ميلليون حالقى بار استانادا كولىكتەر لەگى ارتقان سايىن قالانىڭ تىنىسى تارىلا تۇسەدى. شاھارداعى تولعاقتى ءماسەلەلەردىڭ كوبى وسى جول تاقىرىبىندا توعىسادى. بۇگىنگى تاڭدا بۇل جاعدايدى رەتتەۋدىڭ ءبىر جولى – تۇرعىنداردىڭ اۆتوبۋستارمەن قاتىناۋىنا قولايلى جاعداي جاساۋ. كولىك كەشەنىن دامىتۋ ماقساتىندا اتقارىلعان جۇمىستار ءبىراز ماسەلەنىڭ ءتۇيىنىن تارقاتپاق.
كەلەر جىلى جاڭا اۆتوبۋستار كەلەدى
تۇرعىنداردى كۇندەلىكتى بارىس-كەلىس ءۇشىن قوعامدىق كولىكتى پايدالانۋدى ناسيحاتتاعان ىستەردىڭ ءبىرى – اۆتوبۋستاردى جاڭالاۋ. وسى باعىتتا بىلتىر 358 سۋ جاڭا اۆتوبۋس ساتىپ الىندى. بۇلاردىڭ ساپاسى استانانىڭ قاقاعان قىسىندا سىنالىپ, سەنىمدى كولىك ەكەندەرىنە ابدەن كوز جەتكەن.
بۇل يگى ءىس جالعاسىن تاۋىپ, كەلەر جىلى استانانىڭ اۆتوبۋس پاركتەرى IVECO ماركالى 210 زاماناۋي اۆتوبۋسپەن تولىعادى. جاڭا كولىكتەردى ەۋروپا قايتا قۇرۋ جانە دامۋ بانكىنىڭ ينۆەستيتسيالىق قولداۋىنىڭ ارقاسىندا الدىرتپاق. اۆتوبۋستار اقپاراتتاندىرۋ, اۋا باپتاۋ, جىلىتۋ, بەينەباقىلاۋ جۇيەلەرىمەن, سونداي-اق, ءمۇمكىندىگى شەكتەۋلى جاندارعا جانە بالالار ارباسىمەن جۇرگەن اتا-انالار ءۇشىن ارنايى پاندۋستارمەن جابدىقتالادى.
قوعامدىق كولىكتەرمەن قاتار, اۆتوبۋس پاركتەرىن جاڭارتۋ جانە ەسكى ماشينالاردى قولدانىستان شىعارۋ ماسەلەلەرى دە قولعا الىنۋدا. قازىر كۇن سايىن ەلوردادا 700-دەن اسا قوعامدىق كولىك جولعا شىعادى. ولار شامامەن 850 مىڭنان اسا ادامدى تاسىمالدايدى.
جول ءجۇرىس ءونىمدى بولادى
دىتتەگەن جەرگە قوعامدىق كولىكتەرمەن دەر كەزىندە جەتكىزۋ ءۇشىن بىرقاتار مارشرۋتتاردىڭ قوزعالىس سىزباسى وزگەرتىلەدى. قازىردىڭ وزىندە تۇرعىنداردىڭ وتىنىشىمەن بىرنەشە مارشرۋتتاردىڭ قوزعالىسىنا جارتىلاي وزگەرىس ەنگىزىلدى.
اتاپ ايتساق, №73 باعداردىڭ كەستەسى الماتى اۋدانىنىڭ كوكارال, بايشەشەك كوشەلەرى تۇرعىندارىنىڭ سۇراۋى بويىنشا جانە قالا شەتى تۇرعىندارىن قوعامدىق كولىك قىزمەتىمەن قامتۋدى جاقسارتۋ ماقساتىندا ءىشىنارا وزگەردى. بۇل باعداردىڭ «بال بالا» بالاباقشاسىنان باستاپ «كوكجيەك كوشەسى» ايالداماسىنا دەيىنگى جولى بۇرىنعىداي قالدى. ال ودان ءارى قارايعى جولى: تولەباەۆ كوشەسى – كوكارال كوشەسى – ءبايشەشەك كوشەسى – شالكودە كوشەسى – سوڭعى ايالداما «پرومىشلەننىي» تۇرعىن جايى. كەرى باعىتتاعى قوزعالىس وزگەرىسسىز قالدى.
سونىمەن قاتار, قالا ماڭىنا قاتىنايتىن اۆتوبۋستاردىڭ اراقاشىقتىعى قىسقاردى. ماسەلەن, №306 اۆتوبۋس قاربالاس كەزدە تالاپكەردەن باستاپ 15 مينۋتتىق ارالىقپەن جۇرەدى. قوياندى اۋىلىنا قاتىنايتىن №307 مارشرۋتتىڭ اراسى 8 مينۋتتى قۇرايدى. بۇرىن بۇل 10 مينۋتتان اسىپ كەتەتىن. ال قابانباي باتىر اۋىلىنا جۇرەتىن №308 اۆتوبۋس ەندى قىزىلجارعا دا سوعاتىن بولادى.
جاڭا ايالدامالار جوبالانۋدا
ارقانىڭ بەت قاريتىن ايازىندا ەلوردادا ورناتىلعان جىلى ايالدامالار اۆتوبۋس كۇتكەن اعايىنعا جاقسى پانا بولدى. باسىندا باعاسىنا قاتىستى شي شىققانىمەن, قازىر تۇرعىنداردىڭ ءبارى ريزاشىلىعىن بىلدىرۋدە.
ەندى ەلوردالىقتاردىڭ پىكىرىن ەسكەرە وتىرىپ, الداعى ۋاقىتتا جايلى جاڭا ايالدامالار ورناتۋ كوزدەلۋدە. بۇل كەشەندەر مەملەكەتتىك-جەكە مەنشىك ارىپتەستىك ەسەبىنەن سالىناتىن بولادى. ال جوبا 2017 جىلدىڭ ءبىرىنشى جارتىسىندا جۇزەگە اسىرىلماق.
جوبالانىپ جاتقان جابىق تۇردەگى جاڭا ايالدامالار جولاۋشىلار ءجيى جينالاتىن تىعىز جەرلەردە ورناتىلماق. بيىل جىلدىڭ سوڭىنا دەيىن استانادا 45 جاڭا شىنى جانە پەرفوراتسيالانعان ايالداما اباتتاندىرىلادى. سونداي-اق, كولەمدى جابىق ساۋدا جانە تەحنيكالىق ورىنجايلاردان, اشىق الاڭنان تۇراتىن اۆتوستانسالار جاسالادى. اۆتوستانسا اۋماعىندا تەز تاماقتانۋ پۋنكتى, قوعامدىق دارەتحانالار, تولەمدەر قابىلداۋ پۋنكتى, لايت-بوكستار سياقتى نىساندار بولادى.
استاناداعى ايالدامالاردىڭ تاعى ءبىر جاڭالىعى – اقپاراتتىق تابلولارمەن جابدىقتالۋى. مۇنى بۇگىندە كوپشىلىكتەن وڭ باعاسىن الىپ ۇلگەرگەن «Astra bus» ءموبيلدى قوسىمشاسىنىڭ بالاما ءتۇرى دەسەك, قاتەلەسپەيمىز. بۇل تابلولاردان جولاۋشىلار اۆتوبۋستاردىڭ قاي ماڭايدا جانە قانشا ۋاقىتتا كەلەتىنىنەن حاباردار بولادى. قازىر كوشەلەردە ورناتىلعان 110 اقپاراتتىق تابلو تەستىلىك رەجيمدە جۇمىس ىستەپ تۇر. سوندىقتان جۇرت ونداعى ۋاقىتتاردىڭ ايىرماشىلىعىنا تۇسىنىستىكپەن قاراۋى ءتيىس. جوسپار بويىنشا الداعى جىلى ايالدامالاردا تاعى دا 72 اقپاراتتىق تابلو ورناتىلماق.
ورىنبەك وتەمۇرات
