كەزەكتى بوس جۇمىس ورىندارى جارمەڭكەسى «جاستار» سارايىندا ءوتتى. جۇمىس ىزدەۋشىلەرمەن بىرگە بارىپ, قانداي ماماندارعا سۇرانىس جوعارى ەكەنىن بىلدىك.
استانا قالاسى اكىمدىگىنىڭ ەڭبەك موبيلدىلىگى ورتالىعى ۇيىمداستىرعان جارمەڭكەدە 80 كومپانيا 680 بوس جۇمىس ورنىن ۇسىندى. قارجى, ءبىلىم بەرۋ, دەنساۋلىق ساقتاۋ, قۇقىق قورعاۋ, مەملەكەتتىك قىزمەت, قۇرىلىس, ساۋدا-ساتتىق سالاسى بويىنشا جۇمىس ۇسىنعان كومپانيالاردى كوردىك. جۇمىس ىزدەۋشى ادامداردىڭ قاراسى قالىڭ. كوزگە ورتا جاس بۋىنىنا جاتاتىندار كوپ كورىندى.
«جىل باسىنان بەرى 12-ءشى بوس جۇمىس ورىندار جارمەڭكەسىن وتكىزدىك. مۇندا جۇمىس ورىندار ىشىندە قىزمەت كورسەتۋ سالاسىندا بوس جۇمىس ورنى باسىم. جارمەڭكە جۇمىس بەرۋشى مەن جۇمىس ىزدەپ جۇرگەن ادامعا ۇلكەن مۇمكىندىك بەرەدى. قاجەتتى جۇمىس ىزدەپ جۇرگەن ادام ءوزىنىڭ تۇيىندەمەسىن بىرنەشە جۇمىس بەرۋشىگە ۇسىنسا, جۇمىس بەرۋشى دە جارمەڭكە كەزىندە وزدەرىنە قاجەتتى ماماندارىن تەز تابادى. وسى ايدىڭ سوڭىندا تاعى ءبىر جارمەڭكە وتەدى. ال جىل سوڭىنا دەيىن ءالى 5 جارمەڭكە وتكىزەمىز دەپ جوسپارلاپ وتىرمىز. جالپى قازىر ەلوردادا جۇمىسسىزدىق دەڭگەيى 4,5 پايىزدى قۇرايدى» دەيدى استانا قالاسى اكىمدىگىنىڭ «جۇمىسپەن قامتۋ ورتالىعى» مەكەمەسىنىڭ ديرەكتورى ولجاس ومار.
– جىل باسىنان 20 بوس جۇمىس ورىندارى جارمەڭكەسى وتكىزىلدى. وعان ءتۇرلى سالاداعى 282 جۇمىس بەرۋشى 3878 ۆاكانسيا ۇسىندى. 482 ادام تۇراقتى جۇمىس تاپتى, – دەدى سارىارقا اۋدانى بويىنشا مانساپ ورتالىعىنىڭ باسشىسى باعيلا ورىمبەتوۆا.
پۋشكين كوشەسى, 37/2 مەكەنجايىنداعى №1 اۆتوبۋس پاركىنە ە, ە1, D كاتەگورياسى بار جۇرگىزۋشىلەر كەرەك ەكەن. بۇل كومپانيانىڭ اعا باقىلاۋشىسى فانيا قۇلمانوۆانىڭ سوزىنشە, قوعامدىق كولىكتى باسقاراتىن ادامدارعا ىرىكتەۋ جۇرۋدە. 5 جىل جۇمىس ءوتىلى بار جۇرگىزۋشىلەردى جۇمىسقا قابىلداۋعا دايىن ەكەن. جالاقىسى دا تۇراقتى, 400-500 مىڭ تەڭگەدەن باستالادى.
استانا حالىقارالىق اۋەجايى 10 بوس جۇمىس ورنىن ۇسىندى. «نۇربانك» اق ەلورداداعى فيليالى دا قارجىگەر, ەكونوميست ماماندىعى بويىنشا 4 ۆاكانسيا ۇسىندى. مەكتەپتەر مەن وقۋ ورتالىقتارىنا دا پەداگوگ ماماندار كەرەك. سونىڭ ءبىرى – №84 مەكتەپ-ليتسەيى. ءبىلىم ورداسىنىڭ كادر جونىندەگى مەنەدجەرى جادىرا شايمۇراتتىڭ سوزىنشە, ينفورماتيكا, ماتەماتيكا, حيميا, قازاق جانە ورىس ادەبيەتى, مۋزىكا پاندەرى بويىنشا جانە پسيحولوگ, دەفەكتولوگ, باستاۋىش سىنىپ مۇعالىمدەرى قاجەت.
جارمەڭكە بارىسىندا «جاستار پراكتيكاسى», «العاشقى جۇمىس», «ۇرپاقتار كەلىسىمشارتى» باعدارلامالارىنا كاسىپتىك وقىتۋ جانە «Enbek.kz» پورتالىمەن جۇمىس ىستەۋ جونىندە ءتۇسىندىرۋ جۇمىسى جۇرگىزىلدى.
مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا دەپارتامەنتىنىڭ مەملەكەتتىك قىزمەت باسقارماسىنىڭ باس مامانى قۋانىش ساتتاردىڭ ايتۋىنشا, قولدانىستاعى زاڭ بويىنشا جوعارى وقۋ ورىندارىنىڭ تۇلەكتەرىندە ءبىر جىل ىشىندە تومەنگى مەملەكەتتىك لاۋازىمدارعا كونكۋرسسىز ورنالاسۋعا مۇمكىندىكتەرى بار ەكەن.
