كەشە «بارىس ارەنا» سپورت سارايىندا استانا قالاسىنىڭ اكىمدىگى, قۇرلىقتىق حوككەي ليگاسى جانە «بارىس» حوككەي كلۋبى اراسىندا 2018 جىلعى «قحل جۇلدىزدارىنىڭ ماتچى» ەلوردامىزدا وتەتىنى جونىندەگى مەموراندۋمعا قول قويىلدى.
– الداعى جىلدىڭ العاشقى ايىندا استانا ەۋرازيا كەڭىستىگىنىڭ حوككەي قالاسىنا اينالايىن دەپ تۇر. «جۇلدىزدار ماتچىن» وتكىزۋگە ءبىزدىڭ استانامەن قاتار حەلسينكي, قازان جانە ۆلاديۆوستوك قالالارى دا ۇمىتكەر بولعان ەدى. وسى باسەكەدە قحل-دىڭ ارنايى كوميسسياسى ءبىزدىڭ ەلوردامىز بارلىق تالاپتارعا ساي كەلەتىنىن ايقىنداپ, ليگا باسشىلىعىنىڭ تاڭداۋى استانا قالاسىنا تۇسكەن ەكەن. بۇل – ۇلكەن سەنىم, ءارى جاۋاپكەرشىلىك. «بارىس» حوككەي كومانداسى ءبىزدىڭ قالانىڭ برەندىنە اينالىپ وتىر. ءبىزدىڭ كوماندا قحل چەمپيوناتىندا جاقسى ويىن ورنەگىن كورسەتىپ ءجۇر. بۇگىندە قانشاما بالالار مەن جاستار حوككەيگە تارتىلىپ جاتىر.
ءبىز ءوز تاراپىمىزدان جاڭا فورماتتا وتەتىن «قحل جۇلدىزدارىنىڭ ماتچىن» جوعارى دەڭگەيدە وتكىزەتىن بولامىز, – دەدى استانا قالاسىنىڭ اكىمى اسەت يسەكەشەۆ مەموراندۋمعا قول قويۋ راسىمىنەن كەيىن.
قحل پرەزيدەنتى دميتري چەرنىشەنكو استانا اكىمىنە العىسىن ايتىپ, «بارىس ارەنا» ليگاداعى ەڭ تارتىمدى ءارى جايلى حوككەي ارەناسى ەكەنىن اتاپ ءوتتى. ول سونىمەن قاتار قازاقستاندا حوككەيدىڭ جاقسى دامىپ كەلە جاتقانىن ايتىپ, 2018 جىلدىڭ 10-14 قاڭتار كۇندەرى وتەتىن «حوككەي جۇلدىزدارىنىڭ اپتاسى» ەل ءۇشىن دە, جانكۇيەرلەر ءۇشىن دە ايتۋلى وقيعا بولاتىنىنا سەنىم ءبىلدىردى.
قحل پرەزيدەنتى «2018 جىلعى قحل جۇلدىزدارىنىڭ ماتچى» استانادا وتەتىنى جونىندەگى سەرتيفيكاتتى سالتاناتتى جاعدايدا «بارىس» حوككەي كلۋبىنىڭ پرەزيدەنتى اسقار شوپوباەۆقا تاپسىردى.
سونىمەن, الداعى جىلدىڭ العاشقى ايى استانا ءۇشىن شىنىمەن دە حوككەي مەرەكەسى بولاتىنداي. «حوككەي جۇلدىزدارىنىڭ اپتاسى» شاراسى اياسىندا ايەلدەر حوككەي ليگاسى, جاستار حوككەي ليگاسى جانە قحل جۇلدىزدارىنىڭ ماتچتارىن كورەتىن بولامىز. سونداي-اق, ۇزدىك ويىنشىلاردىڭ ماستەر-شوۋىن دا تاماشالاي الامىز.
عالىم قوجابەكوۆ
