«سارىارقا» ۆەلوترەگىندە ورىن تەپكەن «جۇلدىز» كوركەم گيمناستيكا مەكتەبى «سالاماتتى قازاقستان» مەملەكەتتىك باعدارلاماسىنا سايكەس اشىلعان.
مەكتەپ ەلوردالىق جەتكىنشەكتەردى كوپتەپ تارتىپ, ەلىمىزدەگى كوركەم گيمناستيكانىڭ دامۋىنا جاڭا سەرپىن بەرىپ كەلەدى.
ەلىمىزدىڭ ۇلتتىق قۇراماسىنىڭ جەتكىنشەكتەر توبىنا وسى مەكتەپتىڭ ءتۇلەكتەرى ەنىپ وتىرعانىن «جۇلدىزدىڭ» جەتىستىگى دەپ ايتۋ كەرەك. سەلينا جۇماتاەۆا, مەدينا نۇرعالي, ازاليا بەيبىتوۆا, دارا زاتىنبەك سەكىلدى سپورتشىلار – «جۇلدىزدىڭ» ماقتانىشى.
جاس ورەندەردى كوركەم سپورتقا بىلىكتى جاتتىقتىرۋشىلار, حورەوگرافتار دايىندايدى. ەرەكشە ەپتىلىگى بار, تال بويىندا ءمىنى جوق قىزداردىڭ اراسىنان جۇلدىزى جانىپ تۇرعاندارىنىڭ تالانتىن بايقاپ, شەبەرلىگىن شىڭدايتىن – باپكەرلەر. سولاردىڭ قاتارىندا ايجان جانە گۇلجان جولىمبەتوۆالار دا بار. ەگىز قىزدار – كوركەم گيمناستيكادان سپورت شەبەرلەرى. التى جاسىنان باستاپ سپورتتىڭ وسى تۇرىمەن اينالىسقان قىزدار قازىر مەكتەپتە جاتتىقتىرۋشى بولىپ قىزمەت ەتىپ ءجۇر. ايجان ءۇش جارىم جاستان ەندى اسقان بالدىرعاندارمەن جۇمىس ىستەسە, گۇلجان ءجاسوسپىرىم قىزداردى باپتايدى.
– ورىستىڭ ماريا تەاترىنىڭ بىلىكتى ۇستازدارىنىڭ ويلاپ تاپقان ونەر مەن سپورتتىڭ ۇشتاسقان ءتۇرى وتكەن عاسىردىڭ قىرقىنشى جىلدارى پايدا بولدى. 1984 جىلدان باستاپ وليمپيادا ويىندارىنىڭ تىزىمىنە ەنگىزىلگەن بولاتىن. كوركەم گيمناستيكادان الدىنا جان سالمايتىن رەسەيلىك سپورتشىلار ەكەنى داۋسىز. الايدا ۇلكەن دودادا باق سىناعان قازاقستاندىق گيمناستشىلارىمىز دا جوق ەمەس. «جۇلدىز» سياقتى بارلىق وڭىرلەردەگى مەكتەپتەر قازاق قىزدارىنىڭ جۇلدىزدى ساتتەرىنە دايارلىق جاساپ جاتىر دەۋگە ابدەن بولادى, – دەدى جاتتىقتىرۋشى ايجان جولىمبەتوۆا.
– سپورتتىڭ بۇل ءتۇرى قىزداردىڭ تۇلعاسىنىڭ اسەم بولىپ قالىپتاسۋىنا, اسەمدىككە, ءتىپتى باسەكەگە دە باۋليدى. ءبىر-بىرىنەن قالىسپاۋعا قايراپ, نامىسىن شىڭداپ, تەك جەتىستىكتەرگە جەتەلەيدى. مۇنداي قاسيەتتەر ادام بالاسىنىڭ ومىرىندە دە كەرەك, – دەيدى ەگىزدىڭ سىڭارى گۇلجان.
كوركەم گيمناستيكا – بۇل تەك ەپتىلىك, كۇش جانە توزىمدىلىك قانا ەمەس, ۇرشىقتاي ءۇيىرىلىپ, مىڭ بۇرالىپ بيلەۋدى دە تالاپ ەتەدى. ودان باسقا, گيمناستيكالىق بۇيىمداردى شەبەرلىكپەن قولدانا ءبىلۋ قاجەت. شەڭبەردى بەلىندە شىر اينالدىرىپ, اۋەلەتە لاقتىرعان دوپتى قاعىپ الىپ, جىبەك لەنتانى شاتاستىرماي, «بۋلاۆا» دەيتىن بىلەمدى قولىنداعى قامشىداي شىر ءۇيىرۋ كەرەك. بالەتتىڭ ءبىر بولىگى بولعان سوڭ, مۋزىكا جانە حورەوگرافيامەن بايلانىسى تاعى بار. دەمەك, سپورتشىلاردان ىرعاق سەزىمى مەن اۋەندىلىكتى تالاپ ەتىپ, قوزعالىستاردىڭ مانەرلىلىگىنە ءمان بەرەدى. بۇل بالدىرعانداردىڭ ەستەتيكالىق تالعامىن شىڭداۋعا جاردەمدەسەدى.
«جۇلدىزدىڭ» دا جۇلدىزدى ساتتەرى ءالى الدا. دەسە دە, جاس قىزداردىڭ بوي-تۇلعاسىنىڭ جاراسىمدى دامىپ-وسۋىنە, دەنىنىڭ ساۋلىعىنىڭ نەگىزىن قالايتىن مەكتەپتىڭ جۇمىسى وتە ماڭىزدى. مۇندا ءسامبى تالداي يىلگەن, تال بويىندا ءمىنى جوق قازاق قىزدارىنىڭ قاتارى ءوسىپ كەلەدى.
ايگۇل ۋايسوۆا
