…مىنە, حالقىمىز جەتى قازىنانىڭ ءبىرى دەپ دارىپتەگەن يت جىلى دا تاريح قويناۋىنا ەنىپ بارادى. بۇل جىل جاقسىلىققا تولى بولدى دەپ ايتا الامىز. بىراق… ءيا, بىراق ءومىر بولعاندىقتان ونىڭ قۋانىشى مەن قايعىسى قاتار جۇرەتىنى انىق. بيىل ۇلتىمىزدىڭ ءبىر-ءبىر ۋىعىنا اينالعان بىرشوعىر يگى جاقسىلاردان كوز جازىپ قالدىق. وسىندايدا ويىمىزعا اۋزى دۋالى شال اقىننىڭ «اللادان شىنىمەنەن بۇيرىق كەلسە, جۇلدىز دا جەرگە تۇسەر اسپانداعى» دەگەن ەكى جول ولەڭى تۇسەدى. شىندىعىندا, تىرلىكتىڭ قاتال زاڭىنا ەشكىم قارسى تۇرا المايدى.
جىل باسىندا, ياعني اقپان ايىندا قارا ءسوزدىڭ ورەن جۇيرىگى, دارىندى دراماتۋرگ راحىمجان وتارباەۆ دۇنيەدەن وزدى. قارىمدى قالامگەر ناعىز كەمەلىنە كەلىپ, شوقتىعى بيىك شىعارمالار تۋعىزار دەر شاعىندا ارامىزدان كەتتى. راحىمجان اعامىز ادەبيەتكە ءوز ۇنىمەن كەلدى. سۋرەتكەردىڭ بولمىسى دا بەكزاتتىق پەن تەكتىلىكتىڭ ۇلگىسى ەدى. ونىڭ قايسار قالامىنان ادەبيەتىمىزدىڭ اسىل قازىناسىنا قوسىلعان سۇبەلى شىعارمالار تۋىپ, وقىرماندارىنىڭ قولىنان تۇسپەيتىن دۇنيەگە اينالدى.
ءدال وسى ايدا پرەزيدەنت سىيلىعىنىڭ تۇڭعىش لاۋرەاتى, قازاقستاننىڭ ەڭبەك سىڭىرگەن قايراتكەرى, ەلىمىزدەگى باس باسىلىمنىڭ رەداكتورى بولعان, بىلايعى جۇرت «ەگەمەننىڭ قارى نارى» دەپ اتاعان ەرجۇمان سمايىلدان ايىرىلىپ قالدىق. قازاق جۋرناليستيكاسىنىڭ دامۋىنا ولشەۋسىز ۇلەس قوسقان ازامات ءدال جەتپىس جاسىندا كەنەتتەن قايتىس بولدى.
ناۋرىزدا قازاقستان ازاماتتىق اليانسىنىڭ بۇرىنعى پرەزيدەنتى, قوعام قايراتكەرى, بەلگىلى تەلەجۇرگىزۋشى, ۇلتجاندى ازامات نۇرلان ەرىمبەتوۆ ومىردەن ءوتتى.
شىلىڭگىر شىلدەدە داڭقتى سپورتشى, مانەرلەپ سىرعاناۋدان وليمپيادا جانە الەم چەمپيوناتتارىنىڭ جۇلدەگەرى, ازيا ويىندارى مەن دۇنيەجۇ-زىلىك ۋنيۆەرسيادانىڭ جەڭىمپازى دەنيس تەن قاپيادا كوز جۇمدى. جاسىنداي جارق ەتكەن عۇمىر يەسىنىڭ قازاسى قالىڭ ەلگە اۋىر ءتيدى.
سارى كۇزدە رۋحانياتىمىزدىڭ الىپ تىرەگى, قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى پۋبليتسيست, اقيقاتتىڭ الداسپانى اتانعان شەرحان مۇرتازا 86 جاسىندا دۇنيە سالدى. ءبىرتۋار تۇلعا ومىردەن وتكەندە قازاق دالاسى قوبىزداي كۇڭىرەندى. ۇلت جۋرناليستيكاسىندا ونىڭ ەسىمى قۇرمەتپەن ايتىلادى. ويتكەنى شەرحان اعامىز وسى سالاعا قانجارداي ءتىلىپ تۇسەر وتكىرلىك پەن وزگەشە ورنەك اكەلدى. كەڭەس وكىمەتىنىڭ قىراعى كوزى توبەسىنەن بۇركىتتەي ءتونىپ وتىرسا دا, الىپ ازامات باسقارعان باسىلىمدار ەلدىڭ ءسوزىن سويلەدى. پاراساتتى سۋرەتكەردىڭ قالامىنان جۇرتشىلىق ويى تەرەڭ, ءتىلى شۇرايلى شىعارمالار جارىققا شىقتى. ءبىراز جىلدار پارلامەنت ءماجىلىسىنىڭ دەپۋتاتى بولىپ بيىك مىنبەدەن ۇلتتىق تۇتاستىق, ءتىل, ءدىن, ءدىل جايىندا شىندىقتى قاق جارىپ ايتتى. ەلباسى جازۋشى قايتىس بولعاندا ونىڭ تۋعان-تۋىستارىنا جىبەرگەن جەدەلحاتىندا: «شەرحان مۇرتازانىڭ قازاق رۋحانياتىنداعى ورنى مەن جارقىن بەينەسى ەشقاشان ۇمىتىلمايدى دەپ سەنەمىن» دەپ جازعان. راسىندا, تاۋ تۇلعانىڭ ەسىمى دە, ونىڭ تۋعان حالقى ءۇشىن جاساعان ەڭبەگى دە ەل جۇرەگىنەن وشپەيدى.
سونداي-اق, بيىل بەلگىلى قالامگەر, عالىم, قوعام قايراتكەرى, ءبىر سوزبەن ايتقاندا, اقتىق دەمى ۇزىلگەنشە قازاق جەرىنىڭ مۇڭىن مۇڭداپ, جوعىن جوقتاعان ساپابەك ءاسىپ, تاماشا بالالار اقىنى سۇلتان قاليۇلى, اقىن ءابدىراحمان اسىلبەكوۆ اۋدارماشى-جۋرناليست ماتكارىم اكىمجانوۆ, جازۋشى تالعات كەڭەسباي سەكىلدى ادەبيەتىمىزدىڭ دارىندى ساربازدارى باقي بولدى. كورنەكتى عالىم, تاريح عىلىمدارىنىڭ دوكتورى, اكادەميك كارل بايپاقوۆ پەن قازاقستاننىڭ حالىق ءارتىسى, تەاتر ونەرىنىڭ بىرەگەي وكىلى زامزاگۇل ءشارىپوۆا دا قايتپاس ساپارعا اتتاندى.
حالقىمىزدا «عالىمنىڭ حاتى, جاقسىنىڭ اتى ولمەيدى» دەگەن تاعىلىمدى ءسوز بار. ءبىز ءسوز ەتكەن ارداقتىلارىمىزدىڭ ەسىمدەرى جۇرتىمىزبەن ماڭگى جاسايتىنى انىق.
ەسىك قاعىپ كەلە جاتقان جاڭا جىل ەلىمىزگە قۇت اكەلىپ, حالقىمىزدىڭ ابىرويىنا اينالعان ايبوزدارىمىز امان ءجۇرسىن دەپ تىلەيىك.
