كەشە قالالىق اكىمدىكتىڭ ۇلكەن زالىندا «استاناداعى مەملەكەتتىك-جەكەمەنشىك ارىپتەستىك» تاقىرىبىنا ارنالعان دوڭگەلەك ۇستەل ءماجىلىسى ءوتتى.
استانا قالاسى ينۆەستيتسيالار جانە دامۋ باسقارماسىنىڭ باسشىسى الىشەر ابدىقادىروۆتىڭ جەتەكشىلىگىمەن وتكەن جيىنعا «AstanaInvest» قالالىق ينۆەستيتسيالار دامۋ ورتالىعىنىڭ ماماندارى مەن مەملەكەتتىك قىزمەتكەرلەر, «دامۋ» قورى, «ەۋرازيا دامۋ بانكى» وكىلدەرى, كاسىپكەرلەر جانە ينۆەستورلار قاتىستى.
«AstanaInvest» قيدو باسقارما توراعاسىنىڭ ورىنباسارى جانار مۇساتاەۆا ءوز سوزىندە ينۆەستورلاردى قالاداعى مەملەكەتتىك-جەكەمەنشىك ارىپتەستىك ء(مجا) جوبالارىن ىسكە اسىرۋعا قاتىسۋعا شاقىردى. ال «AstanaInvest» قيدو ءمجا جوبا جەتەكشىسى ءاليا بيكەەۆا ءوز قۇزىرلارىنداعى جوبالارعا قاتىستى بايانداما جاسادى.
– بۇگىندە قر «مەملەكەتتىك-جەكەمەنشىك ارىپتەستىك» تۋرالى زاڭىنىڭ شەڭبەرىندە «AstanaInvest» قالالىق ينۆەستيتسيالار دامۋ ورتالىعىنا تيەسىلى ازىرگە ءبىلىم, كولىك, تۇرعىن ءۇي, ەنەرگەتيكا سالالارىنداعى 8 جوبا بار. ماسەلەن, «سەرگەك» جوباسى بويىنشا اعىمداعى جىلدىڭ تامىز ايىندا 6 جىلعا ەكىجاقتى كەلىسىمشارت جاسالعان بولاتىن. قازىرگى ۋاقىتتا 13 مىڭ بەينەباقىلاۋ قۇرالدارى قالانىڭ نەگىزگى كوشەلەرىندەگى جولدارمەن قاتار, ساۋدا-ويىن-ساۋىق ورتالىقتارى مەن مەيرامحانالاردىڭ ماڭىن دا قامتىپ تۇر. سونداي-اق, الداعى ۋاقىتتا بالاباقشالار مەن مەملەكەتتىك قىزمەتكەرلەرگە ارنالعان 100 پاتەرلى جاتاقحانالار سالۋ, كوشەلەردى ەلەكتر جارىعىن ۇنەمدەيتىن جارىقشامدارمەن جابدىقتاۋ سياقتى بىرقاتار جوبالار جۇزەگە اسىرىلماق. بۇل جوبالاردىڭ كەيبىرىنە مەملەكەتتىك تاپسىرىس نەگىزىندەگى بايقاۋ كەلەر جىلدىڭ باسىندا جاريالاناتىن بولادى, – دەيدى ءاليا بيكەەۆا.
مامانداردىڭ ايتۋىنشا, بالاباقشا, مەديتسينالىق مەكەمەلەردىڭ عيماراتتارى سياقتى الەۋمەتتىك نىسانداردىڭ جوباسىنا كوبىنەسە وتاندىق ينۆەستورلار قىزىعۋشىلىق تانىتاتىن كورىنەدى. ال ءوز كەزەگىندە «دامۋ» كاسىپكەرلىكتى دامىتۋ قورى» اق-تىڭ استانا قالاسى بويىنشا ايماقتىق فيليال ديرەكتورى يسلامبەك قايىربەكوۆ اتالمىش قوردىڭ مەملەكەتتىك-جەكەمەنشىك ارىپتەستىك نەگىزىندەگى جوبالاردى دا قولدايتىندىقتارىن جەتكىزدى. سونىمەن قاتار, سۋبسيدياعا قالاي قول جەتكىزۋگە بولاتىنىن, ول ءۇشىن تيەسىلى قۇجاتتاردىڭ تالاپقا ساي بولۋ كەرەكتىگىن تىلگە تيەك ەتتى.
جيىن سوڭىندا باسقارما باسشىلارى مەن جوبا جەتەكشىلەرى جانە ينۆەستورلار تاراپىنان قاتىسۋشىلاردىڭ بارلىق ساۋالدارىنا تىڭعىلىقتى جاۋاپ قايتارىلدى.
نۇرداۋلەت كاكىشەۆ
