كەشە «جاستار» سارايى الاڭىندا استانا قالاسى ىشكى ىستەر دەپارتامەنتىنىڭ جەرگىلىكتى پوليتسيا قىزمەتى «نۇر وتان» پارتياسى قالالىق فيليالىمەن بىرلەسىپ, ءداستۇرلى «جولدا قابىلداۋ» رەسپۋبليكالىق شاراسىن وتكىزدى.
– ءىس-شارا بيىل توعىزىنشى رەت ۇيىمداستىرىلىپ وتىر. ماقساتى – ازاماتتاردىڭ ءتۇرلى سالا بويىنشا قۇقىقتىق ساۋاتتىلىعىن ارتتىرۋ, قوعامدىق جانە جول قاۋىپسىزدىگىن قامتاماسىز ەتۋ جونىندەگى اتقارىلىپ جاتقان جۇمىستارمەن تانىستىرۋ, ۇساق بۇزاقىلىقتارعا قاتىستى قوعامدا مۇلدەم توزبەۋشىلىك پرينتسيپتەرىن قالىپتاسىرۋ. سول ءۇشىن قالا بويىنشا «قازاقستان» سپورت كەشەنى, «دۋمان» ويىن-ساۋىق الاڭىنا, تەمىر جول ۆوكزالى مەن «رۋبەج» باقىلاۋ قوسىنىنا جانە حالىققا قىزمەت كورسەتۋ ورتالىعى سياقتى ادامدار كوپ شوعىرلاناتىن جەرلەرگە بىرنەشە مۋنيتسيپالدى اۆتوبۋس قويىلدى. ءار اۆتوبۋستا «نۇر وتان» پارتياسى استانا قالالىق فيليالىنىڭ وكىلى, جەرگىلىكتى پوليتسيا قىزمەتكەرى, ۋچاسكەلىك ينسپەكتور, زاڭگەر, تاعى دا باسقا ماماندار جۇمىس ىستەيدى. ولار وزدەرىنە قاتىستى قانداي دا ءبىر ماسەلەمەن كەلگەن ازاماتتاردىڭ ساۋالدارىنا جان-جاقتى جاۋاپ بەرەدى, – دەدى استانا قالاسى ىشكى ىستەر دەپارتامەنتى جەرگىلىكتى پوليتسيا قىزمەتى باستىعىنىڭ ورىنباسارى, پوليتسيا پودپولكوۆنيگى ارمان ايتىبەكوۆ.
ونىڭ ايتۋىنشا, ارىز-شاعىمدار مەن ۇسىنىستار كوبىنە قالا كوشەلەرىندەگى جول بەلگىلەرىنە, قوعامدىق كولىك جۇرگىزۋشىلەرى مەن پوليتسيا قىزمەتكەرلەرىنىڭ دورەكىلىكتەرى مەن جاۋاپسىزدىقتارىنا بايلانىستى بولادى ەكەن. ماسەلەن, جىل باسىنان بەرى جەرگىلىكتى پوليتسيا قىزمەتىنە وسىنداي 43 ارىز-شاعىم ءتۇسىپ, ونىڭ تەك تورتەۋى عانا دالەلىن تاۋىپتى.
«وتكەن جىلى وسىنداي اكتسياعا قالا بويىنشا 600-گە تارتا ادام كەلگەن بولاتىن. بيىل دا كەلەتىن حالىق سانى از بولماۋى كەرەك. ازاماتتار كوبىنە قۇقىقتىق ماسەلەلەر بويىنشا جۇگىنەدى. اسىرەسە, جەر, پاتەر الۋ, سوت ۇكىمى, جول-كولىك اپاتى, باسشىلاردىڭ ادىلەتسىزدىگى, تاعى دا باسقا زاڭسىزدىقتارعا شاعىناتىندار سانى جىلدان-جىلعا ارتپاسا, كەمىمەيدى. ءبىز ولاردىڭ ماسەلەلەرىنىڭ وڭ شەشىلۋىنە مۇمكىندىگىنشە ىقپال ەتۋگە تىرىسامىز» دەيدى «نۇر وتان» پارتياسى استانا قالالىق فيليالى قوعامدىق قابىلداۋ ءبولىمىنىڭ مەڭگەرۋشىسى مارال ەلەۋقۇلوۆا.
اكتسيا بارىسىندا ءار ازامات ارنايى تاراتىلعان ساۋالنامالار تولتىرىپ, جاسىرىن تۇردە قوعامدىق ءتارتىپ ساقشىلارىنىڭ جۇمىسىن باعالادى. وزدەرىن مازالاپ جۇرگەن كوپتەگەن سۇراقتارعا جاۋاپتار الدى.
تاڭاتار تولەۋعاليەۆ
