشاۋلارىن قولدانۋ جوسپارعا ەنگىزىلگەن. جولداعى اپاتتاردىڭ الدىن الۋ جانە جۇرگىزۋشىلەردى ساقتاندىرۋ ماقساتىمەن اكىمدىك پوليتسيا دەپارتامەنتىمەن بىرلەسىپ, قالا جولدارىنداعى قوزعالىستى جەتىلدىرۋ, سونىڭ ىشىندە جاڭا سىزبالار مەن تەحنيكالىق قۇرالداردى قولدانۋ باعىتىندا ءىس-شارالاردى جۇزەگە اسىرادى. مىسالى, قازىر ەلوردا اۋماعىندا «سارى ءتۇستى» جول بەلگىسىنىڭ قوس تۇتاس سىزىعىن قولدانۋ جۇمىستارى باستالدى.
سونداي-اق كوميسسيا وتىرىسىندا الەۋمەتتىك نىسانداردىڭ (مەكتەپتەر, اۋرۋحانالار, بالاباقشالار جانە ت. ب.) بەينەكامەرالارىن قالالىق بەينەباقىلاۋ جۇيەسىنە قوسۋ جونىندەگى جول كارتاسىن ىسكە اسىرۋ بارىسى, بالاباقشالار مەن مەكتەپتەردەگى بالالاردىڭ قاۋىپسىزدىگىن قامتاماسىز ەتۋ, بالالاردى جاھانتورداعى جاعىمسىز اقپاراتتاردان قورعاۋ ماسەلەلەرى قارالدى.
تولەن تىلەۋباي
