نۇر-سۇلتان قالاسىنىڭ جۇمىسپەن قامتۋ ورتالىعى تۇراقتى نەگىزدە بوس جۇمىس ورىندارى جارمەڭكەسىن وتكىزۋدە. بيىل پاندەمياعا بايلانىستى شارا ونلاين ۇيىمداستىرىلۋدا.
قالا اكىمدىگى ءمالىم ەتكەندەي, جۇمىس تاپقىسى كەلەتىندەر الەۋمەتتىك جەلىدەن تىكەلەي ەفيرلەردى كورە الادى. ترانسلياتسيا كەزىندە جۇمىس بەرۋشىلەر نەگىزگى ەڭبەك جاعدايلارى مەن بوس جۇمىس ورىندارى تۋرالى ايتادى.
«ورتاشا العاندا, ءبىر شاعىن سۇحبات شامامەن 10-15 مينۋتتى قۇرايدى. بۇل كەزدە كومپانيا وكىلدەرى نەگىزگى جۇمىس جاعدايلارىن تۇسىندىرەدى. تىكەلەي ەفيردى كورەتىندەر جانە جۇمىس ورنىنا قىزىعۋشىلىق تانىتقاندار كومپانيانىڭ بايلانىس اقپاراتىن جازىپ الىپ, پىكىر قالدىرا الادى نەمەسە جۇمىسپەن قامتۋ ورتالىعىنا حابارلاسسا, ولار قاجەتتى دەرەكتەردى تابۋعا كومەكتەسەدى» دەپ ءتۇسىندىردى جۇمىس بەرۋشىلەرمەن ءوزارا ءىس-قيمىل ءبولىمىنىڭ باسشىسى باقىت راقىشەۆا.
ايتا كەتەيىك, قۇرىلىس, ساۋدا, تاماق جانە دەنساۋلىق ساقتاۋ سالالارىنىڭ ماماندارى بۇگىندە ەڭبەك نارىعىندا ەڭ كوپ سۇرانىسقا يە. سۇرانىسى جوعارى ماماندىقتار قاتارىندا جۇمىسشى, مونتاجشى, بريگادير, كىرپىش قالاۋشى, ارماتۋراشى, كاسسير, ساتۋشى, سانيتار جانە تاعى باسقالارى بار.
«تۇرعىندار ءوز قالاۋىنا بايلانىستى جۇمىس تابا الادى. كوبىنە باسقا فورمات ۇسىنىلادى, ونىڭ ىشىندە جارتىلاي جۇمىس كۇنى دە بار» دەپ ءتۇسىندىردى جۇمىسپەن قامتۋ ورتالىعىندا.
ونلاين جارمەڭكەلەر ءار ەكى اپتا سايىن بەيسەنبى كۇنى ساعات 15:00-دە نۇر-سۇلتان قالاسىنىڭ جۇمىسپەن قامتۋ ورتالىعىنىڭ Instagram پاراقشاسىندا وتەدى. بوس جۇمىس ورىندار جارمەڭكەسىنىڭ تولىق نۇسقاسىن IGTV-دە كورۋگە بولادى. ۆاكانسيالار تۋرالى اقپارات www.enbek.kz پورتالىندا دا جاريالانادى. قوسىمشا اقپاراتتى 7 (7172) 57 89 37, 57-88-89, 24-83-02, 8 777 116 82 73 تەلەفوندارى ارقىلى الۋعا بولادى. جۇمىسپەن قامتۋ ورتالىعىنىڭ مەكەنجايى: بەيبىتشىلىك كوشەسى, 25, «وركەن» ىسكەرلىك ورتالىعى.
