بۇگىندە ەلوردانىڭ كوشە-جول جەلىسىن دامىتۋ, قوعامدىق كولىك جۇمىسىن جاقسارتۋ ماسەلەسى وزەكتى بولىپ وتىر. وسىعان وراي, قوعامدىق كەڭەستىڭ كەزەكتى وتىرىسىندا قالالىق كولىك جانە جول-كولىك ينفراقۇرىلىمىن دامىتۋ باسقارماسى باسشىسىنىڭ ورىنباسارى ەرجان ديحانباەۆ باس شاھارداعى جول-كولىك جۇمىسىنىڭ جاي-كۇيى مەن ونى جاقسارتۋ شارالارى تۋرالى باياندادى.
جولدار جوندەلىپ جاتىر
باسقارما باسشىسى ورىنباسارىنىڭ ايتۋىنشا, قازىرگى كەزدە استانادا جالپى ۇزىندىعى 868,3 شاقىرىمدى قۇرايتىن 1 129 كوشە بار, سولاردىڭ 90,7 پايىزى, ياعني 803,7 شاقىرىمى اسفالتتالعانىمەن, قالعان 9,3 پايىزى نەمەسە 64,6 شاقىرىم جولعا ءالى تاس توسەلمەگەن.
سونداي-اق 60 ينجەنەرلىك قۇرىلىم, ونىڭ ىشىندە 8 كولىك ايرىعى, 9 جول وتپەسى, 24 اۆتوجول جانە 5 جاياۋ جۇرگىنشىلەر كوپىرى, 4 جەرۇستى جانە 9 جەراستى جاياۋ جۇرگىنشىلەر وتكەلى بار.
– بيىل 31 جوبا جۇزەگە اسىرىلادى, ونىڭ 21-ءى اۋىسپالى جوبا بولىپ تابىلادى. 31 نىساننىڭ 4-ەۋىن اعىمداعى جىلى اياقتاۋدى جوسپارلاپ وتىرمىز. بۇگىندە 6 جاڭا نىسان بويىنشا جۇمىستار جۇرگىزىلىپ جاتىر, – دەدى ەرجان ديحانباەۆ.
قازىرگى تاڭدا 3 ءىرى نىساندا, اتاپ ايتساق, تاۋەلسىزدىك كوپىرىندە, تىلەنديەۆ جانە بەيسەكوۆا كوشەلەرىنىڭ قيىلىسىنداعى جول ايرىعىندا جانە الاش تاس جولى بويىنداعى كوپىردە جوندەۋ جۇمىستارى جۇرگىزىلۋدە.
تۇرعىن الاپتار نازاردان تىس قالمايدى
جول جوندەۋ جانە سالۋ جۇمىستارى قالانىڭ شەت ايماقتارىندا دا ءجۇرىپ جاتىر. بولىنگەن قاراجات ەسەبىنەن استانا قالاسىنىڭ 5 تۇرعىن الابىندا 6 جوبانى ىسكە اسىرۋ جوسپارلانۋدا.
استانادا جالپى ۇزىندىعى 868,3 شاقىرىمدى قۇرايتىن 1 129 كوشە بار, سولاردىڭ 90,7 پايىزى, ياعني 803,7 شاقىرىمى اسفالتتالعان
– ورتاشا جانە اعىمداعى جوندەۋ جۇمىستارى دا جۇيەلى جالعاسۋدا. بۇگىنگى كۇنى بولىنگەن قاراجات ەسەبىنەن جالپى ۇزىندىعى 47,2 شاقىرىمدى قۇرايتىن 69 كوشەگە ورتاشا جوندەۋ جۇمىستارىن جۇرگىزۋ جوسپارلانىپ وتىر. سونداي-اق ۇزىندىعى 27,4 شاقىرىم بولاتىن 44 كوشەدە جوندەۋ جۇمىستارى اياقتالدى. ال جالپى ۇزىندىعى 15,6 شاقىرىمدى قۇرايتىن 16 كوشەدە قازىرگى ۋاقىتتا جوندەۋ جۇمىستارى جۇرگىزىلىپ جاتىر, – دەدى باسقارما باسشىسىنىڭ ورىنباسارى.
سونىمەن قاتار, جول قوزعالىسىنىڭ قاۋىپسىزدىگىن قامتاماسىز ەتۋ ماقساتىندا شۇڭقىرلى, مارشرۋتتىق جوندەۋ جۇمىستارى جالعاسۋدا. اعىمداعى جىلى قالاداعى 250-دەن استام كوشەدە شۇڭقىرلار جوندەلىپ, ۇزىندىعى 5,5 شاقىرىم بولاتىن 13 جاياۋ جۇرگىنشىلەر جولى قايتا قالپىنا كەلتىرىلدى.
بولىنگەن قاراجات ەسەبىنەن جۇرگىزىلگەن جۇمىستارعا توقتالا كەلە, باسقارما باسشىسىنىڭ ورىنباسارى قالاداعى ايالدامالار مەن پاندۋستاردىڭ جاعدايىن اتاپ ءوتتى.
– جولاۋشىلارعا ساپالى قىزمەت كورسەتۋ ءۇشىن 40 ايالداما قايتا جابدىقتالدى. قالا اۋماعىندا ورنالاسقان 12 ايالدامادا جوندەۋ جۇمىستارى ءجۇرىپ جاتىر, جىل سوڭىنا دەيىن 4 ايالدامانى قالپىنا كەلتىرۋ جوسپارلانىپ وتىر. سونداي-اق مۇمكىندىگى شەكتەۋلى جاندار ءۇشىن تروتۋارلاردان 207 اربا پاندۋس جابدىقتالدى. وسى جىلدىڭ سوڭىنا دەيىن تاعى 300-دەن استام پاندۋس قالپىنا كەلتىرىلەتىن بولادى, – دەدى ەرجان ديحانباەۆ.
قالاداعى ءۇش تۇراق ايماعى, ناقتىراق ايتساق, ميچۋرين تۇرعىن الابىنداعى №43 مەكتەپتىڭ ماڭىنداعى تۇراق ايماعى, №55 مەكتەپكە قاراما-قارسى ورنالاسقان جەردەگى جانە تاحا حۋسەين كوشەسىندەگى №1 ءۇيدىڭ جانىنداعى تۇراق ايماعى قايتا جابدىقتالدى.
كولىك جانە جول-كولىك ينفراقۇرىلىمىن دامىتۋ باسقارماسى باسشىسىنىڭ ايتۋىنشا, بۇگىنگى تاڭدا ەلوردادا كوشەلەر مەن كىرمە جولداردى ينەرتتى ماتەريالمەن تولتىرۋ جۇمىستارى دا قىزۋ ءجۇرىپ جاتىر. باس قالاداعى 147 ۋچاسكەگە, اتاپ ايتساق, بايقوڭىر اۋدانىنداعى 64 كوشەگە, سارىارقا اۋدانىنداعى 35 كوشەگە, الماتى اۋدانىنداعى 20 كوشەگە, ەسىل اۋدانىنداعى 15 كوشەگە جانە نۇرا اۋدانىنداعى 13 كوشەگە ينەرتتى ماتەريالدار توگىلگەن.
الەۋمەتتىك نىساندارعا وتەتىن جولدار دا جوندەلۋدە. بۇل رەتتە استاناداعى تۇراق ايماقتارى مەن تروتۋارلاردى جايلاستىرا وتىرىپ, الداعى ۋاقىتتا الەۋمەتتىك نىساندارعا 7 كىرمە جول سالۋ كوزدەلىپ وتىر.
كوپىرلەر كوركەيىپ كەلەدى
بيىل قالاداعى 32 كولىك قۇرىلىسىنا, ونىڭ ىشىندە 8 ۇلكەن كوپىرگە, 6 شاعىن كوپىرگە, 3 جاياۋ جۇرگىنشىلەر كوپىرىنە, 2 جول وتپەسىنە, 7 كولىك ايرىعىنا جانە 6 جەراستى جاياۋ ءجۇرگىنشىلەر جولىنا اعىمداعى جوندەۋ جۇمىستارىن جۇرگىزۋ جوسپارلانۋدا.
قازىرگى كەزدە بەلاسار كوپىرىندە, ماڭگىلىك ەل داڭعىلى – سارايشىق كوشەلەرىنىڭ قيىلىسىنداعى جول ايرىعىندا, م3 كوپىرى مەن «موجايسكي» كوپىرىندە جانە جاسىل ارالداعى كوپىردە كوپىرلەردىڭ مەتالل قۇرىلىمىن سىرلاۋ, دەفورماتسيالىق جىكتەردى جوندەۋ, دوڭعالاق ويىقتارىن ورناتۋ, بۇلىنگەن جەرلەردى گرانيت پليتكامەن قاپتاۋ سەكىلدى باسقا دا جوندەۋ جۇمىستارى جۇرگىزىلىپ جاتىر.
10 مىڭ اقىلى اۆتوتۇراق اشىلادى
ەلوردادا «استانا قالاسىنىڭ اقىلى تۇراق كەڭىستىگىن قۇرۋ, پايدالانۋ جانە باسقارۋ» مەملەكەتتىك-جەكەمەنشىك ارىپتەستىك جوباسى 2018 جىلدان باستاپ ىسكە اسىرىلىپ كەلەدى. وعان «استانا تۇراق كەڭىستىگى» جاۋاپكەرشىلىگى شەكتەۋلى سەرىكتەستىگى جاۋاپتى ەكەنىن ايتا كەلە, قوعامدىق كەڭەس وتىرىسىندا باسقارما باسشىسىنىڭ ورىنباسارى وسى شارت اياسىندا ەلوردادا جاڭا اقىلى اۆتوتۇراقتاردىڭ اشىلاتىنىن اتاپ ءوتتى.
– مەملەكەتتىك-جەكەمەنشىك ارىپتەستىك شارتى اياسىندا قالادا 10 مىڭ اقىلى تۇراق ورىندارىن ىسكە قوسۋ جوسپارلانىپ وتىر. بۇگىندە 7 500 اۆتوتۇراق ورنى ىسكە قوسىلدى. جوبانىڭ ماقساتى – جول بويىندا كولىكپەن ايالداۋ ەرەجەلەرىنىڭ بۇزىلۋىن ازايتۋ, اقىلى تۇراق ايماقتارىندا كولىك قۇرالدارىنىڭ بارلىق تۇرلەرىنىڭ قوزعالىس جىلدامدىعىن جانە تۇراق ورىندارىنىڭ اينالىمىن ارتتىرۋ. سونىمەن قاتار, اۆتوتۇراققا قويمايتىن كولىكتەردىڭ سانىن قىسقارتۋ جانە تۇرعىنداردى قوعامدىق كولىكتى پايدالانۋعا ىنتالاندىرۋ, – دەدى ەرجان ديحانباەۆ.
قوعامدىق كولىكتەر كوبەيدى
ەلوردادا قوعامدىق كولىكتەردىڭ سانى ارتا ءتۇستى. قالاعا جاڭا اۆتوبۋستار اكەلىنۋدە.
– بۇگىنگى تاڭدا ەلوردادا 6 اۆتوبۋس پاركى بار. ولاردىڭ 1-ءى – كوممۋنالدىق جانە 5-ءى جەكەمەنشىك پارك. قوعامدىق كولىكتەر 91 باعىتتا قاتىنايدى. ونىڭ 63-ءى قالا ىشىندە, قالعان 28 اۆتوبۋس قالا ماڭىنا جۇرەدى. كۇن سايىن جەلىدە 850-گە جۋىق اۆتوبۋس قىزمەت كورسەتەدى. 2022-2023 جىلدارى قوعامدىق كولىك قىزمەتىن جەتىلدىرە ءتۇسۋ ماقساتىندا 4 جاڭا باعىتتا اۆتوبۋستار ىسكە قوسىلدى. ولار №121, №327, №328 جانە №329 باعىتىندا جۇرەدى. سونىمەن قاتار, 44 باعىتتاعى اۆتوبۋستاردىڭ قوزعالىس كەستەسى وزگەرتىلدى, Bus Lane 2 ۋچاسكەسى ەنگىزىلدى جانە قالا مارشرۋتتارىنىڭ جۇمىس كەستەسى دە ۇلعايتىلدى, – دەدى باسقارما باسشىسىنىڭ ورىنباسارى.
جاسىراتىنى جوق, سوڭعى كەزدە ەلوردانىڭ قوعامدىق كولىگى جىلجىمالى قۇرامنىڭ تاپشىلىعىن سەزىنۋدە. قالالىقتار سانىنىڭ جوسپارداعىدان تىس ءوسۋى قوسىمشا اۆتوبۋستارعا دەگەن قاجەتتىلىكتى تۋىنداتىپ وتىر.
– بۇل ماسەلەنى شەشۋ ءۇشىن 2023 جىلى 400 بىرلىك اۆتوبۋس ساتىپ الىنادى, ونىڭ 125-ءى قالاعا اكەلىنسە, 320 اۆتوبۋستى كوممۋنالدىق اۆتوپارك جانە 80 اۆتوبۋستى جەكە پاركتەر ساتىپ الادى. ەلوردادا حالىق سانىنىڭ ءوسۋىن ەسكەرە وتىرىپ, جىل سايىن 100 اۆتوبۋس ساتىپ الۋ قاجەت. اۆتوبۋستاردى ساتىپ الۋ اياسىندا 6 جاڭا مارشرۋت ىسكە قوسىلادى. 95 اۆتوبۋستىڭ قوزعالىس كەستەسى ۇلعايىپ, 55 ەسكى اۆتوبۋس جاڭارتىلادى, – دەدى ەرجان ديحانباەۆ.
جالپى, ەلوردالىق كولىك جانە جول-كولىك ينفراقۇرىلىمىن دامىتۋ باسقارماسى جولاۋشىلار تاسىمالى سەرۆيسىن جاقسارتۋ جانە ەلوردا قوناقتارى مەن تۇرعىندارى ءۇشىن قولايلى جاعداي جاساۋ باعىتىندا جۇيەلى جۇمىستار جۇرگىزىپ كەلەدى.
