كۇنى كەشە عانا الاتاۋ باۋرايىنا جايعاسقان اسەم قالانىڭ تۋعان كۇنى بارشا ءسان-سالتاناتىمەن تويلاندى. وسى كۇنى مىڭجىلدىق شاھاردىڭ وركەندەۋىنە ۇلەس قوسقان بىرقاتار ادام «الماتى قالاسىنىڭ قۇرمەتتى ازاماتى» اتاعىنا يە بولدى. ولاردىڭ اراسىندا قوعام جانە مەملەكەت قايراتكەرى, عالىم, ۇلتتىق عىلىم اكادەمياسىنىڭ اكادەميگى مىرزاتاي جولداسبەكوۆ تە بار.
مىرزاتاي اعا 2000 جىلدان بەرى استانا تۇرعىنى. سول جىلى ەلورداداعى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى قىزمەتىنە تاعايىندالعان عالىم سودان بەرى بىرنەشە قىزمەت اۋىستىرسا دا, سونىڭ بارلىعىندا ءجۇرىپ, استانا مارتەبەسىنىڭ ارتۋىنا, اتاعىنىڭ اسقاقتاۋىنا زور ەڭبەك ءسىڭىردى. ءوزى باسشى بولعان جوعارى وقۋ ورنىنىڭ قاق تورىنە ەجەلدەن وركەنيەتتى ەل ەكەنىمىزدى دالەلدەيتىن كۇلتەگىن ەسكەرتكىشىنىڭ كوشىرمەسىن ورناتقىزعانىن ايتپاعاندا, قازىرگى ۇرپاقتى ابىلاي حاننىڭ التىن زەرلى قامقا تونىمەن, قازداۋىستى قازىبەك ءبيدىڭ شاپانىمەن, بالۋان شولاقتىڭ بەلدىگىمەن, تاعى باسقا اتا-بابالارىمىزدان مۇرا بولىپ قالعان قۇندى جادىگەرلەرمەن قاۋىشتىردى.
اعانىڭ ەڭبەگى ەسكەرىلىپ, استانا قالاسى ءماسليحاتىنىڭ شەشىمىمەن وعان 2007 جىلى تابىستى مەملەكەتتىك جانە قوعامدىق قىزمەتى, قازاقستاننىڭ ەلورداسى – استانا قالاسىنىڭ قالىپتاسۋى مەن دامۋىنا قوسقان ۇلەسى ءۇشىن «استانا قالاسىنىڭ قۇرمەتتى ازاماتى» اتاعى دا بەرىلگەن بولاتىن. ءسوز رەتى كەلگەندە, عالىم ءوزى تۋعان جامبىل وبلىسىنىڭ قۇرمەتتى ازاماتى ەكەنىن دە ايتا كەتەيىك.
مىرزاتاي جولداسبەكوۆ قازىر دە قىزمەتتەن قول ۇزبەي, قازاق ۇلتتىق ونەر ۋنيۆەرسيتەتى جانىنداعى قورقىت اتىنداعى عىلىمي-زەرتتەۋ ينستيتۋتىنا باسشىلىق ەتىپ وتىر. پروفەسسور م.جولداسبەكوۆتىڭ جەتەكشىلىگىمەن ينستيتۋت تالاي جۇمىستاردىڭ باسىن قايىردى. اعانىڭ عالىمدىعى, جازۋشىلىعى, كومپوزيتورلىعى ەلگە ايان. كوركەم ادەبيەتتەگى نازىك جانر سانالاتىن دراماتۋرگياعا دا ات ءىزىن سالىپ تۇرادى. ونىڭ ايقىن كورىنىسى – كەزىندە استانادا اعانىڭ قالامىنان تۋعان «ۇلبيكە» پەساسى قويىلدى. ۇلتتىق ونەر ۋنيۆەرسيتەتىندە دە ۇلتتىق ءداستۇرلەر تەاترىنىڭ قۇرىلۋىنا, ول ونەر ۇجىمىنىڭ «الپامىس باتىر» قويىلىمىن ساحنالانۋىنا مىرزاتاي جولداسبەكوۆ مول ەڭبەك ءسىڭىردى.
ال عالىمدىق جولىنا ورالساق, ول باسقاراتىن ينستيتۋت «ءداستۇرلى قازاق ونەرى» انتولوگياسىنىڭ 25 تومدىعىن, «اقىندار ايتىسىنىڭ» 7 تومدىق تاڭدامالى جيناعىن شىعارۋدى ماقسات ەتىپ, ولاردىڭ كەيبىرى جۇزەگە استى. قازاق مادەنيەتى تاريحىنا جانە شەشەندىك ونەرگە, حالىق اقىندارىنىڭ شىعارمالارىنا, جىراۋلىق ونەرگە, جىرشى-تەرمەشىلەرگە, ءانشى-كومپوزيتورلارعا, ءداستۇرلى ءانشىلەر مەن كۇيشىلەردىڭ شىعارماشىلىعىنا ارناپ توم-توم ەڭبەكتەردى شىعارۋ جۇمىسى دا جالعاسۋدا.
الاقانداي عانا اقتوبە اۋىلىنان باستالىپ, استاناعا جەتەلەپ اكەلگەن جارقىن جولىڭىز جالعاسا بەرسىن!
امانعالي قالجانوۆ
