بۇگىنگى تاڭدا استانادا سەگىز بالا جول اپاتىنا ۇشىراپ, ءتۇرلى جاراقات العان. قايعىلى وقيعانىڭ الدىن الۋ ءۇشىن جاياۋ جۇرگىنشىنىڭ ءوزى دە اسا ساق بولۋى قاجەت. سوندىقتان مەكتەپتەگى بالالارعا جول-كولىك ەرەجەلەرىن وقىتۋ جەرگىلىكتى پوليتسيا قىزمەتىنە جۇكتەلگەن.
№61 مەكتەپ-گيمنازياسىندا حالىق قاھارمانى, پوليتسيا كاپيتانى عازيز بايتاسوۆ اتىنداعى رەسپۋبليكالىق جول قوزعالىسى جاس ينسپەكتورلارىنىڭ سلەتى اياسىندا «جاس جول ينسپەكتورى» اتتى شارا ءوتتى. ونى قالالىق جەرگىلىكتى پوليتسيا قىزمەتى مەن ءبىلىم بەرۋ ۇيىمدارىنىڭ وكىلدەرى بىرىگىپ ۇيىمداستىردى. مامانداردىڭ ايتۋىنشا, سلەت بالالاردىڭ قاتىسۋىمەن بولاتىن جول-كولىك وقيعالارىنىڭ الدىن الۋعا كومەكتەسەدى.
قاتىسۋشىلار ساپتىق شەرۋ, جول قوزعالىسى ەرەجەسىنىڭ بىلگىرلەرى, ۆەلوسيپەدتى مانەرلەپ جۇرگىزۋ, جاس رەتتەۋشى, جاس سانيتار, ۇزدىك ۇگىت بريگادا مەن بىلگىرلەر بايقاۋى سىندى جەتى نوميناتسيا بويىنشا جارىسقا ءتۇستى. ءار كوماندا وزىندىك كيىم ۇلگىسىمەن ەرەكشەلەندى. ساپتىق شەرۋدە جول قوزعالىسىنىڭ قاۋىپسىزدىگىنە ارنالعان ولەڭ ايتتى. كونكۋرستىڭ قورىتىندىسى بويىنشا №67 مەكتەپ-گيمنازياسى ساپتىق قوزعالىستارى مەن ۇراندارى ءتارتىپ ساقشىلارىنىڭ كوزىنە ءتۇسىپ, ءبىرىنشى ورىن يەلەندى.
استانا قالاسىنىڭ ءىىد جەرگىلىكتى پوليتسيا قىزمەتىنىڭ يۋۆەنالدى پوليتسيا ءبولىمىنىڭ باسشىسى سامال احمەتتىڭ پىكىرىنشە, اتالمىش شارالار بالالاردىڭ جولدا ءجۇرۋ ەرەجەسىن مەڭگەرۋ داعدىسىن قالىپتاستىرادى. جولدا ءتارتىپ پەن قاۋىپسىزدىكتى قامتاماسىز ەتەتىن پوليتسيا قىزمەتكەرلەرىنىڭ قىزمەتىن قادىرلەۋگە دە شاقىرادى.
جەڭىمپاز كوماندالار جاس ينسپەكتورلاردىڭ قالالىق سلەتىنە قاتىسۋعا مۇمكىندىك الادى. ال باس جۇلدەگە يە بولعان قۇراما وسكەمەندە وتەتىن حالىقارالىق سلەتكە قاتىسادى.
گۇلدانا تالعاتقىزى
