قالالىق ءماسليحاتتا كوشەلەردى ورتاشا جانە اعىمداعى جوندەۋدى كولىك جانە جول-كولىك ينفراقۇرىلىمىن دامىتۋ باسقارماسىنان الىپ, اۋدانداردىڭ اكىمدىكتەرىنە بەرۋ ۇسىنىلدى. ءماسليحات دەپۋتاتتارىنىڭ پىكىرىنشە, باسقارما بۇل تاراپتا وزىنە بەكىتىلگەن جۇمىستى ءتيىستى دەڭگەيدە اتقارماي وتىر, ال اۋدان اكىمدىكتەرىنەن ارتىق قاي جولدى الدىمەن جوندەۋ كەرەكتىگىن ەشكىم بىلمەيدى.
اتالمىش باسقارمانىڭ باسشىسى اسحات قاراعويشين قالاعا كىرەبەرىس جولدارىنا, ىشكىورامدىق كوشەلەرگە قاتىستى بيۋدجەتتىك باعدارلامانى اۋدان اكىمدىكتەرىنە بەرۋگە دايىن ەكەندىكتەرىن ايتادى.
«ول ءۇشىن اۋدان اكىمدىكتەرىنىڭ اپپاراتتارى ارنايى بيۋدجەتتىك باعدارلامانى اشۋى كەرەك. بيۋدجەتتى كەلەسى ناقتىلاۋ وتىرىسىندا وسى ماسەلەنى كۇن تارتىبىنە ەنگىزۋ قاجەت. سول كەزدە باعدارلاما اكىمشىلەرى جولداردى جوندەيتىن مەردىگەرلەردى انىقتاۋعا كونكۋرس جاريالايدى. بۇل جاعدايدا دەربەس قارجىلاندىرۋدىڭ ارقاسىندا جۇمىس تەزىرەك جۇرەدى» دەدى باسقارما باسشىسى.
ءماسليحات حاتشىسى جانات نۇرپەيىسوۆ ستراتەگيالىق جانە بيۋدجەتتىك جوسپارلاۋ باسقارماسىنا بۇل ماسەلەنىڭ بيۋدجەتتىك زاڭناماعا ساي كەلۋىن تەكسەرۋگە تاپسىرما بەردى.
الماتى اۋدانى اكىمدىگىنىڭ حابارلاۋىنشا, كولىك جانە جول-كولىك ينفراقۇرىلىمىن دامىتۋ باسقارماسى 2011 جىلى «ينتەرناتسيونالنىي», «كۇيگەنجار», «ميچۋرينو» تۇرعىن الاپتارىندا جولدىڭ 20 شاقىرىمىن (30 كوشە), ينجەنەرلىك جەلىلەردىڭ 67 شاقىرىمىن سالۋ جوباسىن باستادى. الايدا ءتيىستى جۇمىستار ءالى كۇنگە دەيىن اياقتالماعان.
«جەلەزنودوروجنىي» تۇرعىن الابىندا جەتى كوشەگە, «پرومىشلەننىيدا» ءتورت كوشەگە جول سالۋ كەرەك. العاشقى اتالعان ەلدى مەكەن بويىنشا قازىر جوبالىق-سمەتالىق قۇجات ازىرلەنىپ جاتىر. ال ەكىنشى ەلدى مەكەندە ءتيىستى جۇمىستار بيىل باستالۋى كەرەك.
سارىارقا اۋدانىنا قاراستى «كوكتال-2» تۇرعىن الابىندا جالپى ۇزىندىعى 19 شاقىرىمدى قۇرايتىن 41 كوشە سالىندى. بۇعان قوسا, نوسەر كارىزى, سۋ قۇبىرى, ورتالىق كارىز سالىندى. بيىل ءتيىستى جۇمىستار جالعاسىپ, تولىعىمەن اياقتالۋى ءتيىس. جوبا ەكى كەزەڭگە – جول جانە ينجەنەرلىك جەلىلەر قۇرىلىسى بولىپ ءبولىندى. ونىڭ جالپى قۇنى – 8,7 ملرد تەڭگە. «كوكتال-1» تۇرعىن الابىندا وتكەن جىلى جالپى ۇزىندىعى 4,7 شاقىرىمدى قۇرايتىن 12 كوشە سالىندى. بيىل مۇنداعى 14 كوشەدە جانە «اگروگورودوك» تۇرعىن الابىنداعى 28 كوشەدە جولدار سالىنادى.
بايقوڭىر اۋدانىنا قاراستى ەلدى مەكەندەردە بيىل ۇزىندىعى 9 شاقىرىمدى قۇرايتىن 21 كوشەدەگى جولدار جوندەلەدى. 1052 مەترلىك 5 كوشەگە قيىرشىق تاس توسەلەدى. جالپى, الداعى جىلدارى اقجول جانە ش.بەيسەكوۆا كوشەلەرى ارالىعىندا اينالما جول سالۋ جوسپارلاندى. قۇرىلىس جۇمىستارى كەلەسى جىلى باستالىپ, 2023 جىلى اياقتالماق.
جالپى العاندا, جەتى تۇرعىن الاپتاعى جالپى ۇزىندىعى 31,1 شاقىرىمدى قۇرايتىن 87 كوشەدە جولدار سالىنادى.
