«قازاقستان» ورتالىق كونتسەرت زالىندا «جۇلدىزدار شەرۋى» ءوتتى. كينوكونتسەرت – الەمگە ايگىلى Disney كومپانياسى مەن «بولاشاق» قازاقستاندىق قايىرىمدىلىق قورىنىڭ بىرلەسكەن مادەني جوباسى. «بولاشاق» كورپوراتيۆتىك قورى ءوزىنىڭ 10 جىلدىق مەرەيتويىندا ەلوردا تۇرعىندارىنا وسىنداي سىيلىق تارتۋ ەتتى.
«جۇلدىزدار شەرۋى» كينوكونتسەرتى – Disney-ءدىڭ الەمدىك كينوكونتسەرتتەرى بىرەگەي جەلىسىنىڭ جالعاسى. ول لوندون, سان-فرانتسيسكو, توكيو, سيدنەي, پاريج, ماسكەۋ جانە باسقا قالالاردىڭ ۇزدىك كونتسەرتتىك زالدارىندا وتكىزىلەدى. قوردىڭ ارقاسىندا ورتالىق ازياداعى تۇڭعىش كينوكونتسەرت 2018 جىلى الماتىدا انشلاگپەن وتكەن ەدى. سودان بەرى كينوكونتسەرت قازاقستاندا جىل سايىن وتكىزىلەدى. بيىلعى ءىس-شارا نۇر-سۇلتان قالاسىنىڭ اكىمدىگى قولداۋىمەن وتكىزىلدى.
نۇر-سۇلتانداعى كينوكونتسەرتتە وتانداسىمىز, Black Star inc. لەيبلىنىڭ ءارتىسى Nazima ونەر كورسەتتى. ءانشى Disney-ءدىڭ 1998 جىلعى «مۋلان» انيماتسيالىق فيلمىنەن «Reflection» ءانىن قازاق تىلىندە ورىندادى. سونداي-اق «Qazaqstan» وكز ساحناسىندا Super Star KZ جوباسىنىڭ قاتىسۋشىسى دينارا سۇلتان, «جۇلدىزدى جەكپە-جەك» مۋزىكالىق شوۋىنىڭ جەڭىمپازى گۇلسىم مىرزابەكوۆا, «سلاۆيانسكي بازار-2017» فەستيۆالىنىڭ ديپلومانتى Ayree جانە باسقا دا تانىمال انشىلەر ءان سالدى.
بيلەت ساتۋدان تۇسكەن قاراجات ينكليۋزيۆتى ءبىلىم بەرۋ جانە دارىندى جاستاردى قولداۋ جوبالارىن دامىتۋعا «بولاشاق» قورىنا اۋدارىلادى.
بايان اسىلبەكوۆا
