«ايالاعان استانا» جەڭىمپازى ەندى «جاڭا تولقىندا» باعىن سىناماق.
قالا كۇنىنە ارنالعان مەرەكەلىك شارالار اياسىندا «ايالاعان استانا» اتتى رەسپۋبليكالىق جوبانىڭ اقتىق كەزەڭى ءوتىپ, جۇزدەن جۇيرىك انىقتالدى. ەندى «ارتەك» لاگەرىندەگى بالالاردىڭ حالىقارالىق «جاڭا تولقىن» ءان بايقاۋىندا ەل نامىسىن استانالىق ونەرپاز مۇحاممەدالى جۇگىنىسوۆ قورعايتىن بولدى. سونىمەن بىرگە وعان 1 ميلليون تەڭگە كولەمىندەگى اقشالاي سىيلىق تاپسىرىلدى.
«ەۋرازيا» ءبىرىنشى ارناسىنىڭ» تىكەلەي ەفيرىندە كورسەتىلگەن بايقاۋدىڭ فينالى ءۇش كۇنگە سوزىلدى. «بالالىق شاقتىڭ ءانۇرانى» كەزەڭىندە قاتىسۋشىلار بالالار رەپەرتۋارىنداعى اندەردى ورىندادى. ەكىنشى كۇنى ولار كاسىبي انشىلەرمەن بىرگە دۋەت قۇرىپ, تانىمال مۋلتفيلم اندەرىن شىرقاسا, سايىستىڭ اقىرعى كۇنىندە كىشكەنتاي انشىلەر اتامەكەنگە, ەڭسەلى ەلوردانىڭ تۋعان كۇنىنە پاتريوتتىق اندەرىن تارتۋ ەتتى.
فينالعا 17 قاتىسۋشى شىقسا دا, دايىندىق بارىسىنداعى ءبىر ايدىڭ ىشىندە ۇيىمداستىرۋشىلار ولاردىڭ كەيبىرەۋىن دۋەت پەن تريوعا بىرىكتىرگەن بولاتىن. كورەرمەن نازارىنا ءار كۇنى 12 ءنومىر كورسەتىلىپ وتىردى. بۇلدىرشىندەر «Zaratushtra Band» وركەسترىنىڭ سۇيەمەلدەۋىمەن جاندى داۋىستا ءان سالىپ قانا قويماي, قويىلىم تارىزدەس نومىرلەرىندە اكتەرلىك شەبەرلىكتەرىن دە بايقاتتى. ءبىر اي بويى ۆوكالدان ساباق العان ولار دۇرىس تىنىس الۋدى, نوتادان اۋىتقىماۋدى ۇيرەنگەندىكتەرىن ايتادى. ونىسى ايقىن كورىنەدى. سەبەبى بالالار انمەن قوسا, جۇگىرىپ تە, سەكىرىپ تە, قيىن-قيىن قيمىل قوزعالىستارىن جاساپ, بي بيلەپ تە ۇلگەردى. ال, ساحنادا ءبارىن ۇشتاستىرىپ, ءاندى جەتكىزە ءبىلۋ ەكىنىڭ ءبىرىنىڭ قولىنان كەلە بەرمەيتىنى راس. وسى ەرەكشەلىكتەردى قازىلار القاسىنداعىلار ۇنەمى تىلگە تيەك ەتىپ, انگە دەگەن قۇشتارلىقتارىنا تاڭدانىستارىن جاسىرمادى. قازىلار القاسىنىڭ قۇرامىندا بايعالي سەركەباەۆ, جانار ايجانوۆا, جۇبانىش جەكسەنۇلى, سەرگەي لازارەۆ, تيماتي, يۋلياننا جانە جوبا پروديۋسەرى لينا اريفۋلينا بولدى. سونىمەن قاتار, حالىق تا قاتىسۋشىلاردىڭ ونەرىن باعالاپ, سمس-حابارلاما ارقىلى داۋىس بەرۋ مۇمكىندىگىنە يە بولدى.
ورال قالاسىنان كەلگەن دانيا يشانقۇلوۆا «كورەرمەن كوزايىمى» اتاندى جانە 1-ورىندى ەنشىلەدى. ال, 2-ورىن «بالاپانچيكي» تريوسىنا جانە جانايكەرىم وتەگەنوۆاعا بۇيىردى. الماتىلىق ياسمين ماجيتوۆا جۇلدەلى 3-ورىننان كورىندى. سونىمەن قاتار, استانا قالاسىنىڭ اكىمدىگى اتىنان ارنايى سىيلىق ناستيا پەرشيكوۆاعا, ال «نۇر وتان» پارتياسىنىڭ اتىنان قىزىلوردالىق دياس ومارعا تاپسىرىلدى.
ال, فينالدا ەڭ جوعارى ۇپاي سانىن جيناعان مۇحاممەدالى جۇگىنىسوۆ گران-پري يەگەرى اتاندى. جەڭىمپاز ەكەنىن ەستىگەندە ول: «بارشاڭىزعا راحمەت! مەن وتە باقىتتىمىن!» دەپ, قۋانىشتان كوزىنە جاس الدى. «قابىلەتىڭدى كىم بايقادى؟» دەگەن سۇراعىمىزعا ول: «ءبىر كۇنى اعام رۇستەم «نوسا» دەگەن ءان سالىپ جۇرگەن. مەن بولسام, قوسىلا كەتتىم. داۋىسىمدى ەستىپ, «ءما, مۇحاممەدالى تاعى ايتشى» دەپ تاڭعالدى. ءسويتىپ, ماعان دا كوپ نارسەنى ۇيرەتە باستادى. ال, ۆوكالمەن 6 جاسىمنان باستاپ اينالىستىم. مەن بولاشاقتا ايگىلى مايكل دجەكسون, تىم قۇرىماعاندا اعام سياقتى ءانشى بولعىم كەلەدى» دەپ جاۋاپ بەردى. «انام ارتقا قاراماي, العا ۇمتىلۋ كەرەك ەكەنىن ۇنەمى ايتىپ وتىرادى. «جاڭا تولقىندا» دا گران-پريگە قول جەتكىزەمىن دەگەن سەنىمىم مول» دەيدى ول.
ۋىز لەبىز
روزا رىمباەۆا, قازاقستاننىڭ حالىق ءارتىسى: – ەڭ تالانتتى, ەڭ ادەمى بالالار ونەر كورسەتتى. ارقايسىسى ەشكىمدى قايتالامايتىن, ەشكىمگە ۇقسامايتىن دارا دارىن يەسى. جەڭبەگەندەر ەڭسەلەرىن تۇسىرمەسىن. مەن دە جاستايىمنان تالاي بايقاۋعا قاتىستىم. بىراق مەنىڭ باستى كونكۋرستارىم ون سەگىز جاسىمنان باستالدى. ال بۇل بالالار, ءتىپتى, كىشكەنتاي! ياعني, ولاردىڭ ومىرىندەگى مۋزىكا مەرەكەلەرى ءالى الدا. ءان – ءوز ىشىمىزدە. ول قاناتتاندىرادى, باقىتتى ەتەدى. ەڭ باستىسى, مۋزىكانى شىن ءسۇيۋ كەرەك!
جانار ايجانوۆا, ءانشى: – ادامنىڭ تالابى, قابىلەتى كىشكەنتاي كەزىنەن بايقالادى. بويدا كورىنگەن سول قاسيەتتى ۋاقىتىندا باپتاپ, شىڭداۋ كەرەك. ال, «ايالاعان استانا» – شىعارماشىل بالالاردىڭ تىلەكشىسى. وكىنىشكە قاراي, ءبىزدىڭ كەزىمىزدە مۇنداي مۇمكىندىكتەر بولعان جوق. بايقاۋدىڭ ءۇشىنشى كۇنىندە قازىلار القاسىنا شاقىرىلدىم. كەلگەن بويدا, ۇيىمداستىرۋشىلار «مۇحاممەدالى دەگەن بالا بار. العاشقى كۇننەن-اق جاقسى كورىنىپ, جوعارى ۇپاي جيناپ كەلە جاتىر» دەپ بىزگە الدىن الا قۇلاققاعىس ەتتى. قانشا دەگەنمەن «ءادىل قازى» دەگەن اتىمىز بار عوي, «ەشكىمدى ءبولىپ جارعىمىز كەلمەيدى. اۋەلى ءبارىن تىڭداپ الايىق. كەيىن ءتيىستى باعالارىن قويامىز» دەدىك. ەستىدىك, كوردىك. شىنىمەن مۇحاممەدالى كوزگە وتتاي باسىلدى. داۋىسى جاقسى, توپ جارۋعا لايىق ەكەن! بۇل بالالاردىڭ جولدارى اشىلدى. ۆوكالدان ساباق الدى, ساحنا مادەنيەتىن مەڭگەردى, اكتەرلىك شەبەرلىككە ۇيرەندى. ءتىپتى, ساحناعا شىعىپ كەتكەن كەي ارتىستەردەن دە اسىپ تۇر. ەندىگى مەنىڭ ويىم, جۇلدەگە يە بولعاندار جەتەكشىلەرىن تاۋىپ, ال قالعاندارى كولەڭكەدە قالىپ قويماسا ەكەن.
ءمادينا جاقىپ
